Bakıda «Şərq nağılı» birinci Beynəlxalq yaradıcılıq festivalı başa çatmışdır

Bakıda əlilliyi olan gənclərin "Şərq nağılı" birinci Beynəlxalq yaradıcılıq festivalı başa çatmışdır.

AzərTAc xəbər verir ki, sentyabrın 13-də Heydər Əliyev Sarayında festivalın yekun tədbiri olan qala-konsert keçirilmişdir.

Azərbaycan xalqının ümummilli lideri Heydər Əliyevin 90 illik yubileyinə həsr olunmuş festival Gənclər və İdman Nazirliyinin təşəbbüsü və dəstəyi, "Dan" Beynəlmiləlçi Gənclər, "Müşfiq" Əlil Uşaqlara Yardım və "Müstəqil Həyat" Dəstək və İnkişaf Mərkəzi ictimai birliklərinin təşkilati dəstəyi ilə reallaşmışdır.

Yekun tədbirində çıxış edən gənclər və idman nazirinin müavini İntiqam Babayev bildirmişdir ki, üç gün davam etmiş festivalın əsas məqsədi əlilliyi olan istedadlı gənclərin yaradıcılıq bacarıqlarının reallaşdırılmasının dəstəklənməsi, ictimaiyyətin diqqətinin humanizm ideyalarına, əlilliyi olan gənclərin sosial inteqrasiyası və adaptasiyasının təşviqinə, onlarla ünsiyyətin qurulması və təcrübə mübadiləsi üçün şəraitin yaradılmasına, regional, millətlərarası və beynəlxalq mədəni əlaqələrin gücləndirilməsi, mədəni dəyərlərə və əlilliyi olan gənclərin yaradıcılığına cəlb edilməsindən ibarət olmuşdur.

Qeyd edilmişdir ki, Azərbaycanda əhalinin bütün kateqoriyaları kimi, əlillərə də xüsusi diqqət və qayğı göstərilir. Bu, ölkədə aparılan humanist siyasətin istiqamətlərindən biridir. Gənc əlillərin mədəni həyatda iştirakı, onların asudə vaxtlarının səmərəli təşkili məqsədilə daim müxtəlif layihələr həyata keçirilir.

Nazir müavini dəvəti qəbul edib festivalda iştirak edən ölkələrin nümayəndələrinə təşəkkürünü bildirmiş, belə layihələrin davamlı keçiriləcəyini söyləmişdir.

Sonra festivala qatılmış ölkələri təmsil edən qurumların rəhbərlərinə təşkilat komitəsi tərəfindən diplomlar və hədiyyələr təqdim edilmişdir.

Mərasim festival iştirakçıları və ölkəmizin incəsənət ustalarının iştirakı ilə möhtəşəm qala-konsert proqramı ilə davam etmişdir.

Festivala Azərbaycan da daxil olmaqla 9 ölkədən 150-dən artıq əlil gənc qatılmışdır. İştirakçı dövlətlərdən gəlmiş kollektivlər tərəfindən 3 gün ərzində mahnı, rəqs, teatr və instrumental musiqidən ibarət proqramlar nümayiş olunmuşdur.

Festival çərçivəsində xarici ekspertlər əlilliyi olan gənclərlə işləyən yerli təşkilatlar və fərdi təlimçilər üçün ustad dərsləri təşkil etmişlər.

Eyni zamanda, festival ərəfəsində Azərbaycan Respublikasının Gənclər və İdman Nazirliyi və UNİCEF tərəfindən 20-dək qaçqın, məcburi köçkün və əlilliyi olan gənclər üçün xarici ekspert tərəfindən fotoqrafiya üzrə 5 günlük təlimlər keçirilmişdir. Təlimlər nəticəsində iştirakçıların çəkdikləri və ekspert tərəfindən seçilmiş fotoşəkillər festivalın bağlanış mərasimində Heydər Əliyev Sarayının foyesində təşkil edilmiş sərgidə nümayiş olunmuşdur.

Həmçinin festivalın iştirakçıları üçün zəngin elmi-mədəni proqram hazırlanmışdır. Onların iştirakı ilə bir sıra görüşlər keçirilmiş, fəxri və şəhidlər xiyabanlarına ziyarət, Qala Arxeoloji-Etnoqrafik Muzey Kompleksinə səfər, şəhər və dəniz gəzintisi reallaşdırılmışdır.

Azərbaycan. - 2013.- 14 sentyabr.- S. 11.