Baş Pasport Qeydiyyatı və Miqrasiya İdarəsinin Şirvan şəhər regional şöbəsinin yeni inzibati binası istifadəyə verilmişdir

Sentyabrın 4-də Şirvan şəhərində Azərbaycan Respublikası Daxili İşlər Nazirliyinin Baş Pasport Qeydiyyatı və Miqrasiya İdarəsinin Şirvan regional şöbəsi üçün yeni inzibati bina istifadəyə verilmişdir.

AzərTAc xəbər verir ki, iki mərtəbədən ibarət olan binada ümumvətəndaş pasportlarının verilməsi üçün bütün zəruri şərait yaradılmışdır. Daha bir yenilik isə ondan ibarətdir ki, regionda ilk dəfə olaraq biometrik ümumvətəndaş pasportunun verilməsinə başlanılmışdır.

Yeddi rayona xidmət göstərən şöbə tərəfindən gün ərzində 200 nəfər vətəndaşın sənədləri qəbul ediləcəkdir.

Baş Pasport Qeydiyyatı və Miqrasiya İdarəsinin Şirvan regional şöbəsinin istifadəyə verilməsi mərasimində iştirak edən daxili işlər nazirinin müavini, polis general-leytenantı Əsgər Ələkbərov qurumun inzibati binası və burada yaradılan şəraitlə tanış olmuşdur.

Sonda bir qrup vətəndaşa biometrik pasportlar təqdim edilmişdir.

Azərbaycan. - 2013.- 5 sentyabr.- S. 8.