Sivilizasiyaların kəsişdiyi məkan

Bu gün Azərbaycan, xüsusən də paytaxt Bakı bir çox önəmli beynəlxalq tədbirlərin, forumların keçirildiyi məkana çevrilib. Dünyanın bir sıra qlobal problemləri Bakıda müzakirə edilir. Cənubi Qafqazı əhatə edən istənilən layihənin Azərbaycanın maraqlarını və təşəbbüslərini nəzərə almadan həyata keçirilməsi mümkün deyil. Bütün bunlar ölkəmizin dünyada artan nüfuzunun, eyni zamanda, iqtisadi imkan və potensial baxımından bölgənin aparıcı respublikası olmasının göstəricisidir.

Həqiqətən Azərbaycan çox mühüm, möhtəşəm beynəlxalq tədbirlərin keçirildiyi məkana çevrilməkdədir. Bu tədbirlərin keçirilməsi Azərbaycana beynəlxalq təşkilatlar tərəfindən göstərilən yüksək diqqətin ifadəsidir. Amma bu yüksək diqqətin göstərilməsi üçün səbəb Azərbaycanın, Bakı şəhərinin yüksək inkişafıdır, burada lazımi infrastrukturların yaradılmasıdır. Bütövlükdə isə bu, ölkəmizin dünya siyasətində rolunun yüksəlməsi ilə bilavasitə əlaqədardır.

Nazirlər Kabinetinin 2013-cü ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında çıxış edən dövlət başçısı bu məsələyə xüsüsi olaraq toxunmuşdur. Prezident bildirmişdir ki, keçən rübdə Azərbaycanda bir neçə mötəbər beynəlxalq tədbir keçirilmişdir. Bu da Azərbaycanın, Bakının dünya miqyasında bir siyasi, iqtisadi, mədəni mərkəzə çevrilməsinə xidmət göstərmişdir. İlk növbədə Bakıda keçirilən Dünya İqtisadi Forumuna (Davos Forumu) toxunan dövlət başçısı qeyd etmişdir ki, bu, ölkəyə verilən böyük dəyər kimi qiymətləndirilməlidir. Çünki Davos Forumu dünya miqyasında bir nömrəli siyasi və iqtisadi forumdur. Forum Azərbaycanda ən yüksək səviyyədə keçirilmişdir: "Bütövlükdə deyə bilərəm ki, son bir neçə il ərzində Azərbaycan Davosda keçirilən forumlarda fəal iştirak edir və diqqət mərkəzində olur. Azərbaycanın inkişaf dinamikası, əldə edilmiş uğurlar Davos Forumunda kifayət qədər geniş işıqlandırılır. Davos Forumunun hesablamalarına görə Azərbaycan dünya miqyasında iqtisadiyyatın rəqabətqabiliyyətliliyinə görə 46-cı yerdədir. Bu qiymətləndirmə hesab edirəm ki, ən ciddi və ən böyük diqqətə layiq olan qiymətləndirmədir. Çünki bu, dünyanın bir nömrəli forumu tərəfindən verilən qiymətləndirmədir. Bu forumun Azərbaycanda keçirilməsi bir daha demək istəyirəm ki, böyük uğurumuz idi. Xüsusilə nəzərə alsaq ki, forumun mövzusu Qafqaz və Orta Asiyada gedən proseslər, iqtisadi və siyasi vəziyyətlə bağlı idi. Yəni, bu, bir daha göstərir ki, Azərbaycan nəinki coğrafi mərkəzdir, siyasi, iqtisadi və mədəni mərkəzdir".

Azərbaycan son vaxtlar özünün tolerantlığı, humanitar məsələlərə diqqət göstərməyi ilə beynəlxalq ictimaiyyətin və təşkilatların diqqətini cəlb edib. Təkcə Bakı deyil, ölkənin digər bölgələrinin də bu cür yüksək səviyyəli tədbirlərə hazır olduğunu da vurğulamaq olar. Qəbələdə beynəlxalq səviyyəli mədəni tədbirlərin, hətta dövlətlərarası görüşün keçirildiyi də buna misaldır.

Dövlət başçısı çıxışında daha sonra bildirmişdir ki, çox böyük nüfuza malik olan siyasətçiləri, ictimai xadimləri birləşdirən Madrid Klubunun, federal və ştatlar səviyyəsində olan 300-dən çox senator, konqresmen, ictimai xadim, politoloqun iştirak etdiyi Amerika-Azərbaycan konfransının Bakıda keçirilməsi də böyük hadisədir.

Bu cür tədbirləri keçirməklə, konfranslara ev sahibliyi etməklə Azərbaycan öz təcrübəsini daha da artırır və bunun da nəticəsidir ki, bu gün Azərbaycanın təcrübəsi dünya tərəfindən diqqətlə öyrənilir. Respublikamız artıq dünyanın inkişaf etmiş ölkələri sırasına daxil olmaq ərəfəsindədir.

Prezident İlham Əliyev onu da diqqətə çatdırmışdır ki, keçən rübdə Bakıda İkinci Dünya Mədəniyyətlərarası Dialoq Forumunun keçirilməsi Azərbaycanın humanitar sahədə, yəni dinlərarası, mədəniyyətlərarası dialoqun aparılması üçün bir mərkəz kimi formalaşmasına öz xidmətini göstərmişdir: "Bu, ikinci forumdur. Onu deməyə əsas verir ki, bu, artıq ənənəvi xarakter daşıyacaqdır. Azərbaycanda bu səpkidən olan tədbirlər vaxtaşırı keçirilir. Dünya Humanitar Forumu, Mədəniyyətlərarası Dialoq Forumu, digər tədbirlər, dünya dinlərinin liderlərinin zirvə görüşləri keçirilmişdir. Yəni, ölkəmiz siyasi, iqtisadi və humanitar mərkəzə çevrilibdir. Bu, reallıqdır və bu reallığı biz yaratmışıq öz siyasətimizlə, öz addımlarımızla. Bu gün Azərbaycan dünya miqyasında çox böyük hörmətə malik olan bir ölkədir. Əlbəttə ki, bu, bizi çox sevindirir və bu, bizim məqsədimiz idi".

