«FAİZLƏRLƏ» YOX, «DƏFƏLƏRLƏ» ÖLÇÜLƏN İNKİŞAF

BAŞ REDAKTORDAN

Dünya 2013-cü ilə ziddiyyətlər içərisində qədəm qoydu!

Avropa getdikcə güclənən və təsirini artıran iqtisadi və maliyyə böhranı içərisində çabalayır!

Ərəb ölkələri keçirdikləri "baharın" "qış" mərhələsinə daxil olublar!

Dünyadakı münaqişə ocaqlarını söndürmək əvəzinə bir qədər də neft töküblər!

Bəzi ölkələr sanksiyaya məruz qalaraq müdaxilə təhlükəsi qarşısındadırlar!

Siyasət labirintləri içərisində düzgün yol seçərək məqsədə çatmaq çox çətindir, çox!

Xoşbəxtlikdən Azərbaycan fərqli yolla gedir!

Bu yol "Heydər Əliyev siyasi kursu" adlanır!

Bizi böhran və bəlalardan qoruyan, uğur və nailiyyətlərə çatdıran da məhz bu yoldur!

* * *

İnkişafın keyfiyyətcə yeni modelini formalaşdırmaq Azərbaycan dövlətinin fəaliyyətində başlıca yer tutur. Bu məqsədlə dövlət başçısı cənab İlham Əliyevin göstərişi əsasında hazırlanan "Azərbaycan 2020: gələcəyə baxış" İnkişaf Konsepsiyası təsdiq olunmuşdur. Artıq bu ildən gerçəkləşdiriləcək həmin Konsepsiya ölkə iqtisadiyyatının tarazlı və dayanıqlı inkişafını təmin edəcək, əhalinin sosial rifahının yüksəldilməsi, sosial-iqtisadi inkişafın cari, orta və uzunmüddətli dövrləri arasında üzvü bağlılıq və qarşılıqlı uzlaşma yaratmaq, habelə cəmiyyətin bütün istiqamətlərdə tərəqqisinə nail olmaq funksiyasını yerinə yetirəcəkdir.

İnkişaf Konsepsiyasının icrasına etibarlı və uğurlu start nöqtəsindən başlanılmışdır!

Ən əvvəl bu təməli ulu öndər Heydər Əliyev qurtuluş missiyası ilə xalqın arzu və tələbi ilə ikinci dəfə hakimiyyət sükanı arxasına qayıdaraq qoymuşdur!

Tarixən çox qısa müddətdə ümummilli liderimiz tərəfindən görülən işləri tezis şəkilində sadalamaqla kifayətlənirik:

- Müharibə bölgəsində atəşkəs, ölkədə möhkəm və dönməz sabitlik yaradıldı;

- Yeni Konstitusiya qəbul edildi, bazar iqtisadiyyatı münasibətlərinə keçidi təmin edəcək qanunçuluq bazası hazırlandı;

- Azərbaycanın karbohidrogen ehtiyatlarının dünya bazarına çıxışını təmin edəcək "Əsrin müqaviləsi" neft kontraktı imzalandı. Nəticədə:

ölkə ümummilli böhrandan qurtuldu;

neft sənayesi iqtisadiyyatın lokomotivinə çevrildi;

dünyanın aparıcı dövlətlərinin maraqları Azərbaycanda cəmləndi;

Azərbaycan öz sərvətlərinin sahibliyini və müstəqil siyasətini təmin etdi;

Neft və təbii qazın dünya bazarına çıxarılması üçün yeni boru kəmərləri çəkildi;

BÜTÖVLÜKDƏ:

- Özəlləşdirmə proqramları yerinə yetirildi;

- Aqrar islahatı keçirilərək torpaq əsl sahibinə qaytarıldı;

- Demokratiya yolunu tutan və dünyaya inteqrasiya edən Azərbaycan Avropa Şurasına üzv qəbul olundu;

- Heydər Əliyev siyasi kursunun dəqiq konturları cızıldı.

İlham Əliyev missiyasının başlaması müstəqil Azərbaycanı yeni inkişaf mərhələsinə yüksəltdi. Mayasında cənab İlham Əliyevin düşünülmüş, sürətli və davamlı inkişaf konsepsiyası duran inkişafın Azərbaycan modeli xalqımızı qısa zamanda yaxın məqsədlərə çatdıraraq dünyanın marağına səbəb oldu.

AZ VAXTDA:

Enerji, nəqliyyat və ərzaq təhlükəsizliyi təmin edildi;

Azərbaycan transmilli layihələrin təşəbbüsçüsü, icraçısı və maliyyələşdirəni oldu;

Ölkə başdan-başa yenidən qurularaq abadlaşdırıldı, zəruri infrastruktur yaradıldı;

Azərbaycan Cənubi Qafqazın ən güclü və modern dövlətinə çevrildi;

155 dövlətin dəstəyi ilə BMT Təhlükəsizlik Şurasına qeyri-daimi üzv seçildi.

