MDB Müşahidə Missiyasının üzvləri Mərkəzi Seçki Komissiyasında olmuşlar

MDB Müşahidə Missiyasının üzvləri Vladimir Qorkun və Yevgeni Slobada sentyabrın 10-da Mərkəzi Seçki Komissiyasında (MSK) sədr Məzahir Pənahov ilə görüşmüşlər.

Mərkəzi Seçki Komissiyası Katibliyinin media və ictimai əlaqələr şöbəsindən bildirmişlər ki, qonaqları salamlayan MSK-nın sədri müşahidəçilik institutunun seçkilərin şəffaflığı baxımından böyük əhəmiyyətə malik olduğunu qeyd edərək missiyanın üzvlərini Azərbaycanda görməkdən məmnun olduğunu söyləmişdir.

Müşahidə missiyasının üzvü V.Qorkun bildirmişdir ki, seçkiqabağı vəziyyəti izləmək üçün MDB Müşahidə Missiyasının 20 nəfərlik heyəti Azərbaycana gələcəkdir. Missiyanın tərkibinə 300 nəfər qısamüddətli müşahidəçilər də daxil olacaqlar. O, seçkilərin hazırlanıb keçirilməsi ilə bağlı görülən işlər barədə suallar vermiş və gələcəkdə həyata keçirilməsi nəzərdə tutulan layihələrlə maraqlanmışdır.

Qonaqlara 2013-cü il oktyabrın 9-na təyin edilmiş prezident seçkilərinin hazırlanıb keçirilməsi ilə bağlı atılmış addımlar və planlaşdırılan tədbirlər barədə ətraflı məlumat verilmişdir.

AzərTAc

Azərbaycan. - 2013.- 11 sentyabr.- S. 9.