Gəncədə
«Dövlət-din münasibətləri və maarifləndirmə
işi» mövzusunda regional konfrans keçirilmişdir
Sentyabrın
10-da Gəncə şəhərində Dini
Qurumlarla İş
üzrə Dövlət Komitəsinin (DQİDK) təşkilatçılığı,
respublikanın qərb bölgəsində fəaliyyət
göstərən dini icma
sədrlərinin, eləcə də fəal dindar
və ilahiyyatçıların iştirakı ilə
"Dövlət-din münasibətləri və maarifləndirmə işi" mövzusunda regional konfrans keçirilmişdir.
Əvvəlcə
konfrans iştirakçıları ümummilli lider Heydər
Əliyevin Gəncə şəhərində abidəsini və
Şəhidlər xiyabanını ziyarət etmişlər.
Regional konfransı
giriş sözü
ilə açan Dini Qurumlarla İş üzrə
Dövlət Komitəsinin sədri Elşad
İskəndərov Gəncədəki toplantının Azərbaycanın
müxtəlif bölgələrini əhatə edəcək analoji silsilə
tədbirlərin yeddincisi olduğunu
diqqətə çatdırmışdır. Komitə sədri
regional konfransın əsas məqsədinin
dövlət-din münasibətlərinin daha
yüksək səviyyədə tənzimlənməsi, dini maarifləndirmə işinin
təşkili və aparılması, həmçinin dini icmaların cəmiyyətdə radikalizm meyillərinin qarşısının
alınması və sosial problemlərin
həlli prosesinə cəlb edilməsindən ibarət olduğunu diqqətə çatdırmışdır.
DQİDK-nın
sədri dövlətin din siyasətinin pozitiv dünyəvilik prinsipləri əsasında
qurulduğunu vurğulayaraq
son illərdə bu
istiqamətdə görülmüş
işlərdən söhbət açmışdır. Bildirmişdir ki,
2003-2013-cü illər ərzində ölkədə 216 məsciddə
inşa və
əsaslı təmir, yenidənqurma işləri
aparılmış, o cümlədən
dövlət vəsaiti hesabına 10 məscid tikilmiş
və ya əsaslı bərpa olunmuşdur.
Dövlət
Komitəsinin sədri bu istiqamətdə ümummilli lider Heydər
Əliyevin müstəsna xidmətlərini qeyd
etmişdir. O, hazırda milli-mənəvi
dəyərlərimizin, dinimizin
inkişafı üçün həyata
keçirilən tədbirləri diqqətə çatdırmışdır. Qeyd etmişdir ki, bu gün
ölkəmizdə dinlərarası münasibətlər ən
yüksək səviyyədədir. Hər kəsin dini etiqad
azadlığı vardır. Lakin bununla yanaşı, milli-mənəvi dəyərlərimizin
tərkib hissəsi olan, o
cümlədən ölkə əhalisinin əksəriyyətinin
etiqad etdiyi islam dini və mədəniyyətinin
təbliği prioritet məsələlərdəndir.
Yalnız iki faktı - tariximizin və milli-mənəvi dəyərlərimizin
daşıyıcısı olan
Şamaxı Cümə məscidi və siz
gəncəlilərin və Azərbaycan xalqının inanc yeri olan
"İmamzadə" kompleksinin təmir-bərpasını
göstərməklə bunun əyani şahidi oluruq.
Gəncə
Şəhər İcra Hakimiyyətinin
başçısı Elmar Vəliyev belə
bir tədbirin təşkilinə görə
Dini Qurumlarla İş üzrə Dövlət Komitəsinə
təşəkkürünü bildirmişdir.
Vurğulamışdır ki, ölkəmizdə
milli-mənəvi dəyərlərimizə verilən yüksək
qiymət dövlətimizin bu sahəyə
olan diqqət və
qayğısının təzahürüdür.
Milli Məclisin
deputatları Qənirə Paşayeva və
Asəf Hacıyev Azərbaycanda din
sahəsində maarifləndirmə prosesinin
müasir tələblərə
uyğunlaşdırılmasında bu cür konfransların mütəmadi
keçirilməsinin zəruriliyindən söz
açmışlar.
Konfransda
çıxış edən yerli din xadimləri və dindarlar
bildiriblər ki, xüsusən də son bir ildə dini maarifləndirmə sahəsində geniş işlərin aparılması, dini icmalarla müntəzəm
sıx əlaqələrin qurulması, ilk
dəfə olaraq dini
icmaların sosial layihələrə cəlb
olunması, dindarlar arasında vətənpərvərlik
hissinin, tolerantlıq ənənələrinin
təbliği sahəsində həyata keçirilən kompleks tədbirlər diqqətəlayiqdir. Bu baxımdan DQİDK tərəfindən dəstəklənən
"Qazi Qarabağ
azanı" layihəsi, "Axund və imamlar üçün
xütbə vəsaiti" və Milli
Tolerantlıq Mərkəzinin yaradılması xüsusi
qeyd olunmalıdır.
Həmçinin
DQİDK-nın dini icmalar
üçün təlim kursları təşəbbüsü
dindarlar tərəfindən dəstəklənmişdir.
Qeyd olunmuşdur ki, belə yüksək səviyyəli tədbirlər
təkcə dövlət-din münasibətlərinin inkişaf etdirilməsinə, dindarların
maarifləndirilməsinə deyil, həmçinin
ölkə dindarlarının dövlətə
etimadının daha da
artmasına xidmət edir.
Regional konfrans
çərçivəsində, ümumilikdə dörd paneldə 12 məruzə dinlənilmişdir.
Din xadimləri, dindarlar,
ilahiyyatçılar müxtəlif mövzularda
fikir mübadiləsi aparmışlar.
Tədbir
çərçivəsində regional
konfransın iştirakçıları "İmamzadə"
kompleksini ziyarət etmişlər.
AzərTAc
Azərbaycan. - 2013.- 11 sentyabr.- S. 10.