Əmək və əhalinin sosial müdafiəsi naziri Hacıqabulda bölgə sakinlərini qəbul etmişdir

Prezident İlham Əliyevin tapşırıq və tövsiyələrinə əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin həllinə kömək edirlər.

AzərTAc xəbər verir ki, sentyabrın 6-da əmək və əhalinin sosial müdafiəsi naziri Fizuli Ələkbərov Hacıqabul şəhərindəki Heydər Əliyev Mərkəzində Hacıqabul, Şirvan, İmişli, Neftçala, Saatlı, Sabirabad, Salyan və Beyləqan rayonlarından olan 80-ə yaxın vətəndaşı qəbul etmişdir.

Qəbulda vətəndaşların müraciətləri əsasən ünvanlı dövlət sosial yardımı, əlillik arabasının alınması, əmək müfəttişliyi, əlillik qruplarının təyinatı, məşğulluq və digər şəxsi məsələlərlə bağlı olmuşdur.

Nazir Fizuli Ələkbərov müraciətlərdə qaldırılan məsələlərin qısa müddətdə araşdırılaraq obyektiv, ədalətli şəkildə və qanun çərçivəsində həll edilməsi barədə müvafiq struktur bölmələrinə tapşırıqlar vermişdir.

Vətəndaşların Əmək və Əhalinin Sosial Müdafiəsi Nazirliyinə aid olan müraciətlərindən bəziləri elə yerindəcə öz həllini tapmışdır. Digər məsələlərin nazirlikdə araşdırılaraq müsbət həll ediləcəyi bildirilmişdir.

Nazirliyin səlahiyyətlərinə aid olmayan digər müraciətlər isə müvafiq qurumlara çatdırılması üçün qeydiyyata alınmış və nəzarətə götürülmüşdür.

Azərbaycan. - 2013.- 7 sentyabr.- S. 5.