Azərbaycanla ABŞ-ın Texas ştatı arasında əlaqələrin

daha da inkişafı üçün geniş imkanlar var

"Azərbaycan ilə Amerika Birləşmiş Ştatları, xüsusən də bir çox oxşar cəhətləri olan Texas ştatı arasında əlaqələrin müxtəlif sahələrdə inkişaf etdirilməsi üçün geniş imkanlar vardır. Səfərimin əsas məqsədi də bununla bağlı fikir mübadiləsi aparmaqdır". Bu sözləri Azərbaycanda səfərdə olan ABŞ Konqresinin üzvü Henri Roberto Cuellar dünən Milli Məclis Sədrinin birinci müavini Ziyafət Əsgərovla görüşdə söylədi. Azərbaycan-ABŞ dostluq əlaqələrindən razılıqla danışan Ziyafət Əsgərov bildirdi ki, ölkəmiz müstəqilliyini bərpa etdikdən sonra rəsmi Bakı ABŞ-la münasibətlərin inkişafına xüsusi diqqət yetirib. Sevindirici haldır ki, iki ölkə arasında münasibətlər strateji tərəfdaşlıq səviyyəsinə yüksəlib. Ermənistanın işğalçılıq siyasətindən və törətdiyi terror hadisələrindən əziyyət çəkən ölkəmiz beynəlxalq terrorizmə qarşı mübarizədə ilk gündən Birləşmiş Ştatların yanında olub. Azərbaycan NATO qüvvələri tərkibində beynəlxalq sülhyaratma əməliyyatlarında fəal iştirak edir.

Konqresmen Roberto Cuellar isə diqqətə çatdırdı ki, bu ilin aprelində bir qrup konqresmenlə birlikdə yenidən Azərbaycana səfərləri planlaşdırılır. Qonaq Azərbaycan ilə Texas ştatının oxşar cəhətlərinin çox olduğunu da bildirdi: "Əlaqələrimizin hərtərəfli inkişafı üçün geniş imkanlar var. Hesab edirik ki, qarşılıqlı səfərlər və aparılan danışıqlar əməkdaşlığımızın daha da genişlənməsinə və xalqlarımız arasındakı dostluq münasibətlərinin möhkəmlənməsinə xidmət edəcəkdir". Görüşdə ölkələrimizin mövcud siyasi, iqtisadi və mədəni əlaqələrindən danışıldı, qarşılıqlı maraq doğuran məsələlərə dair fikir mübadiləsi aparıldı.

Azərbaycan.-2013.- 11 yanvar.- S.2.