Muğam televiziya müsabiqəsinin beşinci həftəsi maraqlı ifalarla yadda qalmışdır

Xəbər verdiyimiz kimi, Heydər Əliyev Fondunun dəstəyi və Azərbaycan Mədəniyyət Fondunun layihəsi əsasında Beynəlxalq Muğam Mərkəzində IV muğam televiziya müsabiqəsi keçirilir.

AzərTAc xəbər verir ki, artıq beşinci həftədir ki, davam edən muğam televiziya müsabiqəsinin budəfəki seçim mərhələsi də rəngarəng ifalarla yadda qalmışdır.

Avqustun 6-dan başlanan IV muğam televiziya müsabiqəsinin bu həftəyə olan ikinci seçim turunda 9 ifaçı mübarizə aparmışdır. Lirik-psixoloji, emosional təsir gücünə malik muğam yenidən dinləyiciləri öz cazibəsinə salmışdır. Hər həftəsi sevinc, həyəcan və rəqabətlə keçən müsabiqənin tamaşaçı auditoriyası da gündən-günə genişlənir.

"Təbiət hər zaman təkrarsız canlandığı kimi, muğam sənəti də heç bir sərhədlərə sığışmayan, azad, özü-özündən bəhrələnən bir sənətdir. Muğam sənəti əsrlər boyu Azərbaycan xalqının milli tanıtma nişanlarından biri kimi mədəni irsimizin əsas hissəsini təşkil edir. Bu mənada bizi millət kimi qoruyub saxlayan bu mənəvi irsi, mədəniyyəti yaşatmaq və təbliğ etmək hər birimizin mənəvi borcudur". Bu dəyərli fikirlərin müəllifi Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, milli muğam sənətimizin himayədarı Mehriban Əliyevadır. Məhz onun təşəbbüsü ilə ərsəyə gələn muğam televiziya müsabiqəsi istedadlı gənclərə göstərilən diqqət və qayğının bariz nümunəsidir.

Əsl muğam bayramına çevrilən IV muğam televiziya müsabiqəsi həftədə iki dəfə - çərşənbə axşamı və cümə axşamı keçirilir. Müsabiqənin bütün konsertləri Azərbaycan Televiziyası və "Mədəniyyət" kanalı ilə canlı yayımlanır.

Azərbaycan. - 2013.- 7 sentyabr.- S. 8.