Neftçi ətraf mühitin qayğısına qalır

Neft və ekologiyaE Əvvəllər bu sözlərin qoşa işlədilməsinə çox nadir hallarda rast gəlmək olardı. İndi isə neftin kəşfiyyatı, hasilatı, ixracı ilə bağlı olan hər yerdə ekologiya məsələləri də önəm kəsb edir.

Dənizdə işləyən şirkətlər onun suyunun və faunasının qorunmasının qayğısına qalırlar. Qurudakı müəssisələr isə torpağın çirklənməməsinə səy göstərirlər. Neft və qaz kəmərləri çəkilərkən onların ətraf mühitə ziyan vurmaması üçün böyük layihələr işlənib hazırlanır. Bütün bunlarla bərabər, vaxtilə neftlə çirklənmiş ərazilər təmizlənir, həmin yerlərdə yaşıllıqlar salınır. Suyu, torpağı, havanı neft layihələrinin mənfi təsirlərindən müdafiə etmək bu gün heç də təkcə ekoloqların deyil, karbohidrogenlərlə məşğul olan şirkətlərin - istər yerli olsun, istərsə də xarici - özlərinin başlıca məqsədinə çevrilib.

Deyilənlərin əyani şahidi olmaq üçün "Abşeronneft" Neft və Qazçıxarma İdarəsinin yerləşdiyi ərazini gəzmək kifayətdir. Məlumdur ki, "Abşeronneft" əsasən köhnə yataqları istismar edir. Yataqların bəziləri Pirallahı adasındadır, bəziləri isə baş alıb dəniz boyu "addımlayır". Onilliklərdir neft və qaz verən quyular ətraf mühitə də öz təsirini göstərib. Bunları aradan qaldırmaq üçün son vaxtlar idarədə ardıcıl tədbirlər həyata keçirilib. İndi Xəzərdən baş qaldıran buruqların ətrafında qu quşlarının üzdüyünü görəndə əvvəlcə təəccüblənirsən, sonra bir anlığa düşünüb bunların ətraf mühitin sağlamlığına yönəldilmiş tədbirlərin nəticəsi olduğunu dərk edərək sevinirsən.

"Abşeronneft"də ekoloji mühitin müdafiəsinə istiqamətlənən işlər ardıcıllıqla davam edir. Əsas tədbirlərdən biri dəniz suyunu saflaşdıran "ƏKS-OSMOS" qurğularının işə başlamasıdır. Təkcə bu ilin birinci yarısında həmin qurğular 14 min kubmetrdən çox suyu təmizləyib və müxtəlif ünvanlara göndəriblər. Ekoloji məqsədlərə yönəldilmiş digər tədbirlər isə müxtəlif ölçülü neft kollektorlarında, qaz xətlərində, sexlərdə və neftyığma məntəqələrində təmir işlərinin aparılması, neftlə çirklənmiş, yaxud lay suları ilə dolmuş gölməçələrin qurudulmasıdır.

Neft buruqları ilə qonşuluqda yamyaşıl ağacların boy atması da son dövrlərin yeni mənzərələrindəndir. Bu ilin ilk 6 ayında "Abşeronneft"in inzibati binasının həyətində yüzlərlə zeytun ağacı, qızılgül kolu, dekorativ bitki əkilib. "EKOL Mühəndislik Xidmətləri" ASC-nin ötən illərdə və bu ilin əvvəlindən əkdiyi minlərlə ağaca nümunəvi xidmət göstərilir.

"Abşeronneft" Neft və Qazçıxarma İdarəsinin ərazisində görülən bu cür tədbirlər bütövlükdə Pirallahı adasının ekoloji vəziyyətinin sağlamlaşdırılmasına öz müsbət təsirini göstərir. Məlumdur ki, Pirallahı torpağı indi paytaxtın ən gənc rayonunun mərkəzidir. Pirallahı rayonunun tərkibinə Çilov adasında yerləşən qəsəbə və Xəzərdə, polad dirəklər üstündə qurulmuş əfsanəvi dəniz şəhəri - Neft Daşları da daxildir. Yeri gəlmişkən qeyd edək ki, ekoloji tədbirlər indi neft-qaz hasilatı ilə məşğul olan digər rayonlarda olduğu kimi, burada da vüsət alıb.

Flora SADIQLI

Azərbaycan. - 2013.- 8 sentyabr.- S. 8.