Müstəqil Azərbaycanın "AZƏRBAYCAN"ı

Məlum olduğu kimi, Azərbaycan milli mətbuatının möhkəm təməlini təşkil edən böyük maarifçi Həsən bəy Zərdabinin məşhur "Əkinçi" qəzetinin yaranması ilə ölkəmizdə sivil və demokratik cəmiyyətə doğru böyük dönüş başlanmışdı. Milli mətbuat cəmiyyət həyatının bütün qatlarına işıq salmış, milli-mənəvi oyanışa təkan vermiş, cəhalətə qarşı mübarizə aparmağı gündəmə gətirmişdir. Azərbaycanın görkəmli ziyalılarını öz ətrafında birləşdirərək mübarizə cəbhəsində vahid mövqedən çıxış etmələrinin təmin olunması ilə Həsən bəy Zərdabi maarifçiliyi ideyadan hərəkat səviyyəsinə istiqamətləndirmək vəzifəsini həyata keçirmişdir.

XX əsrin ilk Azərbaycan qəzeti olan "Şərqi-Rus" (1903-1905) milli oyanış sahəsində başlanan prosesi dərinləşdirmişdir. Baş redaktor, görkəmli Azərbaycan ziyalısı Məhəmmədağa Şahtaxtlı Avropa təhsili və təcrübəsi "Şərqi-Rus"un Qərb standartları səviyyəsində çıxan Azərbaycan qəzetinə çevrilməsində mühüm rol oynamışdır. Böyük demokrat ədib Cəlil Məmmədquluzadə məşhur "Molla Nəsrəddin" məcmuəsini nəşr etməklə realist-satirik və rəngli-karikaturalı jurnalın mükəmməl nümunəsini yaratmış, ideya mübarizəsini daha da qüvvətləndirmişdir. Əlibəy Hüseynzadənin Bakıda nəşrinə nail olduğu "Füyuzat" jurnalı milli mətbuatın inkişafında romantik təmayüllü yeni hadisə idi. "Molla Nəsrəddin" və "Füyuzat" jurnalları ilə Azərbaycanda ilk dəfə olaraq mətbuat orqanı ətrafında ədəbi məktəblər formalaşmışdır. Əsasən ədəbi şəxsiyyətlər əsasında qurulan Nizami, Füzuli, Mirzə Fətəli Axundzadə məktəbləri ilə yanaşı, mətbuat orqanlarının meydana çıxardığı "Molla Nəsrəddin" və "Füyuzat" ədəbi məktəblərinin yaranması ilə ədəbiyyatın və mətbuatın müştərək iştirak etdiyi yeni tipli cərəyanlar parlamağa başlamışdır.

XX əsrin əvvəllərində ölkədə "Molla Nəsrəddin", "Füyuzat", "Şərqi-Rus" kimi müstəqil mətbuat orqanları ilə yanaşı, "Hümmət", "Bakinskiy raboçi", "Dəvət-Qoç", "Təkamül", "Yoldaş" və sair bolşevik qəzetləri, "Dəbistan", "Rəhbər", "Məktəb" kimi uşaq mətbuatı, "Həyat", "İrşad", "Təzə həyat", "Açıq söz" səviyyəsində milli ruhlu mətbuat nümunələri, "Zənbur", "Kəlniyyət", "Babayi-Əmir" tipli satirik nəşrlər meydana çıxmış, habelə Bakıda rusdilli mətbuatın çap edilməsi ilə dövrün ictimai-siyasi və ədəbi-mətbu fikrinin genişliyini və zənginliyini nümayiş etdirmişdir.

Ancaq etiraf etmək lazımdır ki, milli istiqlal kitabı olan "Molla Nəsrəddin" jurnalı və cəmi bir neçə mətbuat orqanı istisna olmaqla XX əsrin əvvəlləri Azərbaycan mətbuat orqanlarının əksəriyyətinin arxasında məşhur Bakı sərmayədarları, yaxud da müəyyən ictimai qurumlar və partiyalar dayanırdı. Buna baxmayaraq, həmin mətbuat orqanları yeni əsrin ab-havasına uyğun olaraq ümumi ictimai fikri, milli düşüncəni ifadə etməyə çalışmış, sərbəst mövqe nümayiş etdirə bilmişdir. Bütün bunlar bütövlükdə cəmiyyət həyatında demokratik proseslərin mətbuatda əks etdirilməsinə və milli ideyaların ön cəbhəyə çəkilməsinə öz töhfəsini vermişdir.

