Dövlət Sosial Müdafiə Fondunun sədri Masallıda vətəndaşları qəbul etmişdir

Dövlət Sosial Müdafiə Fondunun (DSMF) sədri Səlim Müslümov sentyabrın 11-də bu qurumun Masallı rayon şöbəsinin inzibati binasında Biləsuvar, Cəlilabad, Masallı, Astara, Yardımlı, Lerik və Lənkəran rayonlarının sakinlərini qəbul etmişdir.

AzərTAc xəbər verir ki, qəbulda iştirak edən vətəndaşların xüsusi ayrılmış nəqliyyat vasitələri ilə həmin şəhər və rayon şöbələrinin inzibati binalarının qarşısından DSMF-nin Masallı rayon şöbəsinə gətirilmələri təmin olunmuşdur.

"Açıq qapı" şəraitində keçirilən qəbulda vətəndaşların müraciətləri diqqətlə dinlənilmişdir. Vətəndaşların müraciətləri əsasən pensiyaların yenidən hesablanmasının bir sıra hüquqi aspektləri, pensiya təyinatı, eləcə də stajla bağlı olmuşdur.

Bütün müraciətlər operativ surətdə araşdırılmış, onların bir qismi yerindəcə həll edilmişdir. Bəzi müraciətlər isə araşdırma tələb etdiyindən müvafiq tədbirlərin görülməsi məqsədilə şəhər və rayon şöbələrinin rəhbərlərinə, DSMF-nin digər vəzifəli şəxslərinə tapşırıqlar verilmişdir.

DSMF-nin səlahiyyətlərinə aid olmayan məsələlərlə bağlı müraciət edən vətəndaşlara isə hüquqi və digər mümkün köməkliyin göstərilməsi üçün həmin müraciətlərin müvafiq orqanlara göndəriləcəyi bildirilmişdir.

Azərbaycan. - 2013.- 12 sentyabr.- S. 12.