AÇG-nin səmt qazından necə
istifadə olunur?
"Azəri-Çıraq-Günəşli"
(AÇG) yataqlarından çıxarılan səmt
qazının bir hissəsi layların təzyiqini
saxlamaq üçün
yenidən kollektora vurulur.
Xeyli hissəsi isə Azərbaycanın daxili istifadəsi üçün
"Azəriqaz" dövlət qaz şəbəkəsinə
ötürülür.
BP
Azərbaycan şirkətindən aldığımız məlumatda
bildirilir ki, bu ilin birinci
yarısında "Dərinsulu Günəşli"
platformasından hasil edilən səmt
qazı 28 düymlük sualtı kəmər vasitəsilə
birbaşa Səngəçal
terminalına nəql olunub. Buradan
isə mavi yanacaq
"Azəriqaz" şəbəkəsinə göndərilib.
"Azəri"
yatağındakı üç platformadan - "Mərkəzi Azəri"dən,
"Qərbi Azəri"dən və "Şərqi Azəri"dən
səmt qazı yataqdaxili kəmərlərlə
"Mərkəzi Azəri"dəki Kompressor
və Suvurma Platformasına (KvəSP) nəql
edilib. KvəSP-dən isə onun bir hissəsi yenidən
kollektora vurulub. Qalan hissəsi yataqdaxili borularla 28 düymlük kəmərə qovuşdurularaq
yenə də onun vasitəsilə Səngəçal
terminalına çatdırılıb. Buradan
isə "Azəriqaz"a təhvil verilib.
Sözügedən məlumatda bildirilir ki, hazırda "Mərkəzi Azəri"də
beş quyudan laya qazvurma əməliyyatları
davam edir.
"Çıraq"
platformasında hasil edilmiş
səmt qazının bir hissəsini ARDNŞ-nin "Neft
Daşları"ndakı kompressor
stansiyasına 16 düymlük kəmər
gətirir.
Bu ilin birinci yarısında AÇG-dən ARDNŞ-ə
gündə təxminən 6,7 milyon kubmetr, yaxud 236 milyon standart kubfut səmt qazı təhvil verilib.
Yarım ildə verilmiş səmt
qazının həcmi 1,21 milyard kubmetr (42,7 milyard kubfut) təşkil edib. Bu isə 2013-cü ildə ARDNŞ-ə təhvil
verilməsi planlaşdırılan həcmə az qala bərabərdir. Belə ki, bütün il üçün plan 1,24 milyard kubmetr
və ya 44 milyard standart kubfutdur.
Xatırladaq ki, AÇG layihəsinin iştirakçıları BP (o, həm də operatordur), ARDNŞ, "Şevron",
"İnpeks", "Statoyl",
"EksonMobil", TPAO, "İtoçu", ONGC Videş
Limited şirkətləridir. Hesablanıb ki, potensial olaraq
AÇG müqavilə sahəsindən
ümumilikdə 5 milyard
bareldən çox neft çıxarılacaq.
Bu, dünyada işlənən nəhəng
layihələrdən biridir.
İndiyədək AÇG-dən 2,1 milyard
barel neft hasil olunub.
AÇG bir neçə mərhələdə
işlənməkdədir.
Belə ki, "Çıraq"
yatağından karbohidrogenlər
İlkin Neft Layihəsi çərçivəsində
çıxarılır. Buradan hasilat 1997-ci ilin noyabr ayında əldə olunub.
"Faza 1" adlanan mərhələ "Mərkəzi
Azəri"ni əhatə edir. "Azəri" yatağının bu hissəsi 2005-ci ilin əvvəlindən neft verir. "Faza
2"yə isə yatağın
qərb və şərq hissələrinin
işlənməsi daxildir.
"Qərbi Azəri"dən 2006-cı ilin
yanvarında, "Şərqi
Azəri"dən həmin
ilin oktyabrında ilk neft alınıb.
"Faza 3"ü əhatə
edən "Dərinsulu
Günəşli"dən hasilata 2008-ci ilin aprelində
başlanıb.
AÇG-nin işlənməsinin növbəti
mərhələsi "Çıraq
Neft Layihəsi"dir
(ÇNL). Layihə çərçivəsində
bütövlüklə Azərbaycanda
inşa edilmiş və yaxın günlərdə Xəzərdə
quraşdırılacağı gözlənilən "Qərbi
Çıraq" platformasından
bu ilin sonunda
neft və səmt qazı alınacaq.
Flora
SADIQLI
Azərbaycan. - 2013.- 11 sentyabr.- S. 11.