Azərbaycan zəngin təbii sərvətlərinə və yerləşdiyi mövqeyə görə Texasa bənzəyir

Dünən Milli Məclisin Beynəlxalq əlaqələr və parlamentlərarası əlaqələr komitəsinin sədri, Azərbaycan-ABŞ parlamentlərarası əlaqələr üzrə işçi qrupun rəhbəri Səməd Seyidovun Azərbaycanda səfərdə olan ABŞ Konqresinin üzvü Roberto Cuellar ilə görüşü oldu.

Səməd Seyidov Azərbaycan ilə ABŞ arasında mövcud olan siyasi, iqtisadi və mədəni əlaqələrdən söhbət açdı. Qeyd olundu ki, dünyanın fövqəldövləti sayılan ABŞ-la münasibətlərin inkişafı Azərbaycanın xarici siyasətində əsas yerlərdən birini tutur. Azərbaycanın bu əlaqələri daha da genişləndirmək niyyətində olduğunu deyən Səməd Seyidov qarşılıqlı münasibətlərin strateji tərəfdaşlıq səviyyəsinə çatdığını söylədi. O, bu sahədə parlamentlərarası dostluq qruplarının fəaliyyətini yüksək qiymətləndirdi.

ABŞ Konqresində Texas ştatını təmsil edən Roberto Cuellar səmimi görüş və yüksək qonaqpərvərlik üçün minnətdarlıq etdi və bildirdi ki, Texasla Azərbaycan zəngin təbii ehtiyatlarına və yerləşdikləri coğrafi mühitə görə çox bənzərdirlər. Konqresmen Azərbaycanın onda yüksək təəssürat oyatdığını, bu ilin aprel ayında bir qrup konqresmenlə birlikdə yenidən Azərbaycana səfər planlaşdırıldığını dedi. Azərbaycan Diplomatiya Akademiyasında olduğunu vurğulayan qonaq hər iki ölkə arasında təhsil sahəsində aparılan təcrübə mübadiləsinin yaxşı nəticələr verəcəyinə ümidvar olduğunu vurğuladı.

Görüşdə qarşılıqlı maraq doğuran bir sıra məsələlər barədə fikir mübadiləsi aparıldı.

Azərbaycan.-2013.- 11 yanvar.- S.2.