Qaxın kukla teatrı mingəçevirli uşaqların qonağı olub

 

Yeni il  münasibətilə Mingəçevir Şəhər İcra Hakimiyyəti valideyn himayəsindən məhrum, əqli və fiziki qüsurlu uşaqlar, şəhər bağçalarının, orta məktəblərin ibtidai siniflərinin uşaqları  üçün bayram şənliyi təşkil etmişdir.

Yeni il hədiyyəsi olaraq Qax rayonunun kukla teatrı balacaların qonağı olmuşdur. Kukla teatrı uşaqlara Molla Nəsrəddinin lətifələri əsasında hazırlanmış  tamaşa göstərmişdir. 400 nəfərə yaxın uşağın qatıldğı tədbirdə   icra hakimiyyətinin başçısı Niyazi Bayramov yeni nəslin fiziki və mənəvi inkişafına göstərilən dövlət qayğısından söz açmış,  Heydər Əliyev Fondunun bu sahədə həyata keçirdiyi çoxsaylı layihələrin əhəmiyyətini vurğulamışdır. Uşaqların sağlam böyüməsi üçün yaradılan nümunəvi şəraitdən danışan  şəhər rəhbəri uşaqlara xoş günlər arzulamışdır.  Fidan balalar Yeni ilin rəmzi olan Şaxta baba və Qarqızla yolka ətrafında rəqs etmiş, şəkil çəkdirmişlər. Bir-birini əvəz edən şeirlər, mahnılar, kicik səhnəciklər şənliyi daha da yaddaqalan etmişdir.  Uşaq Yaradıcılıq Mərkəzinin  təqdim etdiyi ədəbi-bədii kompozisiya alqışlarla qarşılanmışdır.

 

 

Esmira HİDAYƏTOVA,

Mingəçevir şəhər sakini

 

Azərbaycan.-2013.- 10 yanvar.- S.7.