Azərbaycan-Böyük Britaniya əməkdaşlığı müzakirə edilmişdir

Azərbaycanın xarici işlər naziri Elmar Məmmədyarov Böyük Britaniya və Şimali İrlandiya Birləşmiş Krallığına işgüzar səfəri çərçivəsində bu ölkənin xarici işlər naziri Uilyam Heyq ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə BMT Təhlükəsizlik Şurasının gündəliyində duran aktual məsələlər ətrafında fikir mübadiləsi aparılmışdır. İkitərəfli əməkdaşlıq məsələlərinin geniş müzakirə edildiyi görüşdə ölkələrimiz arasında əlaqələrin gələcəkdə daha da inkişafı üçün yaxşı perspektivlərin olduğu vurğulanmışdır.

Böyük iqtisadi nailiyyətlər əldə etmiş Azərbaycanın 2015-ci ildə birinci Avropa Oyunlarına ev sahibliyi edəcəyi münasibətilə təbriklərini çatdıran nazir Uilyam Heyq ölkəsinin Londonda keçirilmiş Yay Olimpiya Oyunlarını uğurla təşkil etdiyini və bu sahədə Böyük Britaniyanın öz təcrübəsini Azərbaycan ilə bölüşməkdən məmnun olacağını diqqətə çatdırmışdır.

Azərbaycanın enerji məsələlərində rolunun yüksək qiymətləndirildiyini deyən Uilyam Heyq NATO çərçivəsində əməkdaşlığa və Əfqanıstanda həyata keçirilən əməliyyatlara verdiyi töhfələrinə görə təşəkkürünü ifadə etmişdir.

Azərbaycanın Birləşmiş Krallıq ilə enerji sahəsində əməkdaşlığının uğurla həyata keçirildiyini qeyd edən nazir Elmar Məmmədyarov sərmayə qoyuluşu, turizm, təhsil kimi digər sahələrdə əlaqələrin daha da inkişaf etdirilməsi üçün geniş imkanların olduğunu bildirmişdir.

Ermənistan-Azərbaycan, Dağlıq Qarabağ münaqişəsinin həlli ilə bağlı danışıqlar prosesi haqqında məlumat verən E.Məmmədyarov problemin həlli üçün, ilk növbədə, Ermənistan silahlı qüvvələrinin işğal etdiyi Azərbaycan torpaqlarından çıxarılmasının zəruriliyini vurğulamış və hərtərəfli sülh müqaviləsinin hazırlanması üzrə fəaliyyətə başlamağın vacib olduğunu diqqətə çatdırmışdır.

Uilyam Heyq ikitərəfli münasibətlərin daha da inkişaf etdirilməsinin hər iki ölkənin maraqlarına cavab verdiyini bildirərək rəsmi Londonun Dağlıq Qarabağ münaqişəsinin həlli ilə əlaqədar ATƏT-in Minsk qrupunun fəaliyyətini dəstəklədiyini və münaqişənin sülh yolu ilə həllinin tərəfdarı olduğunu qeyd etmişdir.

Azərbaycan. - 2013.- 5 sentyabr.- S. 10.