Azərbaycan Xalq Cümhuriyyətinin orqanı olan məşhur "Azərbaycan" qəzeti ölkəmizdə birinci rəsmi dövlət qəzeti kimi milli mətbuatımızın tarixində şərəfli yer tutur.

Fikrimizcə, 1918-ci il 15 sentyabrda nəşrə başlayan "Azərbaycan" qəzetinin meydana çıxması tədricən XIX əsrin ikinci yarısından etibarən başlanan və XX yüzilliyin əvvəllərində genişlənib milli hərəkata çevrilmək proseslərini yaşayan azərbaycançılıq dalğasının məntiqi nəticəsi idi. Hələ xanlıqlar dövründə parçalanmanın törətdiyi fəlakətləri dərk edən Azərbaycan xanlarından bir çoxunun nicat yolunun ittifaqda, birlikdə olduğu qənaətinə gəlmələri azərbaycançılığın ilkin tumurcuqlarını doğurmuşdur. Bundan sonra çar Rusiyasının işğalına qarşı əks reaksiyaların nəzərə çarpması azərbaycançılıq düşüncəsinin formalaşmasında mühüm addıma çevrilmişdi. Böyük Mirzə Fətəli Axundzadənin təmiz, sadə ana dilində yazılmış və mövzusu, süjeti və obrazları ölkə həyatının reallıqlarından alınmış əsərləri, genişlənməkdə davam edən teatr hərəkatı və milli mətbuatın gündəmə gəlməsi ilə azərbaycançılıq məfkurəyə çevrilməyə başlamışdı.

Nəhayət, 1891-ci il 16 noyabrda "Kəşkül" qəzetində "Azərbaycanlı" imzası ilə çap olunmuş bir məqalədə "Siz nə millətdənsiniz" sualının qoyulması və cavabında xarici bir vətəndaşın dili ilə "Sizin millət Azərbaycandır" cavabının verilməsi ilə Azərbaycançılıq konkret bir qavrayış olaraq gündəmə gətirilmişdi. Bunun ardınca görkəmli publisist və ictimai xadim Məhəmmədağa Şahtaxtlının 1891-ci ildə "Kaspi" qəzetində çıxmış bir məqaləsində "Zaqafqaziya müsəlmanlarını azərbaycanlılar, onun dilini isə Azərbaycan dili" adlandırması ilə məsələyə elmi cavab verilmişdi. Böyük demokrat Cəlil Məmmədquluzadə də məşhur "Azərbaycan" məqaləsində (1917) sadə bir dillə "Mənim anam kimdir", "Haradır Azərbaycan" suallarına aydınlıq gətirməklə azərbaycanlılığı anlayışdan milli ideya səviyyəsinə çatdırmışdır. Bu qəbildən olan bir sıra digər addımların atılmasına baxmayaraq, azərbaycançılıq məfkurəsini açıq, ardıcıl və sistemli şəkildə inkişaf etdirmək vəzifəsi hələ də özünün tam həllini gözləyirdi.

Azərbaycan Xalq Cümhuriyyətinin yaranması azərbaycançılıq uğrunda aparılan çoxillik mübahisələrin, millət davasının, milli dövlət idealının özünütəsdiqi idi!

Şərqin ilk demokratik dövlətinin rəsmi mətbu orqanının "Azərbaycan" adlandırılması təkcə bir qəzetin deyil, bütövlükdə bir ölkənin azərbaycançılığın baş qərargahı statusunun qazanmasının rəmzi ifadəsidir!

"Azərbaycan" qəzeti - qalib gəlmiş bir ölkənin, Azərbaycan Xalq Cümhuriyyəti adlanan müstəqil bir dövlətin mətbu sözçüsü idi!

"Azərbaycan" qəzeti - müstəqillik əldə etmiş bir xalqın ölkəsi və milləti adından dil açıb danışması imkanının reallaşması demək idi!

"Azərbaycan" qəzeti - azərbaycançılığın milli ideyadan dövlət ideologiyası səviyyəsində təbliğ etməyin başlanğıcıdır!

