Çinin nüfuzlu «Global times» qəzeti Azərbaycan xalçası və Naftalan nefti haqqında məqalələr dərc etmişdir

Çin Xalq Respublikasının gündəlik "Global times" ("Huanqiu Shibao") qəzetində Azərbaycan haqqında növbəti iki məqalə dərc edilmişdir.

Azərbaycanın Çindəki səfirliyinin təşkilatçılığı ilə bir müddət öncə ölkəmizdə səfərdə olan "Global times" qəzetinin əməkdaşları Azərbaycan haqqında silsilə məqalələr hazırlayırlar. Növbəti iki məqalə Azərbaycan xalçası və Naftalan nefti haqqındadır.

Gündəlik 1,5 milyon nüsxə tirajla çap olunan nüfuzlu "Global times" qəzetində dərc edilən "Xalçaçılıq - Azərbaycan xalqının milli sərvətidir" başlıqlı məqalədə xalqımızın qədim xalçaçılıq sənətindən, Azərbaycan xalçalarının gözəlliyindən, xalçaçılığın bugünkü vəziyyətindən söz açılır. Müəllif qeyd edir ki, tarixi Bürünc dövrünədək gedib çıxan xalçaçılıq sənəti orta əsrlərdə çiçəklənməyə başlamışdır. Həmin dövrdən etibarən Azərbaycan xalçaları xarici ölkələrə ixrac olunmağa başlamışdır. Hazırda dünyanın nüfuzlu muzeylərinin nadir eksponatları sırasında Azərbaycan xalçaları da yer alır.

Qəzet yazır ki, bir çox Avropa rəssamları Azərbaycan xalçalarının naxışlarından öz əsərlərində mütəmadi istifadə edirlər. Daha bir maraqlı fakt isə məşhur Yalta konfransında SSRİ, ABŞ və Böyük Britaniya dövlət başçılarının görüşü zamanı döşəmədəki xalçanın Azərbaycandan gətirilməsi ilə bağlı məqamdır.

Məqalədə həmçinin Azərbaycan hökumətinin xalçaçılıq sənətinin qorunması və inkişafı istiqamətində gördüyü işlərdən söz açılır, ölkənin müxtəlif bölgələrində xalça muzeylərinin və xalçaçılıq məktəblərinin fəaliyyət göstərdiyi bildirilir. Eləcə də xalça sənətinin qorunması və inkişaf etdirilməsinə dair xüsusi qanun qəbul olunduğu diqqətə çatdırılır.

"Azərbaycanda xəstəliklər neft vannası ilə müalicə edilir" başlıqlı məqalədə isə Naftalan neftinin müalicəvi əhəmiyyətindən bəhs edilir. Qeyd olunur ki, müalicəvi xüsusiyyətə malik Naftalan neftindən faydalanmaq istəyənlər təkcə Azərbaycan vətəndaşları deyil. Dünyanın müxtəlif ölkələrindən bu sehrli neftin sorağını alıb gələnlər var. Hər il 10 mindən çox turist Naftalan nefti ilə müalicə olunmaq məqsədilə Azərbaycana gəlir.

Şahin CƏfƏrov,

AzərTAc-ın xüsusi müxbiri

Pekin

Azərbaycan. - 2013.- 5 sentyabr.- S. 11.