Azərbaycan idman ölkəsi kimi də aparıcı dövlətlərin sırasına daxil olub

Bu fikirləri Prezident İlham Əliyev Milli Olimpiya Komitəsində 2012-ci ilin yekunları ilə bağlı keçirilmiş tədbirdə bildirib

Azərbaycan Cənubi Qafqaz regionundakı əhəmiyyətli ərazi, geostrateji və geoiqtisadi üstünlüklərindən maksimum faydalı şəkildə yararlanaraq hər bir mərhələ üçün qarşıda duran hədəfləri düzgün müəyyənləşdirmişdir. Beynəlxalq aləmə çoxşaxəli inteqrasiyanın təmin olunması, iqtisadi və geostrateji maraqların ödənməsi, vətəndaşların firavan, təhlükəsiz yaşayışının təmin olunması həyata keçirilən xarici siyasətin prioritet istiqamətləridir.

Beynəlxalq təşkilatlarla qarşılıqlı faydalı əməkdaşlıq əlaqələrinin qurulması, ən başlıcası, milli mənafelərimizin lazımi səviyyədə müdafiə edilməsi məhz ulu öndər Heydər Əliyevin 1993-cü ildə xalqın istəyi ilə hakimiyyətə qayıdışından sonra mümkün olmuşdur. Ulu öndərin balanslı xarici siyasət kursunu inamla davam etdirən dövlət başçısı İlham Əliyev ötən illərdə dünya siyasətinə əsaslı təsir imkanları olan dövlətlərlə qarşılıqlı faydalı əməkdaşlığı genişləndirmək, inkişaf etdirmək, beynəlxalq təşkilatlarda Azərbaycanın mövqelərini gücləndirmək istiqamətində sistemli fəaliyyət göstərir. Dövlət müstəqilliyinin bərpasının 21-ci ildönümü tamam olan müstəqil Azərbaycan aparıcı beynəlxalq təşkilatlar çərçivəsində özünün maraq və mənafeyini maksimum dərəcədə təmin etmişdir. Respublikamızın sivil dünyanın hüquqi-siyasi atmosferinin müəyyənləşməsində mühüm rolu olan Birləşmiş Millətlər Təşkilatının (BMT) Təhlükəsizlik Şurasının qeyri-daimi üzvü seçilməsi bütövlükdə müasir tariximizin ən əlamətdar, qürur doğuran hadisələrindən biri kimi yadda qalmışdır. Bu möhtəşəm hadisə ilk növbədə rəsmi Bakının son dərəcə sabit və uğurlu, eyni zamanda sivill beynəlxalq dinc yanaşı yaşam normalarına əsaslanan tarazlı siyasət yürütdüyünü bir daha təsdiqləməklə yanaşı, müstəqil Azərbaycanın beynəlxalq miqyasda artan nüfuzunun parlaq təcəssümü kimi dəyərləndirilə bilər.

2003-cü ilin oktyabrından respublikaya inamla rəhbərlik edən cənab İlham Əliyev ulu öndərin böyük uzaqgörənliklə irəli sürdüyü xarici siyasət kursunu yeni dövrün tələblərinə uyğun zənginləşdirmiş, Azərbaycanın beynəlxalq arenada nüfuzunun daha da yüksəlməsinə, müstəqil siyasət yeritməklə milli maraqlarını maksimum səviyyədə təmin etməyə nail olmuşdur. Ermənistanı dünya miqyasında təcavüzkar dövlət kimi tanıtmaq Azərbaycanın ərazi bütövlüyünü təmin etmək, dünya siyasətini istiqamətləndirən böyük dövlətlərlə qarşılıqlı faydalı əməkdaşlığı genişləndirmək, beynəlxalq ictimaiyyətdə respublikamızda həyata keçirilən mütərəqqi iqtisadi, siyasi, hüquqi islahatlar barədə dolğun təsəvvür yaratmaq, xaricdə güclü diaspor və lobbi formalaşdırmaq dövlət başçısı İlham Əliyevin xarici siyasətinin prioritet məqsədləri sırasında xüsusi vurğulana bilər.

Azərbaycanın nəinki qonşu, ümumən dünya siyasətində əsas söz sahibi olan bütün ölkələrlə əlaqələrini son illərdə daha da inkişaf etdirməyə nail olması, regionda sülh, sabitlik və iqtisadi əməkdaşlıq təşəbbüslərini fəal şəkildə dəstəkləməsi fonunda BMT-dəki tarixi qələbəmiz də tamamilə məntiqə uyğundur. Erməni lobbisinin, təcavüzkar Ermənistanın Azərbaycana qarşı apardığı məkrli informasiya siyasəti şəraitində 193 BMT üzvündən 155-nin birbaşa dəstəyinə nail olmaq respublikamızın xarici siyasətinin ümumi mahiyyəti barədə tamamilə dolğun təəssürat yaradır.

