Müasir gəncliyimizlə fəxr edirik

ASAİF-in XI Yay Forumu xaricdə təhsil alan gənclərimizə gələcək karyeraları üçün əlverişli imkanlar yaratdı

Avqustun 30-dan sentyabrın 1-dək Bakıda "Bizim forum, bizim seçim, bizim Azərbaycan" devizi altında Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumu - ASAİF-in (Azerbaijani Students and Alumni International Forum) XI Yay Forumu keçirildi. Bu forumda dünyanın 45 ölkəsindən 600-dən çox gənc toplaşmışdı. Hazırda xaricdə təhsil alan və eyni zamanda xarici ölkələrin universitetlərinin məzunu olmuş gənclərimiz arasında böyük bir şəbəkə yaradan ASAİF Bakı forumunda da tələbələr, məzunlar üçün əlverişli imkanlar yaratdı.

Bir ölkənin gələcək potensialının güclənməsi dedikdə əlbəttə ki, bunu gənc nəsil olmadan düşünmək mümkün deyil. Bu gün Azərbaycanın öz gənc nəslinə qoyduğu sərmayə sabah ölkəmizin inkişafı şəklində geri dönəcəkdir. Məhz insan kapitalına qoyulan sərmayə gələcəyə yönəlmiş ən effektli yatırım sayılır. Azərbaycanın gəncləri dünyanın inkişaf etmiş ölkələrinin ən yaxşı universitetlərində dövlət hesabına təhsil almaqdadırlar. Hər il yüzlərlə gənc bu imkanı əldə edir. ASAİF-in Bakı forumuna toplaşmış gənclər də Azərbaycanın güclənməsi, dünyada söz sahibi olan dövlətə çevrilməsi üçün bir araya gəlirlər. Həm ASAİF üzvləri, həm də forum iştirakçıları bu tədbiri yüksək dəyərləndirirlər.

Xaricdə təhsil alan gənclərimiz ASAİF-in Bakı forumundan maksimum dərəcədə yararlandılar

Ramin HƏKİMOV,

ASAİF-in sədri, Böyük Britaniyanın York Universitetinin beynəlxalq əlaqələr və siyasət fakültəsinin məzunu:

- ASAİF-in Bakıda keçirilən XI Yay Forumu çox möhtəşəm alındı. Forumda iştirak edən gənclər dünyanın ən yaxşı universitetlərində təhsil alan və məzun olan seçilmiş kadrlar idi. Üçgünlük tədbirin məqsədi xarici ölkələrdə təhsil alan gənclərin şəbəkələşmə prosesini gücləndirmək, ortaq azərbaycançılıq dəyərləri ətrafında birləşərək respublikamızın xaricdə təbliğinin daha səmərəli təşkilində, informasiya mübadiləsində, təbliğat işinin interaktiv qurulmasında gənclərimizə kömək etməkdir. Hesab edirəm ki, gənclər Bakı forumundan çox razı qaldılar.

Forumda çox maraqlı mövzular müzakirə edildi. Panellərdə müzakirə olunan mövzular ətrafında diskussiyalar tələbələrə öz fikirlərini bildirməyə yaxşı imkanlar yaratdı. Biz çalışırıq ki, yeniliklər edək. Xaricdə təhsil alan gənclərimiz bu forumlardan maksimum dərəcədə yararlanmağa çalışırlar. 600 nəfərdən artıq gəncin iştirak etdiyi forumda əsas yeniliklərdən biri də bu il "2007-2015-ci illərdə Azərbaycan Gənclərinin Xaricdə Təhsili üzrə Dövlət Proqramı" çərçivəsində xaricdə təhsil alan gənclərin azad şəkildə birbaşa tədbirə dəvətli olması idi.

Bizim məqsədimiz bəllidir! Çalışırıq ki, tələbə və məzunlar arasında şəbəkələşmə prosesini daha da gücləndirək. Həmçinin, əldə edilən uğurlar barəsində gəncləri məlumatlandıraq. Diaspor və lobbiçilik fəaliyyətinin genişləndirilməsi, Ermənistan-Azərbaycan, Dağlıq Qarabağ münaqişəsi ilə bağlı reallıqların xarici ölkələrdə təbliğ olunması fəaliyyətimizin əsas istiqamətləridir.

Tamamilə fərqli və səmimi bir atmosferdə keçirilən forumda müxtəlif mövzular ətrafında müzakirələr aparıldı. Təşkil olunan panellərdə gənclər öz təkliflərini azad və sərbəst şəkildə ifadə edə bildilər. Forumda gənclər arasında sorğu keçirildi və bu sorğuların nəticəsinə uyğun olaraq ümumiləşdirmə aparıldı. Həmin təkliflər yığılaraq müvafiq qurumlara təqdim olunacaq.

