Yeni infrastruktur layihələri Qaxın turizm potensialını da gücləndirir

Ötən son on ildə ölkəmizin yol-nəqliyyat infrastrukturu əsaslı şəkildə yenilənib. İstər Azərbaycan ərazisindən keçən beynəlxalq avtomobil magistralları, istərsə də şəhərlər və rayonlararası yollar müasir standartlara uyğun yenidən qurulur. Qeyd edək ki, qəsəbə və kəndlərarası yollar da diqqətdən kənarda qalmır.

Qax rayonuna bu dəfə yeni açılmış Şəki-Qax-Zaqatala avtomobil yolu ilə getdik. Tamamilə yenidən qurulan bu müasir və rahat avtomobil yolunun istifadəyə verilməsi münasibətilə avqustun 16-da tədbir keçirilib. 35 kilometrlik ikizolaqlı avtomobil yolu Şəkinin 28 mindən çox əhalisi olan 21 və Qax rayonunun 2 mindən yuxarı əhalisi olan 6 yaşayış məntəqəsini birləşdirir. Onu da öyrəndik ki, yeni avtomobil yolu Şəki-Qax arasında əvvəlki 77 kilometrlik marşrut məsafəsini 42 kilometr qısaldıb. Yolun üzərindəki müasir və yaraşıqlı körpülər, yolboyu keçib getdiyimiz abad və baxımlı kəndlər insanda xoş duyğular oyadır. Hiss edirsən ki, ölkənin sosial-iqtisadi inkişafı bu yerlərin də dirçəlişinə əsaslı şəkildə təsir edir.

Qısa vaxt ərzində Qaxa çatırıq. Qaxın mərkəzi səliqəli və gözəldir. Müasir tikililərlə qədim memarlığın vəhdəti, yaşıllıqlar, küçələrin və yolların rahatlığı ilk baxışdan diqqəti çəkir.

Avqust ayı Qax üçün əlamətdar olub. Təməli 2008-ci il 19 sentyabrda qoyulan Olimpiya İdman Kompleksinin tikintisi başa çatdırılaraq istifadəyə verilib. Kompleksin 480 tamaşaçı tutumu olan idman zalı, 410 yerlik üzgüçülük hovuzu var. Burada müasir dünya standartlarına uyğun hər cür şərait yaradılıb. Bu Olimpiya İdman Kompleksində gələcəyin Avropa, dünya və Olimpiya çempionları yetişəcək. Qax sakini, əlbəyaxa döyüş üzrə dünya çempionatının finalçısı Ramil Məmmədlinin dediklərindən: "Bu gün Azərbaycan dünyada idman dövləti kimi tanınır və idmançılarımız ölkəmizi beynəlxalq yarışlarda layiqincə təmsil edirlər, bayrağımızı uca zirvələrə qaldıraraq himnimizi səsləndirirlər".

R.Məmmədli onu da qeyd etdi ki, tanınmış idmançılar yetişdirməklə yanaşı, bu kompleks gənclərin sağlam ruhda böyüməsinə xidmət edəcəkdir.

Qaxda Heydər Əliyev Mərkəzinin açılışı da əlamətdar hadisə kimi yaddaşlara yazıldı. Tikintisinə 2011-ci ilin noyabrında başlanılan bu mərkəz qaxlıların ümummilli liderin xatirəsinə dərin ehtiramının nümunəsidir. Mərkəzin möhtəşəm binası şəhərin gözəlliyini daha da artırır.

Qax şəhər sakinlərinin çoxdan gözlədiyi gün də gəlib çatıb. Şəhərin su təchizatı və kanalizasiya sistemləri istifadəyə verildi.

Mütəxəssislərin bildirdiyinə görə, Qax şəhərinin su təchizatı sistemi ötən əsrin 60-cı illərinin sonunda yaradılıb. İndiyə qədər şəhər sakinləri Kürmük və Qumçay çaylarının, həmçinin subartezian quyularının sularından istifadə ediblər. Paylayıcı su xətləri olan yerlərdə gün ərzində 4-6 saat fasilələrlə su verilib, olmayan yerlərdə isə tələbat fərdi qaydada ödənilib.

İndiki halda İlisu kəndinin yaxınlığındakı bulaqlardan Qax şəhərinə çəkilən su həm yeni qurulmuş, həm də əvvəlki şəbəkə vasitəsilə fasiləsiz verilir.

Onu da öyrəndik ki, "Qax şəhərinin su təchizatı və kanalizasiya sistemlərinin yenidən qurulması layihəsi" perspektiv inkişaf nəzərə alınmaqla, Qax şəhərində 14 min nəfərin su təchizatı və kanalizasiya xidmətlərinin, Qaxbaş və Qaxingiloy kəndlərində isə 7,5 min nəfərin içməli su təchizatının yaxşılaşmasına hesablanıb.

Qeyd edək ki, Qaxın içməli su probleminin həlli turizmin inkişafına da təsirini göstərəcək. Aldığımız məlumata görə, hazırda Qaxda 11 turizm obyekti fəaliyyət göstərir.

Qaxın "İçəribazar" Turizm Mədəniyyət Mərkəzində turistlərə nümunəvi xidmət üçün hər cür şərait yaradılıb. Elə istirahət obyektlərində də turistlərin asudə vaxtlarının səmərəli təşkili üçün müvafiq tədbirlər planı mövcuddur.

Rayonun tarixi və görməli yerlərinə gəzintilərin təşkili üçün mədəniyyət və turizm şöbəsində 6 marşrut hazırlanıb. Qeyd edək ki, Qaxda kənd turizminin inkişafına da diqqət yetirilir. Turistlər əsasən İlisu, Ağçay, Qaşqaçay, Armudlu, Ləkit və Qum kəndlərində istirahətə üstünlük verirlər.

Turizm infrastrukturunun genişləndirilməsi ilə bağlı işlər davam etdirilir. Tikilməkdə olan yeni turizm kompleksləri də nəzərə alınmaqla obyektlərdə yerlərin sayı rayon üzrə 700-ə çatdırılmalıdır.

Ümumilikdə Qax yeni inkişaf mərhələsini yaşayır. Fərəhli haldır ki, həm tarixilik, milli-memarlıq xüsusiyyətləri qorunur, həm də müasir inkişaf xətti sistemli şəkildə davam etdirilir. Bunun üçün dövlət də yetərincə öz qayğısını göstərir.

Azərbaycan. - 2013.- 10 sentyabr.- S. 6.