«Jewish Journal” jurnalında «Arşın mal alan» operettasının ABŞ-da premyerası haqqında məqalə dərc edilmişdir

Amerikada çıxan "Jewish Journal" jurnalında "Arşın mal alan" Amerikaya gəlmişdir" sərlövhəli məqalə dərc edilmişdir.

Dahi Azərbaycan bəstəkarı Üzeyir Hacıbəylinin məşhur "Arşın mal alan" operettasının bu il sentyabrın 7-də Los-Ancelesdə premyerasından bəhs edilən həmin məqalənin müəllifi göstərir ki, 1913-cü ildə yazılmış "Arşın mal alan" operettası Amerika tamaşaçılarına ilk dəfə təqdim olunmuş və Azərbaycanın Los-Ancelesdəki diplomatik missiyası şəhərin bütün yəhudi icmasını tamaşaya dəvət etmişdir.

Məqalə müəllifi "Arşın mal alan" əsərinin süjeti barədə məlumat verərək qeyd edir ki, Azərbaycan İsrail ilə səmimi münasibət yaratmışdır və bu ölkəni neft ilə təchiz edən ikinci əsas dövlətdir. Məqalədə rejissor Maykl Şnakın tamaşa səhnələrinə müasir elementlər daxil etməsi və bunun sayəsində tamaşanın daha baxımlı və aktual olması vurğulanır. "Arşın mal alan" operettasının ABŞ-da premyerası ARDNŞ-nin maliyyə dəstəyi ilə Azərbaycanın Los-Ancelesdəki Baş konsulluğu tərəfindən təşkil edilmişdir.

Yusif BABANLI,

AzərTAc-ın xüsusi müxbiri

Vaşinqton

Azərbaycan.-2013.- 18 sentyabr.- S.7.