Azərbaycan iqtisadiyyatının enerji sektoru ölkə ilə yanaşı, regionun da inkişafına böyük töhfə verir

Sentyabrın 3-də Azərbaycanın xarici işlər naziri Elmar Məmmədyarov Londondakı Beynəlxalq Strateji Tədqiqatlar İnstitutunda ölkəmizə və regionumuza maraq göstərən beynəlxalq ekspertlərlə görüşmüşdür.

Elmar Məmmədyarov Azərbaycanın xarici siyasətinin prioritetləri, dünya dövlətləri və beynəlxalq təşkilatlar, xüsusilə də Avropa İttifaqı və NATO ilə əməkdaşlığı, o cümlədən Azərbaycan-Böyük Britaniya əlaqələri haqqında ətraflı məlumat vermişdir.

E.Məmmədyarov Azərbaycan iqtisadiyyatının enerji sektorunun ölkəmizlə yanaşı, regionun da inkişafına böyük töhfə verdiyini qeyd etmişdir. Azərbaycanın qeyri-neft sektorunun inkişafı üçün də geniş potensialın olduğunu deyən nazir ölkəmizin son illərdə bu sahəyə mühüm sərmayələr yatırdığını diqqətə çatdırmışdır. Xarici siyasət idarəsinin rəhbəri Azərbaycanın qonşu dövlətlərlə və Avropa İttifaqı ölkələri ilə əməkdaşlığının daha da genişləndirilməsində maraqlı olduğunu bildirmişdir.

Ermənistan-Azərbaycan, Dağlıq Qarabağ münaqişəsindən danışan nazir problemin regionun inkişaf potensialının tam şəkildə istifadə edilməsi üçün ən ciddi maneə olduğunu vurğulamışdır.

Sonra görüş iştirakçılarının sualları cavablandırılmışdır.

Azərbaycan. - 2013.- 5 sentyabr.- S. 10.