Gənclərin əksəriyyəti gələcəkdə təcrübəli və ixtisaslı kadrlar kimi mühüm vəzifələrdə çalışacaqlar

Rauf MƏRDİYEV,

"İrəli" İctimai Birliyinin sədri:

- ASAİF-in ənənəvi yay forumları bir-birindən fərqlənir. Bu tədbirə 600-dən artıq azərbaycanlı gəncin toplaşması forumun uğurunu göstərir. Onların hamısı xaricdə təhsil almış və hazırda təhsilini davam etdirən gənclərdir. Bu gənclərin böyük əksəriyyəti gələcəkdə Azərbaycanda təcrübəli və ixtisaslı kadrlar kimi mühüm vəzifələrdə çalışacaqlar. Bu baxımdan onların şəbəkələşməsi və birləşməsi çox yaxşı haldır.

Bu tədbirin müsbət cəhətlərindən biri odur ki, forum ailə mühiti yaradır, hər kəsi bir araya gətirir. Tədbirdə iştirak edən gənclər öz üzərlərində dövlətin qayğısını, diqqətini, etimadını hiss edirlər. Gənclərimizin onları maraqlandıran məsələləri və sualları rəsmilərlə birgə müzakirə edə bilmələri çox mühüm amildir.

XI Yay Forumunun açılış mərasimində "İrəli" İctimai Birliyinin və ASAİF-in birgə reallaşdırdıqları "İnsan resursları təlimi"nin iştirakçılarına sertifikatlar təqdim olundu. Bu hadisə hər iki təşkilatın birgə keçirdiyi uğurlu layihələrdəndir. Ümid edirik ki, belə layihələr bundan sonra da olacaq.

Forum ümumrespublika gənclər hərəkatının genişlənməsinə böyük töhfə verəcək

Anar TAHİROV,

Ukrayna Azərbaycanlı Gənclər Birliyinin sədri:

- ASAİF-in bütün forumlarının məqsədi birdir. Bakı forumunda da məqsəd xaricdə təhsil alan, məzun adını qazanmış gəncləri birləşdirmək və bunun vasitəsilə Azərbaycanı dünyada layiqincə təmsil etmək idi. Hesab edirəm ki, təşkilat üzərinə düşən vəzifəni layiqincə yerinə yetirdi. Xaricdə təhsil alan, eləcə də xarici ölkələrdə oxumağa hazırlaşan gənclərimiz Bakı forumunda çox mühüm məlumatlar topladılar. Gənclər təkcə forumun panellərində deyil, istirahət vaxtları da bir-biri ilə tanış olub gələcək karyeraları ilə bağlı müzakirələr aparırdılar. Forum ümumrespublika gəncər hərəkatının genişlənməsinə böyük töhfə verəcək.

ASAİF öz fəaliyyəti dövründə uğurlu nəticələr əldə edib. Builki forumun formatında fərqli cəhətlər var idi. Əvvəllər bir sıra xarici ölkələrdə azərbaycanlı gənclərin təhsil almasını təsəvvür etmək çox çətin idi. Artıq sıralarımız genişlənməkdədir. XI Yay Forumuna Yaponiya, Koreya Respublikası, Çin, Yeni Zelandiya, Malayziya, Sinqapur və digər dövlətlərdən gənc alimlərin qatılmasını ASAİF-in fəaliyyətinin uğurlu nəticəsi kimi qiymətləndirmək olar. Hər bir ASAİF nümayəndəsinin düşüncəsində yüksək bilik qazanmaqla yanaşı, Azərbaycanın təmsili, vətənin inkişafı və çiçəklənməsi vardır. Bu gün ASAİF sıralarında gənc həkimlər, politoloqlar, iqtisadçılar, psixoloqlar, hüquqşünaslar, genetiklər, mühəndislər, riyaziyyatçılar, bioloqlar və bir çox digər nüfuzlu ixtisaslara malik yüksək səviyyəli gənclər var.

Hesab edirəm ki, ASAİF-in Bakı forumunun nəticəsi olaraq hər bir gənc lobbiçilik və diaspor fəaliyyətlərini uğurla davam etdirərək, ölkəmizi narahat edən problem ətrafında dünya ictimaiyyətini məlumatlandıracaq, müstəqil Azərbaycanın yüksək imicinin formalaşdırılması işinə öz töhfələrini verəcək.

