Ermənistan tərəfindən işğal olunmuş Azərbaycan ərazilərində talançılıq davam edir

Azərbaycan Qiymətləndiricilər Cəmiyyəti Ermənistanın təcavüzkar siyasəti və işğal edilmiş torpaqlarımızda törətdikləri talançılıq əməllərini daim araşdıraraq həqiqəti ortalığa çıxarmağa çalışır.

Cəmiyyətdən AzərTAc-a bildirmişlər ki, araşdırmalar nəticəsində bir sıra əcnəbi şirkətlərin işğal bölgəsində fəaliyyəti ilə bağlı məlumatlar əldə edilmişdir.

Diqqətə çatdırılmışdır ki, ermənilər işğal etdikləri ərazilərdən qiymətli təbii sərvətləri istismar etməyə hələ XX əsrin 90-cı illərinin sonundan başlamışlar. Son vaxtlar Azərbaycanın Ermənistan ilə sərhəd bölgəsində zəngin qızıl yataqlarında qanunsuz fəaliyyət daha da artmışdır. Azərbaycanın işğal olunmuş Dağlıq Qarabağ bölgəsindəki separatçı rejimin rəhbərləri Ermənistan mətbuatına verdiyi açıqlamada dağ-filiz sənayesinin perspektivli olduğunu bildirmişlər.

Ermənistan Azərbaycan ərazilərində belə qanunsuz hərəkətlərini davam etdirərək bəzi xarici şirkətləri də bu işə cəlb edə bilmişdir. Əldə olunan məlumatlara əsasən, Avstraliyanın "İnternational Base Metals Limited" şirkəti ermənilərlə qanunsuz olaraq Azərbaycan ərazilərində iş birliyi yaratmışdır. İşğalçı ermənilərlə sövdələşən bu şirkət işğal olunmuş Azərbaycan ərazilərində qeyri-qanuni fəaliyyətini davam etdirərək bu təbii ehtiyatları Avropa bazarına çıxarmağa çalışır. Bu da Ermənistan tərəfinin beynəlxalq səviyyəli növbəti hüquqazidd addımlarından biridir.

Həmçinin Kanadanın "First Dynastry Mines" şirkəti də belə qanunsuz fəaliyyətlə məşğuldur.

Azərbaycan. - 2013.- 5 sentyabr.- S. 9.