Azərbaycan MDB-nin Sənaye Təhlükəsizliyi üzrə Dövlətlərarası Şurasının Belarus paytaxtında keçiriləcək iclasında iştirak edəcəkdir

Sentyabrın 11-12-də Belarus paytaxtında MDB-nin Sənaye Təhlükəsizliyi üzrə Dövlətlərarası Şurasının XI iclası keçiriləcəkdir. Bu barədə MDB İcraiyyə Komitəsinin Minskdəki mətbuat xidmətində məlumat verilmişdir.

Şuranın işində Azərbaycan, Belarus, Qazaxıstan, Qırğızıstan, Moldova, Rusiya, Tacikistan, Ukrayna və Ermənistanın sənaye təhlükəsizliyi sahəsində dövlət nəzarəti orqanlarının nümayəndələri iştirak edəcəklər.

Şuranın iştirakçıları iki gün ərzində təhlükəli istehsalat obyektlərində texniki qurğuların tətbiq edilməsinə icazə verilməsi üzrə milli prosedurların yaxınlaşdırılması konsepsiyasının layihəsini nəzərdən keçirəcək, neft-qaz sahəsinin mürəkkəb və təhlükəli istehsalat obyektlərində birgə nəzarət-profilaktika yoxlamaları aparılması təcrübəsini öyrənəcəklər.

İclasda 2014-cü ilə qədər olan dövrdə "Təhlükəli istehsalat obyektlərində sənaye təhlükəsizliyi sahəsində əməkdaşlıq haqqında" Sazişin yerinə yetirilməsinin gedişatı, habelə bu sazişin iştirakçıları olan dövlətlərin qanunvericiliyində baş vermiş dəyişikliklər müzakirə ediləcəkdir.

Xatırladaq ki, həmin sənəd 2001-ci ilin sentyabr ayında Moskvada MDB iştirakçıları olan dövlətlərin hökumət başçıları tərəfindən qəbul edilmişdir. Saziş təhlükəli istehsalat obyektlərində sənaye təhlükəsizliyi sahəsində əməkdaşlığın inkişafına və dərinləşdirilməsinə, təhlükəsizliyin təmin edilməsi üzrə fəaliyyətin əlaqələndirilməsinə yönəldilmişdir.

Sənaye Təhlükəsizliyi üzrə Dövlətlərarası Şurası məhz bu sazişin həyata keçirilməsi üçün yaradılmışdır. Şuranın iclasları hər il sazişin iştirakçısı olan dövlətlərdən birinin ərazisində keçirilir.

Zeynal AĞAZADƏ,

AzərTAc-ın xüsusi müxbiri

Minsk

Azərbaycan. - 2013.- 5 sentyabr.- S. 7.