BMT-dəki parlaq qələbəmiz son illərdə müstəqil respublikamızın beynəlxalq aləmdə əldə etdiyi ilk diplomatik nailiyyət deyildir. Cənab İlham Əliyevin xarici siyasəti "Ən yaxşı müdafiə hücumdur!" taktikası üzərində qurması nəticəsində Azərbaycan Avropa Şurası, ATƏT, Avropa Birliyi, İslam Əməkdaşlıq Təşkilatı, NATO Parlament Assambleyası və digər mötəbər beynəlxalq təşkilatlarda Ermənistanın təcavüzkar dövlət kimi tanınmasına və ifşasına nail olmuşdur.

Ölkədə aparlan məqsədyönlü tədbirlər nəticəsində Azərbaycan həm də dünya miqyaslı mədəni kütləvi tədbirlərə ev sahibliyi edən mərkəzlərdən birinə çevrilib. 2009-cu ildə Bakının İslam mədəniyyətinin paytaxtı elan olunması, Mədəniyyətlərarası dialoq forumunun keçirilməsi, dünya dini liderlərinin toplantılarının, eləcə də beynəlxalq miqyaslı idman tədbirlərinin keçirilməsi ölkəmizin bu cür tədbirlərə tam hazır olduğunu göstərdi. 2009-cu ildən başlayaraq Qəbələ şəhərində beynəlxalq musiqi festivallarının keçirilməsi və həmin mötəbər tədbirdə dünyanın ən məşhur musiqiçilərinin iştirakı da Azərbaycanın beynəlxalq aləmdə nüfuzunun ildən-ilə artdığını sübuta yetirdi. Son illər ölkəmizdə mötəbər idman yarışları - sərbəst güləş üzrə Avropa çempionatı, şahmat üzrə dünya və qitə çempionatları, habelə boks, cüdo, həndbol, voleybol və digər idman növləri üzrə beynəlxalq turnirlər, yunan-Roma və sərbəst güləs üzrə dünya çempionatları da keçirilmişdir.

"Evrovision" mahnı müsabiqəsinin 2012-ci ilin mayında Azərbaycanda yüksək səviyyədə keçirilməsi bir daha ölkəmizin nüfuzunu göstərdi. Tədbirin ən yüksək səviyyədə keçirilməsini müsabiqə zamanı Azərbaycana gəlmiş əcnəbi qonaqlar və jurnalistlər də təsdiqlədi. Dekabrın 8-də Avropa Olimpiya Komitəsinin Baş Assambleyasında 2015-ci ildə ilk Avropa Olimpiya Oyunlarının Azərbaycanda keçirilməsi haqqında qərar qəbul edilməsi də böyük uğurdur.

Prezident İlham Əliyev Avropa Olimpiya Komitəsinin 2015-ci ildə Birinci Avropa Olimpiya Oyunlarının Bakıda keçirilməsi ilə bağlı qərarı münasibətilə Azərbaycan xalqını təbrikində bildirmişdir: "Bu qərarın qəbul edilməsində bir neçə amil öz rolunu oynamışdır. İlk növbədə, ölkəmizin beynəlxalq nüfuzu öz rolunu oynamışdır. Azərbaycan bu gün dünyada böyük hörmətə malik olan bir ölkədir. Dünya birliyində bizim rolumuz, təsir imkanlarımız artır və dünya birliyi Azərbaycana böyük hörmətlə və etimadla yanaşır. Keçən il ölkəmizin tarixində böyük hadisə baş vermişdir. Azərbaycan BMT Təhlükəsizlik Şurasına üzv qəbul edilmişdir. Biz bu şərəfə 155 ölkənin dəstəyi ilə layiq görüldük və bir il ərzində Təhlükəsizlik Şurasının üzvü kimi Azərbaycan öz prinsipial mövqeyini göstərir. Əvvəllər də bəyan etdiyim kimi, biz Təhlükəsizlik Şurasında beynəlxalq hüquq normalarını və ədaləti müdafiə edəcəyik. Bir sözlə, beynəlxalq əlaqələrimiz genişlənir, dostlarımızın sayı artır və ölkəmizin beynəlxalq imici də çox müsbətdir. Digər amil ondan ibarətdir ki, Azərbaycanda uzun illər ictimai-siyasi sabitlik hökm sürür. Bu da çox vacibdir. Ölkəmizin dinamik, uğurlu inkişafı üçün ictimai-siyasi sabitlik çox mühüm rol oynayır və Azərbaycan bu baxımdan nümunəvi ölkə kimi dünyada özünü təsdiqləyibdir".

