Bakıda «Birgə Cəmiyyətlər – 2014» Forumuna hazırlıq məsələləri müzakirə edilmişdir

Sentyabrın 6-da Bakıda Diasporla İş üzrə Dövlət Komitəsinin (DİDK) dəstəyi, Nizami Gəncəvi Beynəlxalq Mərkəzinin və Madrid Klubunun təşkilatçılığı ilə keçirilən beynəlxalq toplantı çərçivəsində mətbuat konfransı olmuşdur.

AzərTAc xəbər verir ki, tədbirdə Latviya, Finlandiya, Hollandiya, Şri-Lanka və digər ölkələrin keçmiş dövlət və hökumət başçıları, həmçinin bir sıra nüfuzlu beynəlxalq qurumların rəhbərləri iştirak etmişlər.

Diasporla İş üzrə Dövlət Komitəsinin sədri Nazim İbrahimov mətbuat konfransında çıxış edərək cari ilin mayında Bakıda keçirilmiş Birinci Cənubi Qafqaz Forumunun əhəmiyyətini və onun ölkəmizdə təşkil olunan tədbirlər arasında özünəməxsus yerini diqqətə çatdırmışdır.

N.İbrahimov ölkəmizin qadın hüquqları, insan hüquqları, demokratik dövlət quruculuğu istiqamətində mühüm yol qət etdiyini vurğulamışdır. Müsəlman Şərqində ilk dəfə olaraq qadınların azadlığı, onlara səsvermə hüququnun Azərbaycanda verildiyini diqqətə çatdıran Nazim İbrahimov hazırda sürətlə inkişaf edən Azərbaycanın bu mötəbər tədbirin keçirilməsi üçün məkan kimi seçilməsinin bir çox məsələlərin həllinin ölkəmizdə reallaşdırılmasına verilən inamın göstəricisi olduğunu demişdir. Bildirmişdir ki, biz bu tədbirləri yüksək səviyyədə keçirməklə bir daha bütün dünyaya Azərbaycanın demokratiya yolunda inamla irəlilədiyini, ölkəmizdə vətəndaş cəmiyyəti quruculuğu prosesinin sürətlə getdiyini əyani surətdə nümayiş etdirmək istəyirik.

Nizami Gəncəvi irsinin beynəlxalq tədqiqatçılar tərəfindən bir daha ciddi surətdə araşdırılmasının vacibliyini bildirən DİDK-nın sədri dahi şairin bütün dünya kitabxanalarında, müxtəlif ölkələrdə olan əlyazmalarının bir daha öyrəniləcəyini diqqətə çatdırmışdır.

Azərbaycan xalqının qonaqpərvərliyini xüsusi vurğulayan Nazim İbrahimov ölkəmizdə bu foruma diqqətin çox yüksək olduğunu bildirmişdir.

Latviya Respublikasının sabiq prezidenti, Nizami Gəncəvi Beynəlxalq Mərkəzinin həmsədri, Madrid Klubunun üzvü xanım Vayra Vike-Frayberqa Azərbaycanın Avropanın enerji təhlükəsizliyinə töhfə verdiyini qeyd edərək neft-qaz ixracının ölkələrin inkişafındakı roluna diqqət yetirmişdir. Səsvermə hüquqları, çoxmilli, çoxmədəniyyətli cəmiyyətlərdə təhsil sistemi məsələlərindən danışan Vayra Vike-Frayberqa cəmiyyətdə qarşıya çıxan problemlər və onların qarşısının alınması istiqamətində görülən işlərdən danışmışdır. Azərbaycanın çox böyük təbii sərvətlərə malik olduğunu vurğulayan natiq ölkə rəhbərliyinin bu mənbələrdən gələn gəlirin sosial sahəyə yönəldilməsi sahəsindəki uğurlu siyasətini yüksək qiymətləndirmişdir.

Bu görüşün "Birgə Cəmiyyətlər - 2014" Forumuna hazırlıq məqsədi daşıdığını qeyd edən Niderland Krallığının sabiq baş naziri, Madrid Klubunun prezidenti Vim Kok yenidən Bakıda toplaşdıqları üçün məmnunluğunu bildirmişdir. Toplantı çərçivəsində bir sıra vacib məsələlərin müzakirə olunduğunu diqqətə çatdıran V.Kok cəmiyyətimizin gündən-günə dəyişərək inkişaf etdiyini, Niderland Krallığında da müxtəlifliyin mövcudluğunu vurğulamışdır. O, ölkəsində demokratiyanın hökm sürdüyünü, qadın və kişilərin bərabər hüquqlara malik olmasının güclü hüquqi baza əsasında tənzimləndiyini diqqətə çatdırmışdır.

Niderland Krallığına qonşu ölkələrdən miqrasiya edənlərin sayının artdığını vurğulayan V.Kok müsəlman ölkələrindən gələnlərin sayının xüsusilə çoxaldığını bildirmişdir. Ölkəsində hökumətlə müsəlman və yəhudi komitələri arasında sağlam əməkdaşlıq mühitinin qurulduğunu vurğulayan sabiq prezident sabit və sağlam cəmiyyət qurulmasının onun üçün əsas prioritetlərdən olduğunu qeyd etmişdir. V.Kok ikigünlük toplantı çərçivəsində dini, mədəni fərqliliklərlə bağlı müzakirələr aparıldığını, birgə çalışmaqla müxtəlif məsələlərin həllinə nail olmağın mümkünlüyünü qeyd etmişdir.

Misirin İsgəndəriyyə Kitabxanasının direktoru və Nizami Gəncəvi Beynəlxalq Mərkəzinin həmsədri İsmail Serageldin toplantının maraqlı keçdiyini, faydalı müzakirələrin aparıldığını bildirmişdir. O demişdir ki, belə tədbirlərin keçirilməsi qadınların rolunun gücləndirilməsi, etnik, dini azlıqların qorunması, müştərək cəmiyyətlərin inkişaf etdirilməsi işinə mühüm töhfələr verəcəkdir.

Konfransda Cənubi Qafqazda münaqişələrin həlli, qadınların cəmiyyətdə fəallığının artırılması, mədəniyyətlərarası və dinlərarası dialoq, 2015-ci ildən sonrakı Minillik İnkişaf Proqramı kimi mövzular müzakirə edilmişdir.

Tədbirdə Nizami Gəncəvi Beynəlxalq Mərkəzi və Madrid Klubu, eləcə də Beynəlxalq Dialoq və Əməkdaşlıq Mərkəzi arasında gələcək əməkdaşlıq haqqında saziş imzalanmışdır.

Sazişi Bolqarıstanın sabiq prezidenti Peter Stoyanov və Diasporla İş üzrə Dövlət Komitəsinin sədri Nazim İbrahimov imzalamışlar.

Tədbirdə "Nizami obrazları xalçalarda" kitabının təqdimatı da olmuşdur. Kitabın müəllifi professor Röya Tağıyevadır. Nəşrini isə Miniatür Kitab Muzeyinin yaradıcısı və rəhbəri, əməkdar incəsənət xadimi Zərifə Salahova həyata keçirmişdir.

Azərbaycan. - 2013.- 7 sentyabr.- S. 7.