Salyanın
sabahı daha abad olacaq
Son illər Salyan
şəhərinin siması xeyli dəyişmişdir.
Tikilən binalar, salınan parklar, xiyabanlar onun hüsnünə yeni
yaraşıq gətirmişdir. Ələt-Astara magistralı
ilə üzü cənuba doğru gedərkən Kür
çayı üzərindəki körpüyə çatanda bu dəyişikliyi,
yenilikləri aydın görmək mümkündür.
Salyan həm də ölkəmizin
ən qədim yaşayış məskənlərindən biridir. Hələ 2 il əvvəl
yol çəkənlər şəhərin
yaxınlığındakı Babazanlı dağından torpaq götürərkən küp
qəbirlər aşkar etmişlər. Azərbaycan Elmlər Akademiyası Arxeologiya
və Etnoqrafiya İnstitutunun
alimləri dərhal tapıntı yerinə gəlmiş və müəyyən etmişlər ki, küp qəbirlər 2
min 800 il bundan əvvəlki dövrə aiddir. Ötən əsrlər, illər ərzində
isə insan əlləri və əməlləri
ilə digər yerlər kimi, bu məkan da dəyişmiş,
inkişaf etmiş, hər
gələn nəsil bir iz
qoyub getmişdir. Lakin inamla demək olar ki, burada
heç vaxt son on
ildə olduğu qədər quruculuq işləri
aparılmamışdır. Salyan şəhərinə qədəm qoyan
kimi Olimpiya İdman Kompleksi, şəhid
ailələri və Qarabağ müharibəsi
əlilləri üçün tikilən
beşmərtəbəli yaşayış evi,
iaşə obyektləri, əsaslı təmir edilən Müəllimlər
İnstitutunun Salyan
filialının binası, mozaik daşlarla yol boyu çəkilən hasarlar,
digər tikililər, əkilən ağaclar,
müxtəlif gül kolları
Muğanın bir hissəsi olan bu yerlərin necə dəyişdiyi haqqında ilkin təəssürat yaradır. "Salyan dairəsi" istiqamətinə doğru irəlilədikcə bu
təəssürat daha da
zənginləşir. Son iki
ay ərzində bu ərazidə
yeni park
salınmışdır. Parkdakı fəvvarələr, uşaq əyləncə guşəsi, gənclər
üçün kafe bura gələnlərə bir
rahatlıq bəxş edir. Dövlət
Bayrağı meydanı da burada
yerləşir. 40 metr hündürlükdə
dalğalanan
bayraq hər kəsdə qürur hissi doğurur.
Salyan şəhərinin
mərkəzində də tikinti-quruculuq
işləri səngimək bilmir, əksinə,
gündən-günə sürətlənir. Şəhərin
mərkəzində rayon icra hakimiyyəti və
Heydər Əliyev Mərkəzi
üçün orijinal
layihə əsasında yeni binalar tikilmişdir. "İlkin MMC" şirkətinin kollektivi tərəfindən zövqlə, böyük
ustalıqla inşa edilmiş
binaların qarşısında isə ümummili
lider Heydər Əliyevin heykəli
ucaldılır.
Məlum olduğu kimi, Prezidentin bölgələrə hər səfəri
əsl hadisəyə çevrilir. Bu səfərlər, bir növ, hesabat xarekteri daşıyır, ölkə
başçısı ilə xalqın, ictimaiyyət nümayəndələrinin
dialoquna çevrilir.
Vətəndaşlar həlli vacib olan məsələlərlə əlaqədar
öz rəy və təkliflərini
bildirirlər. Bu da
ölkəmizin, regionlarımızın inkişafına təkan
verir. Səfərlər çərçivəsində
həmçinin neçə-neçə obyektin
açılışı olur, yenilərinin
təməli qoyulur.
Ölkə
başçısının Salyana
növbəti səfəri də əlamətdar oldu. Rayon sakinləri ilə
görüşündə Prezident dedi: "Yenidən Salyanda
olmağımdan çox şadam.
Son illər ərzində mən dəfələrlə
Salyan rayonunda olmuşam. Bu mənim Prezident kimi yeddinci səfərimdir. Çox
şadam ki, Salyanda işlər yaxşı gedir, şəhər abadlaşır, gözəlləşir,
bütün küçələrdə
abadlıq işləri görülür,
binalar təmir olunur,
gözəl binalar tikilir".
Qeyd etmək
lazımdır ki, ölkə
başçısının Salyana budəfəki
səfəri zamanı da rayon
əhalisini narahat edən bir
neçə problem öz həllini tapdı. Bəllidir ki, Kür çayı Salyan şəhərini ikiyə bölərək
axıb keçir. Çayın Şirvan tayında yerləşən Babazanan hissəsində
yaşayan əhali yüz
illər boyu idi ki, şəhərin mərkəzindəki idarə,
müəssisə, təşkilatlara, bazar-dükana
gəlmək üçün bərə
və ya qayıqlardan istifadə etməli
olurdular. Bu, həm təhlükəli,
həm də əzab-əziyyətli idi.
Yağışlı-qarlı havalarda, suyun səviyyəsi qalxanda
çayı keçmək daha da çətinləşirdi. Əhalinin
çoxsaylı müraciətini nəzərə alaraq Prezident burada körpü tikintisi üçün sərəncam
imzaladı. İndi sakinlərin sevincinin həddi-hüdudu yoxdur.