Ölkədə həyata keçirilən sosial və investisiya yönümlü siyasət öz bəhrəsini vermişdir!

MÜSTƏQİL AZƏRBAYCANIN İNKİŞAFI "FAİZLƏRLƏ" DEYİL, "DƏFƏLƏRLƏ" ÖLÇÜLÜR!

Bu nə deməkdir? Konkret rəqəmlərə nəzər salaq!

2003-2011-ci İLLƏRDƏ:

* Ölkə iqtisadiyyatının həcmi 3 dəfə artıb! Azərbaycan ümumi daxili məhsul istehsalının illik artım tempinə görə dünyanın lider dövlətləri sırasında yer alıb;

* Dövlət büdcəsi 17 dəfə artıb! Beləliklə 1,5 milyard dollardan 25 milyard dollara çatıb;

* Ölkənin strateji valyuta ehtiyatları 25,3 dəfə artıb! Hazırda valyuta ehtiyatlarımızın miqdarı 40 milyard dolları keçib;

* Nominal əməkhaqqı 5,9 dəfə artıb! Hazırda orta maaş 500 dollara bərabərdir;

* Nominal orta aylıq pensiya 6,1 dəfə artıb! Orta pensiya 200 dollar olub;

* Bank aktivlərinin həcmi 10,4 dəfə artıb!

Baş verən bir sıra "enmələr" və "azalmalar" da əslində xalqın güzəranına müsbət təsir göstərib. Belə ki:

Yoxsulluq səviyyəsi 7 dəfə aşağı düşərək 49 faizdən 7,6 faizə çatıb;

Son 3 ildə internet xidmətlərindən istifadə haqları 10 dəfədən çox aşağı salınıb;

Azərbaycanın valyuta ehtiyatları xarici dövlət borcunu 10 dəfədən çox üstələyir!

Dünyanı maliyyə və iqtisadi böhranın bürüdüyü, bu səbəbdən Avropa İttifaqının dağılmaq təhlükəsi ilə üz-üzə qaldığı və Avropa dövlətləri əhalisinin sosial narazılığının artdığı, bəzi dövlətlərin kredit reytinqinin aşağı düşdüyü vaxtda Azərbaycanın "dəfələrlə"yə söykənən sürətli inkişafı fantastik təsir bağışlayır. Üstəlik elə göstəricilərimiz var ki, dünyada analoq tanımır. Həm də belə rəqəmlər dövlətin imicinə və insanların sosial rifahının yüksəlməsinə birmənalı şəkildə müsbət təsir göstərir.

İnkişafın daha bir neçə analoqsuz məqamlarına nəzər salaq:

Davos İqtisadi Forumunun hazırladığı cədvələ görə Azərbaycan rəqabət qabiliyyətliliyinə görə MDB-də 1-ci, dünyada 18-ci yerdədir;

Hər il məcburi köçkünlərin mənzil şəraitinin yaxşılaşdırılmasına 300 milyon manat vəsait xərclənir;

Son doqquz ildə qaçqınlar və məcburi köçkünlər üçün 71 yeni tipli qəsəbə salınmış, çoxmərtəbəli binalardan ibarət məhəllə və həyət evlərinə 23 mindən çox məcburi köçkün ailəsi köçürülmüşdür;

Həmin dövrdə daimi yaşayış yerini tərk etmiş insanlar üçün 129 məktəb, 43 uşaq bağçası, 47 tibb müəssisəsi, 34 rabitə evi tikilmişdir;

Qərb bölgəsində baş vermiş zəlzələnin nəticələrinin aradan qaldırılmasına, əhalinin uçmuş evlərinin yenidən tikilərək özlərinə verilməsinə 300 milyon manat xərclənib;

Keçmiş SSRİ məkanında ən qısa müddətdə və ən yüksək əmsalla əhalinin batmış əmanətləri Azərbaycanda qaytarılır.

Ən aydın, açıq və anlaşıqlı dil "rəqəmlərin dili"dir! Konkret rəqəmlərin arxasında isə çox mətləblər dayanır. Onları uzun-uzadı şərh etmədən mənasını açmağı oxucuların öhdəsinə buraxırıq. Yalnız bir məqamı xatırlatmaq istəyirik: Bütün bu görülən işlərin arxasında gərgin əmək, məqsədyönlü fəaliyyət, böyük vəsaitlə bərabər, Azərbaycan iqtidarının xalqın güzəranının yüksəldilməsinə böyük diqqəti və qayğısı, üstəlik düşünülmüş və uzaqgörən siyasət dayanır!

Azərbaycan.-2013.- 9 yanvar.- S.3.