Beynəlxalq forumların ölkəmizdə keçirilməsi Azərbaycan iqtisadiyyatında və digər sahələrdə gedən mütərəqqi dəyişikliklərin beynəlxalq aləm tərəfindən qəbul olunmasıdır. Belə forumlar Azərbaycana bütün cəhətlərdən siyasi dividend qazandırır. Ölkəmizə müsbət imic gətirməklə Azərbaycana yönəlmiş bəzi bəd əməllərin qarşısının alınması üçün yaxşı bir sədd olur. Belə forumların Bakıda keçirilməsi Azərbaycan iqtisadiyyatının, xüsusən də qeyri-neft sektorunun sürətli inkişafı nəticəsində dünyanın diqqətinin ölkəmizə yönəldiyini bir daha təsdiqləyir və Azərbaycanın dünya birliyi tərəfindən etibarlı tərəfdaş kimi qəbul olunmasını sübut edir.

Onu da vurğulayaq ki, tarixdə ilk dəfə 2015-ci ildə Avropa Olimpiya Oyunları Bakıda keçriləcək. Bu isə bir daha sübut edir ki, dünya dövlətləri sırasında nüfuzu artan Azərbaycana inam daha da artıb. Demək olar ki, 2015-ci ildə ilk dəfə baş tutacaq bu oyunlar ölkəmizdə həyata keçirilən siyasətin uğurlarından, Azərbaycanın Avropada artan nüfuzundan xəbər verir. Azərbaycan hökuməti bu tədbiri təşkil etməklə ölkəmizin müasir tarixinin çox şanlı səhifəsini yazacaq. Bütün bunlar Azərbaycanın mənafeyinə xidmət edir. Azərbaycan artıq nəinki beynəlxalq tədbirlərə ev sahibliyi edir, hətta bu sahədə yeni ənənələrin yaranmasının təşkilatçısı kimi də çıxış edir. Azərbaycan Cənubi Qafqaz regionunda həm inkişaf səviyyəsinə, həm ictimai-siyasi sabitliyə, həm də dünyada gedən proseslərə verdiyi töhfəyə görə irəlidə gedən ölkədir. Ölkəmizin sürətli inkişaf yoluna qədəm qoyması və dünya birliyində etibarlı tərəfdaşa çevrilməsi beynəlxalq aləmin diqqət mərkəzindədir. Məsələn, ABŞ-ın Stratfor Qlobal Araşdırmalar Mərkəzinin təsisçisi və rəhbəri Corc Fidman Azərbaycanla yaxından tanışlıqdan sonra deyib: "Yaxın gələcəkdə ABŞ-ın ən yaxın müttəfiqi Azərbaycan olacaqdır. ABŞ-ın müttəfiqləri sayılan Avropa ölkələri dərin iqtisadi böhran içindədirlər. Bu qitədəki dövlətlərin mövqeləri qətiyyən uzlaşmır. Bu, NATO-nun beynəlxalq hərbi-siyasi təşkilat kimi gücünü zəiflədir. Ona görə də ABŞ-a Azərbaycan kimi davamlı iqtisadi inkişafa malik olan müttəfiq lazımdır".

Sivilizasiyaların kəsişdiyi məkanda yerləşən, mədəniyyətlərarası dialoqa töhfələrini əsirgəməyən ölkəmizin fəaliyyəti beynəlxalq səviyyədə layiqincə qiymətini alır. Əldə olunan uğurların möhkəmləndirilməsi və ölkəmizin davamlı, dayanıqlı inkişafının təmin olunması məqsədilə Prezident İlham Əliyevin fərmanı əsasında təsdiqlənən "Azərbaycan 2020: gələcəyə baxış" İnkişaf Konsepsiyası perspektiv vəzifələrin və onların həlli yollarının aydın müəyyən olunmasına xidmət edir. Əsas məqsəd ölkənin qüdrətini daha da artırmaq, beynəlxalq münasibətlər sistemində yeri və rolunu möhkəmləndirmək, sosial rifahı yüksəltmək, bir sözlə, Azərbaycanın inkişaf etmiş ölkələr sırasında addımlamasını təmin etməkdir.

Beləliklə, beynəlxalq toplantıların, forumların, sərgilərin, idman yarışlarının Bakıda keçirilməsi həm Azərbaycan Prezidenti İlham Əliyevin apardığı uğurlu siyasi fəaliyyətin müsbət nəticəsi, həm də dövlətimizə olan böyük maraq və etimaddır. Artıq dünya dövlətlərinə bəllidir ki, Azərbaycan iqtisadi cəhətdən sabit, inkişaf edən ölkələrdən biridir. Prezident İlham Əliyevin yeni dövrün tələblərinə uyğun, zamanın nəbzini tutmaqla həyata keçirdiyi düşünülmüş, sürətli və davamlı inkişaf konsepsiyasının nəticəsi olaraq Azərbaycan iqtisadi sahədə keçid dövrünü başa vurub. Bu gün özünün uzunmüddətli inkişaf strategiyasının istiqamətlərini müəyyən edən Azərbaycan dünya miqyasında iqtisadi artım sürətinə görə ön sıralarda gedərək islahatçı ölkə kimi tanınır.

Rəşad BAXŞƏLİYEV

Azərbaycan. - 2013.- 5 sentyabr.- S. 9.