Elman Hacıyev, Babazanan yaşayış sahəsinin sakini, əmək veteranı: "Ağlım kəsəndən
dəfələrlə eşitmişəm ki,
Salyan şəhərini ikiyə bölən
Kür çayı üzərindən körpü salacaqlar. Hətta
müxtəlif illərdə Bakıdan mütəxəssislər
gəlib ölçü-biçi işləri
də aparıblar. Lakin günlər, aylar, illər ötüb keçib, körpü
tikintisindən səs-soraq çıxmayıb. Necə deyərlər,
vədlər söz
olaraq qalıb, camaatın ümidləri puça çıxıb. Bu
günlər, yəni sentyabrın 6-da axşam
televizora baxanda Salyan haqqında digər
sərəncamlarla yanaşı, Kür
üzərində körpü tikilməsi
haqqında xəbəri eşidərkən, doğrusu,
qulaqlarıma inanmadım. Xəbəri eşidənlər telefonla zəng edib bir-birini təbrik edəndə isə
şübhəm qalmadı".
Digər bir sakin - Mustafa
Mustafayev isə ürək sözlərini
belə ifadə etdi: "Yaşım 40-ı keçib. Bu illər ərzində
Salyan şəhərinin o
biri tayına ya bərə,
ya da qayıqla gedib-gəlmişəm.
Bütün Babazanan əhalisi
kimi, mən də çox
çətinliklərlə üzləşmişəm.
Küləkli, yağışlı havalarda
qadınlar, uşaqlar Kürü
qorxa-qorxa keçirdilər. Bununla əlaqədar camaat
dəfələrlə yuxarılara müraciət etsə də,
nəticəsi olmamışdı. Sağ
olsun Prezident. Rayona səfəri zamanı əhalinin xahişini nəzərə alıb sərəncam imzaladı. Bizim Prezident sözü ilə əməli bir
olan adamdır. Əminik ki,
bu yaxınlarda körpünün
tikintisinə başlanılacaq. Biz bu əzab-əziyyətdən,
qorxu-hürküdən azad
olacağıq".
Salyan-Şirvan avtomobil
yolunun ümumi uzunluğu 40 kilometrdir. Yol üstündə 15-dən çox
qəsəbə və kənd yerləşir və həmin
yaşayış məntəqələrinin 20 min nəfərdən artıq əhalisi var. Bu yol uzun illərdən
bəri təmir edilmədiyindən bərbad hala
düşmüşdü. Ələt-Astara
yeni avtomobil yolunun çəkilişinə
cəlb olunan ağır tonlu
maşın-mexanizmlər yolu daha da bərbad hala salmışdı. Artıq 3-cü il idi ki,
Salyan rayonunun
Çuxanlı, Xələc, Qarabağlı, Pambıqkənd,
Kərimbəyli kəndlərinin, Qaraçalı qəsəbəsinin,
digər yaşayış məntəqələrinin sakinləri
çox əziyyət çəkirdilər.
Belə olan halda Prezidentin yolun yenidən
qurulması ilə bağlı imzaladığı sərəncam
əhalini necə sevindirməyə bilərdi...
Hacı Musa Kazımov, Qarabağlı Kənd Ağsaqqallar
Şurasının sədri:
"Salyan-Şirvan yolunun
yenidən qurulması ilə əlaqədar Prezidentin
imzaladığı sərəncam bütün
Qarabağlı camaatının ürəyincədir. Hamı
sevinir. Yol rahat, abad olanda
insanlar mənzil başına tez çatır, incimirlər.
Salyan-Şirvan yolu bərbad
halda olduğundan insanlar əziyyət çəkirdilər. Başqa yerlərdə
çəkilən yolları
görüb həsəd
aparırdıq. Ancaq ümid
edirdik ki, ölkə başçısı
bizim yolun düzəldilməsi üçün
də tədbir görəcək. Nəhayət, o gün gəlib çatdı".
Mirabutalıb Əsgərov, Qaraçala
qəsəbə sakini:
"Yol çəkmək,
körpü salmaq dədə-babadan savab iş, xeyir əməl sayılıb. İndi ölkənin hər
yerində yeni yollar çəkilir, körpülər tikilir.
Salyan-Şirvan avtomobil yolunun
yenidən qurulması
haqqında imzalanan sərəncam dövlətin
yol infrastrukturunun yaxşılaşmasına göstərdiyi
diqqətin bariz nümunəsidir".
Qeyd edək ki, Salyana səfərindən
sonra ölkə başçısı bu rayonun sosial-iqtisadi inkişafının sürətləndirilməsi
məqsədilə 2013-cü ilin dövlət büdcəsindən 2 milyon
manat ayrılması haqqında daha bir sərəncam imzalamışdır. Bütün bunlar bir daha
onu göstərir ki, Salyanda quruculuq
işləri bundan sonra da davam
edəcək, Azərbaycanın
bu qədim guşəsi daha da cavanlaşacaq, müasirləşəcək.
Seyran
CAVADOV
Azərbaycan. - 2013.- 15 sentyabr.- S. 7.