Azərbaycanda keçiriləcək prezident seçkiləri Fransa mətbuatının diqqət mərkəzindədir

Oktyabrın 9-da Azərbaycanda keçiriləcək prezident seçkiləri dünya KİV-lərinin, o cümlədən Fransa mətbuatının diqqət mərkəzindədir. Parisdə gündəlik nəşr olunan nüfuzlu "Les Echos" qəzeti 12 sentyabr tarixli nömrəsində "Azərbaycanda prezident seçkiləri" sərlövhəli məqalə dərc etmişdir.

Azərbaycanda keçiriləcək prezident seçkiləri ilə bağlı araşdırma aparan məqalə müəllifi Corinne Deloy qeyd edir ki, bu seçkilərdə İlham Əliyevin qələbə qazanacağı şübhə doğurmur. Məqalədə 2008-ci il prezident seçkilərində İlham Əliyevin inamlı qələbə qazandığı xatırladılır.

Məqalə müəllifi hakim Yeni Azərbaycan Partiyası haqqında da söz açaraq oxucularına məlumat verir ki, İlham Əliyevin prezidentliyə namizədliyi sədri olduğu bu partiya tərəfindən irəli sürülmüşdür. Yeni Azərbaycan Partiyası 2010-cu ildə keçirilən parlament seçkilərində 125 deputat mandatından 72-ni qazanmağa müvəffəq olmuş, bundan əvvəlki seçkilərlə müqayisədə Milli Məclisdə 9 artıq yer ala bilmişdir.

Azərbaycanın təbii sərvətlərlə zənginliyini diqqətə çatdıran müəllif ölkənin son illərdə iqtisadi-sosial cəhətdən sürətlə inkişaf etdiyi barədə də söhbət açır.

Amerika Birləşmiş Ştatlarının Azərbaycanda keçiriləcək prezident seçkilərinə münasibətinə toxunan Corinne Deloy fransız oxucuları ölkədə əsl seçki atmosferinin yaradılmasına, müxtəlif partiyalardan olan namizədlərin kütləvi informasiya vasitələrində çıxış etmələrinə imkan verilməsinə dair ABŞ-ın Bakıdakı səfiri Riçard Morninqstarın səsləndirdiyi fikirlərlə tanış edir.

Məqalədə prezident seçkilərinin gedişini izləmək üçün Avropa Şurası və ATƏT kimi nüfuzlu beynəlxalq təşkilatların Azərbaycana müşahidəçilər göndərəcəyi, həmçinin seçicilər arasında keçirilmiş rəy sorğularının nəticələri barədə məlumatlar da yer almışdır. Bildirilir ki, Seçki Məcəlləsinə görə hər namizəd 40 mindən az olmayaraq seçici imzası toplamalıdır və yalnız bu halda onun namizədliyi qeydə alına bilər.

Müəllif namizədliyi artıq qeydə alınan şəxslərin tam siyahısını oxucuların diqqətinə çatdırır və məlumat verir ki, Mərkəzi Seçki Komissiyası lazımi qədər imza toplaya bilməyən şəxslərin namizədliyini qeydə almaqdan imtina etmişdir.

Əsgər ƏLİYEV,

AzərTAc-ın xüsusi müxbiri

Paris

Azərbaycan. - 2013.- 14 sentyabr.- S. 6.