Eyni zamanda, "Azərbaycan" qəzeti ondan əvvəl təxminən yarım əsrə yaxın bir müddət ərzində milli ziyalıların ölkənin adını daşıyan mətbuat orqanı yaratmaq, qəzet çıxarmaq təşəbbüslərinin də davamı, məntiqi nəticəsi idi. Belə ki, hələ 1891-ci ildə tanınmış Azərbaycan ziyalısı Cəlal Ünsizadənin baş redaktoru olduğu "Kəşkül" qəzeti bağlandıqdan sonra "Azərbaycan" adlı qəzet çıxarmaq üçün rəsmi olaraq Tiflisdə Baş Mətbuat İşləri İdarəsinə müraciət etmək arzusu da baş tutmamışdı. Təbrizdə Məşrutə hərəkatı dövründə nəşr edilən "Azərbaycan" qəzetinin də ömrü uzun sürə bilməmişdi. Bununla belə, XX əsrin əvvəllərinin milli mətbuatında necə adlandırılmasından asılı olmayaraq, azərbaycançı düşüncə üstün mövqeyə çıxmışdı. Nəhayət ki, XX əsrin əvvəllərində "Azərbaycan" adlanacaq mətbuat orqanını da zəmanə artıq hazırlamışdı.

Azərbaycan Xalq Cümhuriyyətinin yaranması ilə "Azərbaycan" adlı qəzetin nəşrə başlamasının reallaşması milli mətbuatımızın tarixində təkcə ərazi olaraq ölkənin deyil, milli dövlətin adını ifadə edən mətbuat orqanının fəaliyyətə başlaması ilə əlamətdardır.

Bu mənada, "Azərbaycan" qəzetinin rəsmi dövlət qəzeti kimi meydana çıxması Azərbaycan tarixinin mühüm hadisəsidir.

"Azərbaycan" qəzetinin Azərbaycan Xalq Cümhuriyyətinin mətbu orqanı olaraq çap edilməsi yeni yaranmış müstəqil dövlətin demokratik statusa malik olduğunu bəyan edən mühüm faktordur.

Qəzetə baş redaktorluq etmiş Üzeyir Hacıbəylinin "Azərbaycan" qəzeti haqqında yazdığı aşağıdakı fikirlər bu qəzetin hər hansı partiyanın deyil, bütövlükdə müstəqil dövlətin rəsmi mətbuat orqanı, Vətənin və xalqın azad söz tribunası olduğunu təsdiq edir: "Danışırlar ki, "Azərbaycan" qəzeti guya "Müsavat" partiyasına məxsus firqəvi bir qəzet imiş. Bu fəqərə barəsində bunu bəyan etməyi lazım bilirəm ki, qəzetimiz partiya qəzeti deyildir. "Azərbaycan" qəzetinin məsləki Vətən istiqlalı yolunda çalışmaqdan ibarətdir". Bu sətirlərdən aydın şəkildə görünür ki, "Azərbaycan"çılar, sözün böyük mənasında, çətin və mürəkkəb şəraitdə müstəqil Azərbaycan idealına bütün varlıqları ilə xidmət etmişlər.

"Azərbaycan" qəzeti 1918-ci il 15 sentyabr tarixdə Gəncə şəhərində nəşrə başlamış, altıncı saydan etibarən qəzetin nəşri Bakıda davam etdirilmişdir. İki dildə çıxan "Azərbaycan" qəzetinin Azərbaycan dilində 443, rus dilində isə 438 sayı çap olunmuşdur. İlk sayları "Heyəti-idarə", "Heyəti-təhririyyə" kimi "Redaksiya heyəti" mənasını ifadə edən məsul şəxslər qrupu tərəfindən çap edilən "Azərbaycan" qəzetinə müxtəlif vaxtlarda Üzeyir Hacıbəyli, Ceyhun Hacıbəyli, Xəlil İbrahim, qəzetin rus variantına isə Səfi bəy Rüstəmbəyli baş redaktorluq etmişlər.

