Astara inkişaf edir, yeniləşir, müasirləşir

2012-ci il astaralılar üçün də əlamətdar oldu. Martın 13-də Prezident İlham Əliyevin Astaraya növbəti səfəri yerli əhalinin bahar sevincini birə on artırdı. Ölkə rəhbəri Astarada inşa edilən bir sıra obyektlərin - əsaslı təmirdən sonra istifadəyə verilən Mərkəzi xəstəxananın, Olimpiya İdman Kompleksinin, yenidən qurulan Kijəbə-Qəcimardə, Kijəbə-Ojəkəran avtomobil yolunun açılış mərasimlərində iştirak etdi, rayon ictimaiyyətinin nümayəndələri ilə görüşü zamanı Astara və astaralılar haqqında səmimi sözlər söylədi: "Mən Astarada dəfələrlə olmuşam. Hər dəfə rayonda, şəhərdə olarkən yeniliklər görəndə çox sevinirəm. Keçən il də Astarada olmuşam. Keçən il də, yenə də demək istəyirəm ki, həm yolun, həm gənclər evinin açılışını qeyd etmişdik. Astara gözəlləşir, müasir gözəl şəhərə çevrilir. Mən bu uğurlarla bağlı bütün astaralıları ürəkdən təbrik edirəm".

Uğurları əks etdirən statistika

Astarada iqtisadiyyatın əsasını çayçılıq, tərəvəzçilik, subtropik meyvəçilik və heyvandarlıq təşkil edir. Regionların sosial-iqtisadi inkişafı 2-ci Dövlət Proqramının icrası ilə əlaqədar bitkiçilik və heyvandarlıq sahələrində bir sıra mühüm tədbirlər həyata keçirilmiş, məhsul istehsalında ilbəil artım əldə edilmişdir.

Astaranın iqtisadiyyatı üçün perspektiv sahə sayılan çayçılığın şöhrətini bərpa etmək üçün yeni plantasiyaların salınmasına, mövcud sahələrin məhsuldarlığının yüksəldilməsinə daim diqqət artırılır. 2012-ci ildə 120 hektar sahədə yeni çay plantasiyası salınmış, daha 100 hektar əkin üçün şitillər yetişdirilmişdir. Rayonda 600 hektar məhsuldar və bərpaya ehtiyacı olan plantasiyanın 204 hektarında məhsul yığılır. 2012-ci ildə 390 ton yaşıl çay yarpağı yığılmışdır. Bu göstərici 2011-ci illə müqayisədə 26 ton çoxdur. Plantasiyalarda görülən aqrotexniki tədbirlər sayəsində 2013-cü ildə 500 tondan yuxarı yaşıl çay istehsalı proqnozlaşdırılır.

Rayonun aqrar bölməsində 71 kəndli fermer təsərrüfatı yaradılmışdır. Sahibkarlar və fermer təsərrüfatlarının rəhbərləri üçün yaradılan imkan və şərait onları daha bol və keyfiyyətli məhsul istehsal etməyə ruhlandırmışdır. 2012-ci ildə 3 min hektarda aparılan əkinlərdən 44 min 475 ton müxtəlif növ tərəvəz məhsulları götürülmüşdür. Şiyəkəran, Şahağac, Kakalos, Pensər və digər kəndlərin ərazilərindəki fermer təsərrüfatları yüksək məhsuldarlıq əldə etmişlər. Subtropik meyvəçilik Astaraya şöhrət gətirən sahədir. Rayonun aran və dağətəyi ərazilərində 1600 hektara yaxın sitrus və subtropik meyvə bağları var. Fərdi həyətyanı sahələrdə də çoxlu sayda meyvə ağacları əkilmişdir. 2012-ci ildə bağlardan 25 min tondan çox feyxoa, narıngi, limon, portağal və kivi yığılmışdır. 2011-ci illə müqayisədə artım 2 min tondan çoxdur. Çəltikçilik də Astara üçün ənənəvi sahədir. Yerli əhali 80 ildən çoxdur ki, bu bitkinin əkin-biçini ilə məşğuldur. Ağır əl əməyi tələb olunan çəltikçiliyi astaralılar inamla yaşadırlar. Əkin sahələrinin ildən-ilə müəyyən qədər azalması, mövcud çətinliklər çəltik əkib becərənləri əsla ruhdan salmır. Təkcə 2012-ci ildə əkilmiş 130 hektar sahədən 700 tona yaxın məhsul götürülmüş, hər hektarın məhsuldarlığı 55 sentner olmuşdur. Rayonda çəltik sahələrinin azalmasının qarşısını almaq üçün yeni yollar, imkanlar aranır. Çəltik becərənlərə tövsiyə olunub ki, kollektiv formada təsərrüfat yaratsınlar, əkin üçün ilk növbədə qələvili, bataqlıq, suyun yer səthinə yaxın olduğu torpaqları seçsinlər.

Astarada heyvandarlıq sahəsi də inkişaf edir. 2012-ci ilin statistik məlumatına əsasən, rayonda 2 min 522 ton diri çəkidə ət, 16 min 875 ton süd, 4 milyon 481 min ədəd yumurta, 22 ton yun istehsal olunmuş, mal-qaranın sayı 28 min 773 başa çatdırılmışdır.

