Səfərbərlik və Hərbi Xidmətə Çağırış üzrə Dövlət Xidmətinin rəisi Ağdaşda vətəndaşları qəbul etmişdir

Prezident İlham Əliyevin tapşırığına əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin həllinə kömək edirlər.

AzərTAc xəbər verir ki, növbəti belə qəbul sentyabrın 14-də Ağdaş şəhərində keçirilmişdir. Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant Arzu Rəhimov Göyçay, Ağdaş, Yevlax, Ağsu, Ucar, Tərtər, Bərdə rayonlarından və Mingəçevir şəhərindən olan vətəndaşları qəbul edərək onların şikayət və təkliflərini dinləmişdir.

Qəbulda iştirak edən vətəndaşların müraciətləri əsasən Xidmətə işə qəbul, "Müharibə veteranı" adı və müvafiq vəsiqənin verilməsi, övladlarının hərbi xidmət yerinin dəyişdirilməsi, həqiqi hərbi xidmətdə olanların xəstə uşaqlarının və ailə üzvlərinin müalicəsinə, habelə sosial yardımın alınmasına kömək göstərilməsi, orta məktəblərin təlim silahları ilə təmin edilməsi və digər məsələlərlə bağlı olmuşdur.

Arzu Rəhimov vətəndaşları diqqətlə dinləmiş, onları narahat edən məsələlərin həlli ilə bağlı müvafiq göstərişlər vermişdir.

Eyni zamanda, vətəndaşların Xidmətin fəaliyyət dairəsinə aid olmayan məsələlərlə əlaqədar, eləcə də şəxsi xarakterli müraciətləri müvafiq qurumlara çatdırılmaq üçün qeydiyyata alınmışdır.

Qəbulda vətəndaşları narahat edən bəzi məsələlər elə yerindəcə həllini tapmışdır.

Vətəndaşlar onlar üçün yaradılmış şəraitdən razılıqlarını bildirmişlər.

Azərbaycan. - 2013.-15 sentyabr.- S. 6.