Ceyms UORLİK: 20 ildən artıq bir müddətdə çəkilən əziyyətə son qoymağın vaxtı çatmışdır

İyirmi ildən artıq bir müddətdə çəkilən əziyyətə son qoymağın vaxtı çatmışdır. Bu sözləri ATƏT-in Minsk qrupunun yeni təyin olunmuş amerikalı həmsədri Ceyms Uorlik sentyabrın 10-da Bakıda keçirdiyi mətbuat konfransında söyləmişdir.

Ermənistan-Azərbaycan, Dağlıq Qarabağ münaqişəsinin Helsinki Yekun Aktına əsasən həllinin vacibliyini vurğulayan C.Uorlik bölgənin gələcəkdə çiçəklənməsi üçün davamlı sülhə nail olmaq məqsədi ilə birgə çalışmağın əhəmiyyətini vurğulamışdır. C.Uorlik demişdir ki, atəşkəs haqqında müqavilənin imzalanmasının 20 illiyinin yaxınlaşdığı bir vaxtda, hesab edirəm ki, davamlı sülhə və inkişafa gətirib çıxaran yolların axtarılıb tapılması lazımdır. Hazırda əsas məqsədim tərəfləri dinləmək, onlardan məlumat almaqdır. Mən Minsk qrupunun digər həmsədrləri ilə birlikdə davamlı sülhə nail olmaq üçün realizmə və praqmatizmə əsaslanaraq fəaliyyət göstərmək niyyətindəyəm.

Amerikalı diplomat yaxın vaxtlarda Vyanada ATƏT-in baş katibi, daha sonra Nyu-Yorkda BMT Baş Məclisinin 68-ci sessiyası çərçivəsində fransalı və rusiyalı həmkarları ilə görüşəcəyini diqqətə çatdırmışdır.

C.Uorlik Bakının gözəl şəhər olduğunu, paytaxtın qədim və müasir memarlıq nümunələrinin onda dərin təəssürat yaratdığını vurğulamışdır.

Azərbaycan. - 2013.- 11 sentyabr.- S. 6.