"Azərbaycan" qəzetinin redaktorları arasında onlardan hər birinin xidmətini yüksək qiymətləndirməklə yanaşı, Üzeyir Hacıbəylinin fəaliyyətini xüsusi qeyd etməyi lazım bilirik. Əvvəla, Üzeyir Hacıbəylinin "Azərbaycan" qəzetinə redaktorluq etdiyi vaxt digərləri ilə müqasiyədə daha çoxdur. Bundan başqa, mətbuat sahəsində daha böyük təcrübəyə malik olan Üzeyir Hacıbəylinin "Azərbaycan" qəzetinin ideya-siyasi səviyyəsinin yüksəldilməsindəki və qəzetdə milli düşüncəni, istiqlal ruhunu qüvvətləndirən xəttin genişləndirilməsindəki xidmətləri yüksək qiymətə layiqdir. Azərbaycan Xalq Cümhuriyyətinin Milli Məclisinin açılması münasibətilə Üzeyir Hacıbəylinin "Azərbaycan" qəzetinin 1918-ci il 7 dekabr tarixli 58-ci sayında çap edilmiş "Tarixi günümüz" məqaləsi təkcə "Azərbaycan" qəzetinin, yaxud da "Azərbaycan"çıların deyil, bütövlükdə AXC hökumətinin və xalqın ictimai-siyasi baxışları ilə milli varlığının, vətənpərvərlik ruhunun vəhdətini özündə üzvü surətdə birləşdirir. "Bu o gündür ki, Azərbaycan türklərinin Milli Məclisi, Milli Şurası açılıb. Azərbaycan təkmil bir hökumət şəklinə girir. Yüz-yüz əlli sənə bundan əvvəl müxtəlif xanlıqlardan ibarət olan Azərbaycan torpağının rus istilasından qazandığı bir mənfəət o oldu ki, bu torpaq üzərində qurulmuş olan saxta və əməli hüquqları silinib-süpürülmüş müttəhid və vəsi bir ərazi şəklinə girdi və bu gün xilas olub da iki milyon mütəcavüz nüfus ilə Azərbaycan Cümhuriyyəti namını daşımağa kəsbi-ləyaqət etdi. Bəs bu gün haman bu Azərbaycan Cümhuriyyətinin milli parlamanı, Milli Məclisi açılmaqla təşkilat və tərtibati-siyasiyyəsi artıq itmama yetir. ...Belə olan surətdə, deməli, qəlbimizdə bəslədiyimiz ümid - parlamanımızdır. Və ümidvarıq ki, cavan parlamanımız bu ümidimizin hüsuli yolunda var qüvvəsilə çalışacaq və Vətənimizin istiqlal və azadlığına birinci səbəb olacaqdır".

"Azərbaycan" qəzetinin rus dilində nəşrinin baş redaktoru, Azərbaycan Xalq Cümhuriyyəti Milli Məclisinin deputatı Səfi bəy Rüstəmbəylinin tam bir isriqlalçı ruhu var idi. Onun sonralar 1933-cü ildə İstanbulda qələmə aldığı və hazırda Salman Mümtaz adına Ədəbiyyat və İncəsənət Arxivində saxlanılan "27 aprel 1920-ci il xatirələri" adlı yazısı AXC hökumətinin süqutunun səbəbini gerçək surətdə əks etdirən qiymətli mənbədir. Səfi bəy Rüstəmbəylinin xatirələrində deyilir: "Nəhayət, 27 aprel gecəsi saat 12-də Bakıda bütün idarə, məhəllə bolşeviklərin əlinə keçdi. Bununla aşağı-yuxarı ikiillik Milli Azərbaycan istiqlal tarixi qapandı. Fəqət, milli azəri türkünün istiqlal ruhunu əlindən ala bilmədilər. İşğal zəfərləri yarımçıq qaldı. Məmləkətin həqiqi övladlarının istiqlal uğrundakı qan ilə boyanmış və müttəhid bir kütlə halındakı gənc övladlarının hürriyyət və istiqlaliyyət ruhu ilə istiqlal hələ yürüyür. İmanın qüvvəsi, istiqlalın təbcili bizdə Bakı və Azərbaycan yaşadıqca yaşayacaq və bütün türk ellərini istiqlal ilə sevindirəcəkdir".

Dövrün görkəmli ziyalıları rəsmi dövlət orqanının ətrafında birləşərək "Azərbaycan"çıların möhkəm cəbhəsini yaratmışlar.

Bu vaxta qədər məşhur "Molla Nəsrəddin" juranalının ətrafında qüdrətli mollanəsrəddinçilər ədəbi cəbhəsi yarandığı kimi, "Azərbaycan"çılar da cümhuriyyətçilər olaraq milli istiqlal ideyası ətrafında möhkəm sıralarda birləşmişdilər.

Azərbaycançılıq, cümhuriyyətçilik və istiqlalçılıq onları birləşdirən əsas ideal idi!

