Bakıda uşaq
yazıçısı Valeri Voskoboynikovla görüş
keçirilmişdir
Sentyabrın 24-də Mədəniyyət və Turizm Nazirliyinin təşkil etdiyi, ümummilli lider Heydər Əliyevin 90 illik yubileyinə həsr olunmuş III Beynəlxalq Kitab sərgi-yarmarkası çərçivəsində Rusiyanın tanınmış uşaq yazıçısı və publisisti, uşaqlar üçün 60-dan çox kitabın müəllifi Valeri Voskoboynikovun azərbaycanlı oxucularla görüşü olmuşdur.
AzərTAc xəbər verir ki, oxucularla görüşdə V.Voskoboynikov özü və kitabları barədə danışmışdır. Onun birinci kitabı (uşaqlar üçün povest və hekayələri) 1965-ci ildə çapdan çıxmışdır.
Təəccüblü deyildir ki, V.Voskoboynikovun hekayə və povestləri dünyanın bir çox dilinə tərcümə olunmuşdur, çünki onun qəhrəmanları müxtəlif ölkələrin, konfessiyaların və mədəniyyətlərin nümayəndələridirlər.
Müəllifin bir çox kitabı xaricdə yaxşı tanınır. İlk dəfə 1971-ci ildə Leninqradda işıq üzü görmüş "Qırmızı üzlü dəftər" povesti Yaponiya, ABŞ, Polşa və Rumıniyada nəşr olunmuşdur. "Sakit ada" kitabı Yaponiyada üç dəfə təkrar çap olunmuşdur.
V.Voskoboynikov İbn Sina (Avisenna) barədə yazdığı "Böyük loğman" (Moskva, "Molodaya qvardiya", 1972) tarixi povestindən həvəslə söz açmışdır. UNESCO-nun qərarı ilə bu povest İbn Sinanın 1000 illiyi münasibətilə bir çox ölkədə çap edilmişdir.
V.Voskoboynikov 1987-ci ildən Sankt-Peterburq Yazıçılar İttifaqının uşaq və gənclər ədəbiyyatı bölməsinə başçılıq edir, 1998-ci ildən Rusiyanın Uşaq Kitabı Şurasının üzvüdür, "Detskaya literatura" jurnalının redaksiya heyətinin üzvü olmuşdur. Uzun illərdir gənc uşaq yazıçılarına hamilik edir.
Müəlliflərin bir neçə nəsli üçün çoxsaylı seminar və forumlar onun rəhbərliyi ilə keçirilmişdir. O, Lipki forumunda uşaq ədəbiyyatı üzrə ustad dərslərinin, gənc uşaq yazıçıları üçün seminarların (Yasnaya Polyana, Tarxanı, Peredelkino, Staraya Russa, Spassk-Lutovinovo, Melixovo, Karabixa, Mixaylovskoye) əvəzsiz rəhbəri, habelə "Detqiz" nəşriyyatının festivalında nəsr əsərləri üzrə seminarın rəhbərlərindən biridir.
V.Voskoboynikov "Görkəmli uşaqların həyatı" silsiləsindən kitablarına görə mədəniyyət sahəsində RF hökumətinin mükafatına, H.K.Andersen adına Beynəlxalq Uşaq Kitabı Şurasının fəxri diplomuna layiq görülmüş, "Görkəmli uşaqların həyatı" kitabı 2000-ci ildə dünyada ən yaxşı uşaq kitabları siyahısına daxil edilmişdir.
Onun
Bibliyanın "Ailəvi mütaliə üçün
işlənmiş variantı" kitabı "Neva Kitab Forumu
-2003-cü il" Beynəlxalq
Salonunun "Gümüş liter" yüksək
mükafatına, uşaqlar üçün "Rusiyanın qəlbi" silsiləsindən tarixi kitablar
seriyası "Rusiyanın pravoslav
kitabı - 2003-cü il" Birinci Ümumrusiya mükafatına,
"Görkəmli uşaqların
həyatı - 2" kitabı
2005-ci ildə Marşak adına mükafata, "Hər
şey qaydasında olacaq" kitabı 2007-ci ildə "Müqəddəs arzu"
milli uşaq mükafatına,
"Görkəmli uşaqların həyatı"
kitablar silsiləsi 2008-ci ildə
"Uşaqlar üçün maarifləndirici ədəbiyyat "
nominasiyasında Rusiya Federal Mətbuat Agentliyinin "Al yelkənlər"
mükafatına layiq görülmüşdür.
Müəllif
öz kitablarından parçalar oxumuş, oxucuların suallarına cavab vermişdir.
Azərbaycan.-2013.- 25 sentyabr.- S.6.