Sosial problemlərin həlli diqqət mərkəzindədir

İqtisadi inkişaf rayonda sosial problemlərin həllinə güclü təkan verir. Məsələn, 2012-ci ilin əvvəlində rayonda əhalinin şəxsi vəsaiti hesabına ümumi sahəsi 4 min 80 kvadratmetr olan 34 fərdi yaşayış evi tikilmişdir. Bundan əlavə, hazırda Astara şəhərində doqquzmərtəbəli ictimai yaşayış binası inşa olunur. Rayonda ümumtəhsil məktəbləri üçün yeni binaların inşasına da diqqət artırılır. 2012-ci ildə Astara şəhərində 7 nömrəli tam orta məktəb üçün tikilmiş təzə bina yeni dərs ilinin ilk günündə istifadəyə verilmişdir. Şüvi, Vaqo, Siyakü, Hamoşam, Suparibağ, Rüdəkənar, Telman, Şağlazüzə, Asxanakəran və Motlayataq kəndlərində isə yeni məktəb binalarının bünövrələri qoyulmuşdur və hazırda həmin obyektlərdə sürətlə işlər gedir.

2012-ci ildə rayonun 30-dan çox kəndinə təbii qazın verilməsi bərpa edilmiş, ucqar dağ kəndləri olan Şovaş və Siyatük yaşayış məntəqələrinə təbii qaz verilmişdir. Hazırda Şüvi, Sərək Şahağacı və digər kəndlərin təbii qazla təmin edilməsi məqsədilə tədbirlər görülür, Astara şəhəri, Kijəbə qəsəbəsi, Ərçivan və Təngərüd kəndlərində köhnə təbii qaz boruları yenisi ilə əvəz olunur. Eyni zamanda rayondaxili və kəndarası yolların təmiri və asfaltlaşdırılması üçün bir sıra vacib işlər görülür. Artıq Telman kəndindəki yol asfaltlaşdırılmış, gediş-gəliş üçün lazımi şərait yaradılmışdır. Diqqətəlayiq faktdır ki, bu gün Astarada əhaliyə pensiya və müavinətlərin ödənilməsində problemlər yoxdur. Əhalinin sıx yaşadığı yerlərdə 6 bankomat quraşdırılmış və onların vasitəsi ilə pensiya, müavinətlər, həmçinin əməkhaqları vaxtında ödənilir.

Yeri gəlmişkən qeyd edək ki, 2012-ci ilin 9 ayında Astarada 390-dan çox yeni iş yeri açılmışdır. Rayon Məşğulluq Mərkəzində iş üçün müraciət edənlərin 215 nəfəri müxtəlif idarə və müəssisələrdə işlə təmin olunmuşdur.

Əhali ilə işgüzar görüşlər nəticəsiz qalmır

Rayon rəhbərliyi müntəzəm olaraq əhali ilə görüşlər və səyyar qəbullar keçirir, problemlərlə yerində tanış olur, operativ tədbirlər görür. 2012-ci ildə rayon mərkəzində, əksər kəndlərdə, o cümlədən dağ kəndlərində keçirilən belə görüşlər zamanı söylənilən təkliflər əsasında ictimai yaşayış binalarının dam örtükləri təzələnmiş, şəhər qəbiristanlığı üçün əlavə torpaq sahəsi ayrılmış, yararsız halda olan elektrik dirəkləri və transformatorları yenisi ilə əvəzlənmiş, kənddaxili yollar təmir edilmiş, çay kənarlarında bəndvurma, kanalların və arxların təmizlənməsi işləri görülmüşdür.

Əvvəlki illərdə olduğu kimi, 2012-ci ildə də Astarada tikinti, yenidənqurma və abadlıq işləri geniş vüsət almışdır. Şəhərin mərkəzindəki Heydər Əliyev parkının ərazisi genişləndirilmiş, ərazidə yeni fəvvarə və müasir işıqlandırma sistemi quraşdırılmış, təzə oturacaqlar qoyulmuşdur. Heydər Əliyev prospekti isə yenidən qurulur. Prospekt kənarındakı hasarlar daha zövq oxşayan hala salınır, ictimai yaşayış binalarının fasadları yeniləşdirilir. 2012-ci ildə şəhərin digər küçələrində də təmir və abadlıq işləri aparılmışdır. Özü də belə işlər təkcə Astara şəhərində deyil, Kijəbə qəsəbəsi və kəndlərdə də geniş vüsət almışdır. Onsuz da başdan-başa yaşıllıq diyarı olan Astarada yeni xiyabanların salınmasına və yeni ağaclar əkilməsinə daha çox diqqət yetirilir. Şəhər mərkəzində böyük dibçəklərdə rəngbərəng güllər, Astara-Bala Şahağacı yolu boyunca yerli növdən olan ağaclar əkilmişdir.

Bu yerlərin qonaqsız günü olmur

Astara tarixi-mədəni abidələrlə, mənzərəli guşələrlə, rahat istirahət yerləri ilə də zəngindir. Bu səbəbdən 2012-ci ildə bu yerlərə çoxlu sayda turist gəlmişdir. "Şindan", "Savalan", "Abşeron", "Relaks" və digər hotel və istirahət mərkəzlərində xidmət göstərmək üçün hər cür şərait yaradılmışdır. Yay aylarında "İstisu" ərazisinə və Xəzər dənizi sahillərinə gələn turistlər razı qalırlar.

Astara Azərbaycanın cənub nöqtəsidir. Hər gün buraya xarici ölkələrdən xeyli qonaq gəlib gedir. Gələnlər müstəqil Azərbaycan haqqında ilk təəssüratı buradan alırlar. Yaxşı haldır ki, bu təəssürat həmişə zəngin və heyranedici olur.

Seyran CAVADOV

Azərbaycan.-2013.- 10 yanvar.- S.5.