Azərbaycan ilə İsveçrə arasında iqtisadi əlaqələrin daha da inkişaf etdirilməsi üçün böyük zəmin vardır

Sentyabrın 11-də Azərbaycan Respublikası Milli Məclisinin sədr müavini Bahar Muradova İsveçrə Konfederasiyasının ölkəmizdə yeni təyin olunmuş səfiri Paskal Obişer ilə görüşmüşdür.

AzərTAc xəbər verir ki, səfirə gələcək fəaliyyətində uğurlar arzulayan Bahar Muradova ölkələrimiz arasındakı dostluq əlaqələrinin tarixindən söhbət açmış, iqtisadi, humanitar və mədəni əməkdaşlığımızı yüksək dəyərləndirmişdir. O, Azərbaycan-İsveçrə parlamentlərarası işçi qrupunun rəhbəri kimi diqqətə çatdırmışdır ki, ali qanunverici orqanlarımız arasındakı mövcud əlaqələrin inkişafında dostluq qruplarının xüsusi rolu vardır.

Milli Məclisin sədr müavini Azərbaycan parlamentinin işi, qanunvericilik bazası, deputatların və komitələrin fəaliyyəti, qarşıdan gələn prezident seçkilərinə hazırlıq prosesi barədə ətraflı məlumat vermişdir. Ölkələrimizin beynəlxalq təşkilatlarda qarşılıqlı fəaliyyətinə toxunan Bahar Muradova ATƏT-in Parlament Assambleyası çərçivəsində İsveçrənin daim Azərbaycanın haqlı mövqeyini dəstəklədiyini qeyd etmişdir. Bahar Muradova demişdir: "Azərbaycan İsveçrənin balanslı və dinc siyasətini hər zaman təqdir edir. Biz Dağlıq Qarabağ münaqişəsinin həlli istiqamətində atılan addımlarda bu ölkənin dəstəyinə böyük ümidlər bəsləyirik".

Bahar Muradova Azərbaycanın qaçqın və məcburi köçkünlərlə bağlı problemlərinin həllində İsveçrə təşkilatlarının göstərdiyi yardımlara görə minnətdarlığını da bildirmişdir.

Səmimi görüşə və ətraflı məlumata görə təşəkkürünü bildirən Paskal Obişer ölkələrimiz arasında iqtisadi əlaqələrin daha da inkişaf etdirilməsi üçün böyük zəmin olduğunu vurğulamış, regionda neft və təbii qaz ixracatı ilə bağlı həyata keçirilən qlobal layihələrdə qarşılıqlı əməkdaşlıqdan danışmışdır.

Diplomat ölkəsinin gələn ildən etibarən ATƏT-in Parlament Assambleyasına sədrlik edəcəyi dönəmdə Dağlıq Qarabağ münaqişəsinin həlli istiqamətində əhəmiyyətli irəliləyişlərin olacağına ümidvar olduğunu bildirmişdir. O, oktyabrın 9-da keçiriləcək prezident seçkilərində Azərbaycana uğurlar diləmişdir.

Görüşdə, həmçinin qarşılıqlı maraq doğuran bir sıra məsələlər müzakirə olunmuşdur.

Azərbaycan. - 2013.- 12 sentyabr.- S. 7.