Əsl ziyalı qaragüruh əxlaqından, mövqe dəyişikliyindən, avantürizmdən uzaq olmalıdır

Antiazərbaycançı şəbəkənin təsiri altında olan "ziyalı"lar qrupunun fəaliyyəti ölkənin milli maraqları əleyhinə yönəlib

Ziyalıların cəmiyyətin inkişafında, problemlərin dərk edilərək həll edilməsində vəzifələri böyükdür. Azərbaycan cəmiyyətində də ziyalı sözünə hər zaman böyük dəyər verilir. Təəssüf ki, bu gün adını ziyalı qoyan 20-30 nəfərin toplaşdığı bir qurumun nümyəndələri bütün Azərbaycan adından qeyri-obyektiv bəyanatlar verərək ölkə ictimaiyyətini çaşdırmaq istəyirlər. Öz şəxsi problemlərini qabartmaqla bunu xalqın problemi kimi qələmə verməyə cəhd göstərən bu "ziyalı" qrupunun müəyyən dairələrin təsiri altına düşməsi və heç bir normaya sığmayan hərəkətləri yalnız təəssüf doğurur.

Prezident İlham Əliyev ilk gündən xalqın milli mədəniyyətinin və mənəviyyatının qorunub saxlanılmasına, inkişaf etdirilməsinə xidmət edən strateji siyasi kursa üstünlük vermişdir. Milli dövlətçilik dəyərlərinin əsasını sağlam cəmiyyət təşkil edir. Sağlam mənəviyyatlı, yüksək bilikli insanlardan ibarət cəmiyyət qarşıya çıxan bütün problemləri asanlıqla həll edir, monolit qüvvə kimi fəaliyyət göstərir. Gələcək uğurlarımıza yeganə təminat isə sağlam cəmiyyət quruculuğuna diqqəti artırmaq, köklü mənəvi dəyərləri yeni nəslə və bütün cəmiyyətə daha dərindən aşılamaqdır. Azərbaycanda bütün sahələrdə əldə edilmiş uğurları gözü götürməyən xarici antiazərbaycançı dairələr ölkə daxilindəki destruktiv müxalifət dairələrindən, eləcə də ziyalılardan istifadə etməyə çalışırlar. Onların əsas hədəfi də öz fəaliyyətləri ilə cəmiyyətdə elə də maraq kəsb etməyən reneqatlardan ibarət "ziyalı" qrupudur. Bu qrupda, əsasən, Azərbaycan hakimiyyətindən məhz şəxsi mənafeləri ucbatından incik düşənlər, növbəti dəfə deputat seçilməyənlər üstünlük təşkil edirlər. Azərbaycan isə artıq öz inkişaf və qüdrətinin elə bir həddindədir ki, hər hansı kənar qüvvənin daxili işlərinə qarışmasına qətiyyən yol verməz. Buna cəhd edənlər hər zaman qanunun tələblərinə müvafiq cəzalarını alacaqdır.

Azərbaycan xalqı 1992-1993-cü illərdə cərəyan edən ağır və mürəkkəb prosesləri hələ unutmayıb. O illərdə Azərbaycanda hakimiyyətdə xalqın etimad göstərdiyi siyasi qüvvənin olmaması dövlət idarəçiliyi mexanizmlərinin formalaşmasında ciddi maneəyə çevrilməklə yanaşı, daxili böhranın, vətəndaş itaətsizliyinin, xaos və anarxiyanın yaranmasına rəvac vermiş, qanunçuluğun və hüquq qaydalarının təminatı, vətəndaşların azad, təhlükəsiz yaşamaq hüququnun, ən nəhayət, ictimai asayişin qorunması sahəsində əsaslı problemlər yaratmışdı. Məhz həmin ağır dönəmdə Dağlıq Qarabağda uğursuzluqlara düçar olduq və ərazilərimizi itirdik. Bu səbatsız qüvvələr nədənsə unudurlar ki, xaos və anarxiya, vətəndaş itaətsizliyi, siyasi, iqtisadi və mənəvi böhran dövrü kimi səciyyələnən "siyasi eksperimentlər" dövrü artıq başa çatıb.