Tədbir əslində, bizim karyera forumumuz oldu

Əli ƏLİYEV,

Türkiyə Cümhuriyyətinin Hacettepe Universitetinin iqtisadi və idarəetmə elmləri fakültəsinin tələbəsi:

- ASAİF Azərbaycanın xaricdə təhsil alan və məzunu olan gənclərini öz ətrafına toplayan bir qurumdur. Sayımız on mini keçib. Artıq demək olar ki, dünyanın hər bir yerində azərbaycanlı tələbə təhsil alır. ASAİF həmin tələbələri bir araya gətirərək ölkəmizin dünyada təbliğatının aparılmasını təşkil edir. Azərbaycanın dünyaya tanıdılmasında keçirdiyimiz forumların böyük əhəmiyyəti var.

ASAİF-in bütün ölkələrdə demək olar ki, koordinatorları var. Qurum Azərbaycanın əlamətdar tarixi günləri, mədəniyyəti və digər önəmli hadisələri ilə bağlı tədbirlər keçirir. Azərbaycanın mətbəxi, adət-ənənəsi, ərazisi və atributları haqqında xüsusi bukletlər hazırlanaraq paylanılır. Bir növ ASAİF Azərbaycan tarixinin təqdimatını aparır. ASAİF-in missiyası xaricdə təhsil alan bütün azərbaycanlı tələbələri bir araya gətirmək, şəbəkələşmə yaratmaq və dövlətimizin uğurlarını dünyaya yaymaqdır.

Azərbaycan tələbələri təhsil almağa yollananda artıq özlərini tək hiss etmirlər. ASAİF daim onların yanındadır və istənilən an problemlərini həll etməyə qadir olan bir qurumdur. XI Yay Bakı Forumu əslində, bizim karyera forumumuz oldu. Çünki tələbələr yayda Bakıya qayıtdıqdan sonra öz gələcək karyeralarını harada quracaqları ilə əlaqədar maraqlanırlar. Bu forumlarda onlar üçün maraqlı olan dövlət məmurları, şirkət rəhbərləri iştirak edir, tələbələrin suallarını cavablandırırlar.

ASAİF üzvləri Azərbaycanın gənc elçiləridirlər

Ayaz SALMANOV,Ukrayna Azərbaycan Gənclər Birliyinin həmtəsisçisi, Azərbaycan Respublikası Dağlıq Qarabağ bölgəsinin Azərbaycanlı İcması İctimai Birliyinin Beynəlxalq əlaqələr şöbəsinin müdiri, siyasi elmlər üzrə fəlsəfə doktoru:

- Uzun illərdir ki, ASAİF-in fəal üzvlərindən biriyəm. Mütəmadi olaraq görüşlər keçiririk və belə forumların təşkilinə çalışırıq ki, gənclərə istənilən məsələlərdə dəstək olaq. Hər il yay aylarında təşkil olunan forumlarda gənclər öz problemlərini, istək və təkliflərini səsləndirirlər və dövlət rəsmiləri bu işlərdə onlara yardımçı olurlar. ASAİF-in forumlarının keçirilməsində məqsəd xaricdə təhsil alan gənclər arasında bağlılıq yaratmaqdır.

ASAİF gənclərlə dövlət rəsmiləri arasında körpü rolunu oynayır və yeni əlaqələr formalaşdırır. Forum çərçivəsində biznes strukturlarının nümayəndələri ilə tələbələr arasında görüş keçirilir. Bu əlaqələr gənclərin xaricdə təhsillərini başa vurub Azərbaycana qayıtdıqdan sonra dövlət strukturlarında, biznes mərkəzlərində özlərinə karyera qurmaları üçün yaxşı imkan yaradır. ASAİF də bu tip forumların təşkilindən maksimum yararlanmağa çalışır.

Bütün forumlarda Ermənistan-Azərbaycan, Dağlıq Qarabağ münaqişəsinə xüsusi diqqət yetirilir. Çünki bu bizim yaralı yerimizdir və nə qədər ki, münaqişə həll olunmayıb biz gənc olaraq münaqişə ətrafında dünyaya bir elçi kimi məlumatları çatdırmalıyıq. Buna görə də xaricə təhsil almağa yollanan gənclərimiz oxuduqları ölkədə Azərbaycan həqiqətlərini lazımi səviyyədə təbliğ etmələri üçün dolğun informasiya ilə təmin edirik. Hesab edirəm ki, ASAİF-in Bakı forumunda iştirak edən hər bir gənc gələcək karyerası üçün böyük uğur əldə edə bildi.

Azərbaycan. - 2013.- 5 sentyabr.- S. 9.