Bütövlükdə "Azərbaycan" qəzetinin ideya əsasını azərbaycançılığın milli dövlətçiliklə və istiqlalçılıqla vəhdəti təşkil edirdi.

Milli mətbuatımızın tarixinə "Azərbaycan" qəzeti rəsmi dövlət qəzeti, yəni milli istiqlal əsasında yaranmış müstəqil dövlətin ideologiyasının baş qərargahı, hərəkətverici qüvvəsi vəzifələrini ləyaqətlə həyata keçirən mətbuat orqanı kimi həkk olunmuşdur.

"Azərbaycan" qəzetinin səhifələrindəki Məhəmməd Əmin Rəsulzadə, Üzeyir bəy Hacıbəyli, Ceyhun Hacıbəyli, Səfi bəy Rüstəmbəyli, Xəlil İbrahim, Məhəmmədağa Şahtaxtlı, Behbud ağa Şahtaxtinski, Həmid bəy Şahtaxtinski, Mirzə bala Məmmədzadə, Məhəmməd Hadi, Fərhad Ağazadə, Əhməd Cavad, Hacı İbrahim Qasımov, Əlabbas Müznib, Seyid Hüseyn, Ömər Faiq Nemanzadə, Ummugülsüm, Şəfiqə xanım Əfəndizadə və başqalarının məqalələri, şeirləri, elmi publisistik yazıları ilə "Azərbaycan" qəzeti Azərbaycan istiqlalının milli konsepsiyasını hazırlamışdır. Bu mənada, "Azərbaycan" qəzeti azərbaycançılıq məfkurəsini dərin mahiyyəti ilə açan, ardıcıl və sistemli şəkildə təqdim edən mətbuat tribunası olmuşdur. "Azərbaycan"çıların fikrinə görə, "Azərbaycan" məfhumu coğrafi bir mənadan ziyadə fikir və əməl şəklində təcəssüm edir. İstiqlal xaricində onun üçün bir Azərbaycan yoxdur". Beləliklə, "Azərbaycan" qəzeti azərbaycançı fikirlərin və əməllərin, istiqlal idealının qəzeti idi.

Haqlı olaraq qeyd edildiyi kimi, "Azərbaycan" qəzeti Azərbaycan Xalq Cümhuriyyətinin fəaliyyətinin mətbu salnaməsidir. "Azərbaycan" qəzetinin Gəncə və Bakı nəşrlərində Xalq Cümhuriyyəti hökumətinin həyatında baş vermiş bütün hadisələr və proseslər özünün layiqli əksini tapmışdır. Azərbaycan Xalq Cümhuriyyətinin istiqlal bəyannaməsi, AXC Milli Məclisinin işə başlaması və fəaliyyəti, Bakının Qafqaz İslam Ordusu tərəfindən azad olunması, Bakı Dövlət Universitetinin yaradılması, dövlət müstəqilliyinin ildönümünün qeyd edilməsi, hətta hakimiyyətin bolşeviklərə təhvil verilməsi zərurəti və s. kimi tarixi hadisələri bütün təfərrüatı ilə öyrənmək üşün "Azərbaycan" qəzeti mötəbər mənbədir. "Azərbaycan"çılar mövzusundan asılı olmayaraq, haqqında söz açılan məsələlərə müstəqil dövlətin formalaşdırılması və möhkəmləndirilməsi mövqeyindən yanaşır, yeni qurulmuş milli hökumətin ideyalarını və əməli addımlarını xalqa çatdırırdılar.

Görkəmli publisist Məhəmmədağa Şahtaxtlının "Azərbaycanda darülfünun" məqaləsində ölkədə universitet açılması hadisəsi müstəqil dövləti qurmağın, inkişaf etdirməyin və qorumağın mühüm vasitələrindən biri olaraq dəyərləndirilmişdir. Məhəmmədağa Şahtaxtlıya görə, "Darülfünun olmazsa... ümumi maarifə aid orta məktəblərimizdə dərs verəcək müəllimlərimiz olmaz. Naxoşlarımızı müalicə edəcək təbiblər yetişməz. Hüquqşünas alimlər bulamayız ki, mal və mülk üçün münaqişə edən vətəndaşlarımızı... mühakimə etsin... Mədəni həyatın şəraitinə və amillərinə təhdid nəzərilə baxıldıqda o dəqiqə görünür ki, bu həyatın mənbəyi, sərçeşməsi mabədəl qəvalül-darülfünundur. Darülfünundan əl çəkmək mədəni həyatdan rugərdan olmaqdır".