Özlərini "ziyalı" adlandıran bir qrupun nümayəndələrinin fəaliyyətləri isə əsl ziyalı təfəkkürü və dünyagörüşü ilə qətiyyən üst-üstə düşmür. Bu qrupda təmsil olunanlar bircə dəfə də olsun Azərbaycanın son illərdə əldə etdiyi nailiyyətlərə münasibət bildirməyiblər. Sual olunur: bəs onda əsl ziyalı mövqeyi harada qaldı? Ad almaq, hansısa titula sahib olmaq hələ ziyalı olmağa dəlalət etmir. Belə "ziyalı" qrupunda təmsil olunan şəxslərin ümummilli maraqlar pərdəsi altında gizlənərək şəxsi ambisiyaları uğrunda mübarizə apardıqları hər kəsə məlumdur. Eldar Namazov, Rüstəm İbrahimbəyov kimi "reneqatlar" dəstəsi ilk gündən ictimai və siyasi baxımdan özünü doğrulda bilmədi. 2013-cü il prezident seçkiləri ərəfəsində bu qrup yenidən fəallaşaraq ən müxtəlif "qara piar" kampaniyaları aparmaqla məşğuldur. E.Namazovun seçkilərdə iştirak edəcəyini bəyan edərək hakimiyyət əleyhinə radikal çıxışlar etməsi də seçkiqabağı siyasi şou kimi dəyərləndirilə bilər.

Bu günlərdə isə "ziyalı"lar qrupu Azərbaycan ordusunda bir nəfər əsgərin ölümü ilə bağlı məsələyə özünəməxsus tərzdə münasibət bildirməklə baş vermiş hadisəni siyasi təbliğat vasitəsinə çevirmək niyyəti güdüblər. Hər bir məsələdən siyasi dividend götürməyə cəhd edən qaragüruhçu qrupun belə bir tələsik mövqeyi yalnız ikrah hissi doğurur. Baş vermiş hadisə ilə bağlı müvafiq qurumların zəruri tədbirlər həyata keçirməsindən xəbərsiz olan bu qrupun gündəmdə qalmaq üçün hətta faciəvi hallardan belə istifadə etmələri təəssüf doğurur.

Qeyd edək ki, Müdafiə Nazirliyinin Daşkəsən rayonunda yerləşən "N" saylı hərbi hissəsində həqiqi hərbi xidmətə çağırılmış Ceyhun Zaman oğlu Qubadovun 7 yanvar 2013-cü il tarixdə ölümü ilə əlaqədar Azərbaycan Respublikası Hərbi Prokurorluğunda Cinayət Məcəlləsinin 342.2-ci (Qulluğa səhlənkar yanaşma ağır nəticələrə səbəb olduqda) maddəsi ilə cinayət işi başlanıb. Bununla əlaqədar Müdafiə Nazirliyi və Hərbi Prokurorluğun rəhbər əməkdaşları müvafiq araşdırmaların aparılması məqsədilə hərbi hissəyə ezam olunublar. Müdafiə naziri, general-polkovnik Səfər Əbiyev Şəmkir hərbi birləşməsinin komandiri, general-leytenant Rövşən Əkbərovu cəzalandırıb. Nazirin imzaladığı əmr ilə birləşmə komandirinə şiddətli töhmət və sonuncu xəbərdarlıq edilib. Baş vermiş ölüm faktı ilə bağlı istintaqın gedişatı xüsusi nəzarətə götürülüb.

Ziyalının yeganə fəaliyyət amalı xalqın mənafeyini düşünən, onun sabahını prioritet hesab edən, dövlətin, dövlətçiliyin qorunmasına xidmət göstərən əsl vətəndaşlıq mövqeyi olmalıdır. Əsl ziyalı qaragüruh əxlaqından, mövqe dəyişikliyindən, avantürizmdən uzaq olmalıdır. Bu adı daşıyan insan elmə, maarifə, tərəqqiyə xidmət etməklə ziyalı missiyasını ləyaqətlə daşımalıdır.

Dövlətimizin ən ağır günlərində, siyasi təlatümlərin baş verdiyi vaxtlarda, ümummilli problemlərin həll olunduğu anlarda ziyalılar öz sözlərini deyiblər, dövlətçiliyimizə qənim kəsilənlərə qarşı sıx birləşiblər. Həmin zaman kəsiyində Azərbaycan ziyalıları xalq qarşısında böyük xidmətlər göstərmişlər. Azərbaycan dövləti də bunları bilir və ziyalıların cəmiyyətdəki rolunu daim yüksək qiymətləndirir.

Elnur HACALIYEV

Azərbaycan.-2013.- 12 yanvar.- S.2.