2012-ci il ölkə həyatının bütün sahələrində olduğu kimi, idman sahəsində də uğurlarla zəngin olmuşdur. Ölkə rəhbərliyinin idmanın hərtərəfli inkişafına göstərdiyi diqqət və qayğının ən parlaq təzahürü 2012-ci ilin Azərbaycanda "İdman ili" elan olunması idi. İlin əvvəllərindən idmanın ən müxtəlif sahələri üzrə əldə edilən yüksək nailiyyətlər qarşıya qoyulan vəzifələrin uğurla reallaşdırıldığını təsdiq etdi. Ötən il idmançılar tərəfindən müxtəlif beynəlxalq yarışlarda 700-dən çox medal qazanılmışdır ki, onlardan da 255-i qızıl medal olmuşdur.

2012-ci ildə idman infrastrukturunun yaradılıması istiqamətində ardıcıl tədbirlər həyata keçirilmişdir. İl ərzində iki regional Olimpiya mərkəzi istifadəyə verilmişdir ki, bununla da respublikamızın bölgələrində tikilmiş Olimpiya komplekslərinin sayı 35-ə çatmışdır. Bu istiqamətdə tədbirlər bu il də davam etdiriləcək. Ötən il Milli Olimpiya Komitəsinin 20 illik yubileyi qeyd edildi və bu müddət ərzində görülən işlərə qiymət verildi. Tədbirdə müxtəlif ölkələrdən gələn qonaqlar, eləcə də Beynəlxalq və Avropa Olimpiya komitələrinin təmsilçiləri Azərbaycanın idman sahəsində əldə etdiyi uğurları çox yüksək qiymətləndirdilər.

Dekabrın 18-də Milli Olimpiya Komitəsində (MOK) 2012-ci ilə yekun vurulmuş, idmançılara və məşqçilərə mükafatlar təqdim olunmuşdur. Azərbaycan Respublikasının Prezidenti, Milli Olimpiya Komitəsinin prezidenti İlham Əliyev və xanımı Mehriban Əliyeva mərasimdə iştirak etmişlər. Prezident İlham Əliyev mərasimdə bildirmişdir: "İyirimi illik yubiley bizə imkan verdi ki, görülmüş işləri bir daha təhlil edək, uğurlarımızla öyünək, eyni zamanda, çatışmayan cəhətləri, qüsurları aradan götürək ki, daha da böyük nəticələrə imza ata bilək. Əlbəttə, 2012-ci ilin idman tədbirlərindən danışarkən London Yay Olimpiadası haqqında danışmamaq mümkün deyildir. Bu olimpiada da tarixdə qalacaqdır. Bu Olimpiya Oyunlarında idmançılarımız ən böyük uğurlar qazanmışlar, bütün xalqımızı sevindirmişlər, Azərbaycanı idman dövləti kimi aparıcı dövlətlərin sırasına daxil edə bilmişlər. On medal - 2 qızıl, 2 gümüş, 6 bürünc medal bizim tarixi nailiyyətimizdir. Olimpiya Oyunlarından artıq bir neçə ay keçir və hələ ki xarici həmkarlarla görüşlərdə bu məsələ vurğulanır, Azərbaycanın uğurları haqqında fikir mübadiləsi aparılır. Məni bu günə qədər həmkarlarım - dövlət və hökumət başçıları bu uğurlar münasibətilə təbrik edirlər. Əlbəttə ki, bu, çox gözəl hadisədir. Hər bir Azərbaycan vətəndaşının qəlbini qürur hissləri ilə dolduran bir məsələdir. Bu qələbəyə görə, əlbəttə, biz hamımız idmançılara, onların məşqçilərinə, idman mütəxəssislərinə minnətdarıq".

Son illər Bakıda təşkil edilən beynəlxalq idman tədbirlərinin ən yüksək səviyyədə keçirilməsi iştirakçı ölkələrin nümayəndələri tərəfindən də müsbət dəyərləndirilir. Azərbaycanın iqtisadi, siyasi, mədəni və digər sahələrdə əldə etdiyi nailiyyətlər qarşıda daha böyük uğurların əldə olunacağına əminlik yaradır.

Elnur HACALIYEV

Azərbaycan.-2013.- 1 yanvar.- S.3.