Bütövlükdə "Azərbaycan" qəzeti Azərbaycan milli mətbuatının böyük bir dövrünü yekunlaşdıran və müstəqil dövlətçilik idealının gələcəyinə işıq salan mətbuat orqanı kimi böyük və şərəfli yol keçmişdir. Bu yolun dərslərinin və ənənələrinin öyrənilməsi, yeni jurnalistikada yaradıcı şəkildə müasirlik mövqeyindən tətbiqi müstəqillik dövrü Azərbaycan mətbuatının inkişaf etdirilməsi üçün mühüm əhəmiyyətə malikdir.

Artıq yeni tarixi epoxada 20 ildən çoxdur ki, Azərbaycan Milli Məclisinin orqanı kimi nəşr edilən "Azərbaycan" qəzeti müstəqillik dövrünün rəsmi mətbuatının funksiyasını şərəflə və məsuliyyətlə həyata keçirir. 1992-ci ildən etibarən "Azərbaycan" qəzeti böyük sələfi olan eyniadlı qəzetin davamlı ənənələrini yaşadır və yaradıcı surətdə inkişaf etdirir, yeni ideyalarla zənginləşdirir.

Müasir mərhələdə "Azərbaycan" qəzeti mətbu sözün bütün imkanlarından bacarıqla və yaradıcılıqla istifadə edərək müstəqil Azərbaycan Respublikasının daha da möhkəmləndirilməsi və inkişaf etdirilməsinə şərəflə və məsuliyyətlə xidmət edir.

İndiki "Azərbaycan" qəzeti XXI əsrin yeni Azərbaycanının güzgüsüdür!

Rəsmi dövlət qəzeti funksiyasını yüksək səviyyədə yerinə yetirmək üçün yeni tarixi epoxada "Azərbaycan" qəzetinin seçdiyi yol, müəyyən etdiyi xətt və istiqamət milli dövlətçilik ideologiyasını rəsmi materialları operativ surətdə geniş oxucu auditoriyasına vaxtında çatdırmaqla yanaşı, həm də analitik təhlillərə, yaradıcı şərhlərə və müqayisələrə əsaslanan üslubda dövrün, zamanın sözünü deməkdən ibarətdir.

Müstəqil Azərbaycan Respublikasının həyatında baş verən dəyişikliklər, yeni dövrün inkişaf ritmləri "Azərbaycan" qəzetində bütün təbiiliyi ilə əks-səda tapır.

"AZƏRBAYCAN" QƏZETİNDƏ MÜSTƏQİL AZƏRBAYCANIN NƏBZİ DÖYÜNÜR!

"Azərbaycan" qəzeti - müstəqillik dövrü Azərbaycan oxucusunun müdrik müəllimi və etibarlı bələdçisidir!

"Azərbaycan" qəzeti - yeni Azərbaycanı müxtəlif janrlarda və fərqli üslublarda yazılmış cəlbedici, düşündürücü məqalələrlə təqdim etməyi bacaran yüksək səviyyəli mətbuat orqanıdır!

Bu mənada "AZƏRBAYCAN" QƏZETİ ÖZÜNÜN PUBLİSİSTİKA MƏKTƏBİNİ FORMALAŞDIRA BİLMİŞDİR!

Rəsmi dövlət qəzetinin ideya mövqeyini möhkəm surətdə qorumaqla cəlbedici janr və üslub etibarilə fərqli bir qəzet səviyyəsində çap etmək "Azərbaycan" qəzetinin publisistika baxımından mühüm nailiyyətidir.

Ölkəmizdə normal, hüquqi, demokratik dövlətin qurulması işində kütləvi informasiya vasitələrinin fəaliyyətinə xüsusi diqqət yetirən Azərbaycan Respublikasının Prezidenti İlham Əliyevin milli mətbuatın inkişafına göstərdiyi qayğı bütün mətbuat orqanları, kütləvi informasiya vasitələri ilə bir sırada "Azərbaycan" qəzetini də əhatə edir.

Bu gün "Azərbaycan" qəzeti Prezident İlham Əliyevin rəhbərliyi ilə iri addımlarla, böyük sürətlə inkişaf edən Azərbaycanı olduğu kimi, obyektiv şəkildə təqdim etmək yollarında bütün səylərini səfərbər edir.

