Avropa İttifaqı ilə əməkdaşlığın inkişaf etdirilməsi Azərbaycanın xarici siyasət prioritetlərindəndir

Sentyabrın 3-də Azərbaycanın xarici işlər naziri Elmar Məmmədyarov Londona səfəri çərçivəsində Böyük Britaniya parlamentində Britaniya-Azərbaycan parlamentlərarası dostluq qrupunun, həmçinin Lordlar və İcmalar palatalarının xarici əlaqələr və enerji məsələləri üzrə komitələrinin üzvləri ilə görüşmüşdür.

Görüşdə Elmar Məmmədyarov ölkəmizin sosial-iqtisadi inkişafı, son illərdə bütün sahələrdə əldə etdiyi nailiyyətlər, uğurlu beynəlxalq əlaqələri, xüsusilə ikitərəfli və çoxtərəfli formatda Azərbaycan-Böyük Britaniya əməkdaşlığının inkişafı barədə danışmışdır.

Ermənistan-Azərbaycan, Dağlıq Qarabağ münaqişəsi və bu problemin həlli ilə əlaqədar danışıqlar prosesi haqqında məlumat verən E.Məmmədyarov rəsmi Bakının mövqeyini görüş iştirakçılarının diqqətinə çatdırmışdır. Münaqişənin həlli üçün, ilk növbədə, Ermənistan qoşunlarının Azərbaycanın işğal olunmuş ərazilərindən çıxarılmasının vacibliyi vurğulanmışdır.

Elmar Məmmədyarov Azərbaycan iqtisadiyyatının, xüsusilə qeyri-neft sektorunun uğurla inkişaf etdiyini və son illər ərzində müşahidə olunan yüksək iqtisadi artım tempinin davamlı xarakter aldığını söyləmişdir.

Nazir Azərbaycan və Böyük Britaniya arasında münasibətlərin hazırkı səviyyəsini yüksək qiymətləndirərək enerji sahəsində əməkdaşlığın ikitərəfli əlaqələrin inkişafında mühüm rol oynadığını qeyd etmişdir.

Azərbaycanın Gürcüstan və Türkiyə ilə regional əməkdaşlığı genişləndirdiyini deyən xarici siyasət idarəsinin rəhbəri Bakı-Tbilisi-Qars dəmiryolu layihəsini, Bakı-Tbilisi-Ceyhan neft və Bakı-Tbilisi-Ərzurum qaz boru kəmərlərini regionun davamlı inkişafına mühüm töhfə kimi qiymətləndirmişdir.

Nazir qonşu dövlətlərlə yanaşı, Avropa İttifaqı ölkələri ilə əməkdaşlıq əlaqələrinin inkişaf etdirilməsinin Azərbaycanın xarici siyasət prioritetlərindən biri olduğunu diqqətə çatdırmışdır.

Britaniya-Azərbaycan parlamentlərarası dostluq qrupunun sədri Kristofer Pinçer Azərbaycanın xarici işlər naziri ilə Britaniya parlamentində görüşdən məmnunluğunu bildirmiş, ətraflı məlumata görə Elmar Məmmədyarova təşəkkür etmişdir.

K.Pinçer dostluq qrupunun fəaliyyəti və Azərbaycan Respublikasının Milli Məclisi ilə əməkdaşlığı haqqında məlumat vermişdir.

Görüşdə nazir E.Məmmədyarov Azərbaycan-Böyük Britaniya münasibətləri və hazırda BMT gündəliyində olan aktual məsələlərə dair sualları cavablandırmışdır.

Azərbaycan. - 2013.- 5 sentyabr.- S. 10.