Müstəqil dövlətçilik idealı mənasında "Azərbaycan" qəzeti vahid, konkret və aydın mövqeyə malik olan qəzetdir.

Azərbaycançılıq, müstəqillik, milli dövlətçiliyin möhkəmləndirilməsi, vətənpərvərlik "Azərbaycan" qəzeti üçün əqidə işidir.

Ümummilli lider Heydər Əliyevin "Azərbaycan" qəzetinin kollektivinə 1994-cü il 6 dekabr tarixdə və 1998-ci il 15 sentyabrda təbrik məktubu ünvanlaması yeni dövr milli mətbuat tariximizin böyük hadisələridir. Böyük öndərin "Azərbaycan" qəzetini yaşayan ənənələri və müasir inkişaf səviyyəsi ilə birlikdə dəyərləndirməsi bütövlükdə ölkəmizdə baş verən ictimai-siyasi proseslərdə, tarixin çətin sınaq məqamlarında, irəliyə doğru inkişafda dövlət mətbuatının vəzifələrini, rolunu və əhəmiyyətini müəyyən edən mühüm tarixi əhəmiyyətə malik olan konsepsiyadır.

Görkəmli dövlət xadimi Heydər Əliyevin "Azərbaycan" qəzetinin 80 illiyi münasibətilə ifadə etdiyi aşağıdakı fikirlər bu gün də milli mətbuatın inkişafı baxımından çox aktual səslənir: "1918-ci ildə Azərbaycan Xalq Cümhuriyyətinin rəsmi orqanı kimi fəaliyyətə başlamış "Azərbaycan" qəzeti yarandığı gündən milli-azadlıq mübarizəsinin ön sırasında addımlamış, xalqımızın çoxillik arzu və istəklərinin ifadəçisinə çevrilmiş, onun mənəvi dəyərlərinin, ictimai-siyasi ideallarının formalaşması işinə önəmli töhfə vermişdir. 1991-ci ildə yenidən müstəqillik qazanması ilə öz fəaliyyətini bərpa etmiş, azadlıq və suverenlik ideyalarının həyata keçirilməsində fəal surətdə iştirak etmişdir. Ölkəmizin mütərəqqi mətbuat ənənələrini ləyaqətlə davam etdirən "Azərbaycan" qəzeti bu gün demokratiyanın, siyasi plüralizmin, aşkarlığın təmin edilməsində müstəsna rol oynayır. Onun səhifələrində Azərbaycan həqiqətləri, ölkəmizdə hüquqi dövlət və vətəndaş cəmiyyətinin qurulması, iqtisadi islahatların həyata keçirilməsi, sağlam mənəvi-psixoloji mühitin, vətəndaş həmrəyliyi və milli birliyin yaradılması sahəsində aparılan məqsədyönlü işlər və ictimai-siyasi proseslər qərəzsiz işıqlandırılır.

Dövlət müstəqilliyimizin möhkəmləndirilməsi və azad, demokratik cəmiyyət qurulması işində ölkəmizin digər mətbuat orqanları kimi "Azərbaycan" qəzetinin də üzərinə böyük vəzifələr düşür. İnanıram ki, fəaliyyət göstərdiyi bütün dövrlərdə öz yüksək amallarına dönməz sədaqət göstərmiş "Azərbaycan" qəzetinin kollektivi bundan sonra da respublikamızda baş verən həqiqətlərin geniş ictimaiyyətə çatdırılmasında, dünyaya yayılmasında yüksək professionallıq, obyektivlik, prinsipiallıq, əsl dövlətçilik və vətəndaş mövqeyi nümayiş etdirərək xalqımızın mütərəqqi mətbuat ənənələrini layiqincə davam etdirə biləcəkdir".

Ölkəmizdə rəsmi dövlət mətbuatının müdrik ağsaqqalı olan "Azərbaycan" qəzetinin kollektivini 95 illik şərəfli, məsuliyyətli və əhəmiyyətli inkişaf yolunun tamamlanması münasibətilə təbrik edir, yaradıcı kollektivə daha böyük uğurlar arzulayıram.

İsa HƏBİBBƏYLİ,

AMEA-nın vitse-prezidenti, Milli Məclisin deputatı, akademik

Azərbaycan. - 2013.- 15 sentyabr.- S. 4.