Əsgərin ölümündən siyasi məqsəd üçün istifadə etmək onun ruhuna hörmətsizlikdir

Xaricdən maliyyələşən, erməni lobbisinin və antiazərbaycançı şəbəkənin maraqlarına xidmət edən bəzi media orqanlarının və şəxslərin bu hadisədən sui-istifadə etmək cəhdləri təxribatçılıq fəaliyyətindən və çirkin siyasi planları həyata keçirmək niyyətindən başqa bir şey deyil

Həyatda heç kim və heç nə tam sığortalanmayıb. Ən ideal hesab etdiyimiz sahədə belə problem yarana və ya hansısa xoşagəlməz hadisə baş verə bilər. O cümlədən minlərlə insanın qulluq və xidmət etdiyi ordu sıraları da böyük strukturdur və qəti hökm etmək olmaz ki, burada problem baş verə bilməz. Nəzərə alsaq ki, bir hərbi hissədə yüzlərlə, minlərlə əsgər xidmət edir və onların hər birinin özünəməxsus dünyagörüşü, davranışı, tərbiyəsi var. Lakin əsas odur ki, Azərbaycan hüquq dövlətidir və orduda baş verən heç bir hadisə ört-basdır olunmur, günahkar varsa, mütləq məsuliyyətə cəlb edilir.

Müdafiə Nazirliyinin Daşkəsən rayonunda yerləşən "N" saylı hərbi hissəsində həqiqi hərbi xidmətə çağırılmış Ceyhun Zaman oğlu Qubadovun ölümü ilə əlaqədar başlanmış istintaqın gedişatının xüsusi nəzarətə götürülməsi də göstərir ki, dövlət öz vətəndaşının ölümündə günahkar olan hər kəsin layiqli cəzasını verəcək. Əsgərin ölümü ilə əlaqədar dərhal Respublika Hərbi Prokurorluğunda cinayət işi başlanılıb. Cinayət Məcəlləsinin 342.2-ci (Qulluğa səhlənkar yanaşma ağır nəticələrə səbəb olduqda) maddəsi ilə iş açılıb. Müdafiə Nazirliyi və Hərbi Prokurorluğun əməkdaşları müvafiq araşdırmaların aparılması məqsədilə hərbi hissəyə ezam olunublar. Cinayət işi üzrə istintaq-əməliyyat qrupu tərəfindən qısa müddət ərzində tam, hərtərəfli istintaq aparılmaqla təqsirkar şəxslərin cinayət məsuliyyətinə cəlb olunması təmin olunacaq və bu barədə ictimaiyyətə məlumat veriləcək. Təqsirkarların qanun qarşısında məsuliyyətə cəlb ediləcəyinə kimsənin şübhəsi yoxdur.

Eyni zamanda, hadisə ilə bağlı müdafiə nazirinin göstərişi ilə qurumun müvafiq strukturları tərəfindən C.Qubadovun xidmət etdiyi hərbi hissədə dərhal araşdırmalara başlanılıb. Müvafiq əmrlərlə bir neçə yüksək rütbəli zabit yol verdikləri qüsurlara və nöqsanlara, şəxsi heyətə nəzarəti düzgün təşkil etmədiklərinə görə intizam qaydasında ciddi şəkildə cəzalandırılıblar. Təqsirkar zabitlərə şiddətli töhmətdən tutmuş, hərbi rütbələrin endirilməsinə qədər müxtəlif cəzalar verilib.

Göründüyü kimi aidiyyəti dövlət orqanları əsgərin ölümünə ictimai diqqətin həssas münasibətini dərk edir və buna anlayışla yanaşır. Əsgərin ölümü ilə bağlı səslənən iddiaların üzərində araşdırmaların olduqca ciddi aparılması və açılmış cinayət işinin əvvəldə qeyd etdiyimiz kimi, xüsusi nəzarətə götürülməsi də bunu təsdiq edir. Burada qətiyyən başqa bir çalar axtarmaq səhv fikirdir. Təəssüf ki, bu hadisədən məhz özünün siyasi və digər məqsədləri naminə yararlanmağa cəhd göstərənlər də var. Əsgər bu dövlətin, xalqın övladıdır. O, hər birimiz üçün məsuliyyət daşıdığı kimi, dövlət də hər bir əsgərinə görə məsuliyyət daşıyır. Amma bu hadisədən dövlətin, hakimiyyətin əleyhinə, Azərbaycan Silahlı Qüvvələrinin nüfuzdan salınması istiqamətində istifadə olunması yolverilməzdir. Xaricdən maliyyələşən, erməni lobbisinin və antiazərbaycançı şəbəkənin maraqlarına xidmət edən bəzi media nəşrlərin və şəxslərin bu hadisədən sui-istifadə edərək, orduya və dövlətə qarşı kampaniya həyata keçirmək cəhdləri təxribatçılıq fəaliyyətindən və çirkin siyasi məqsədləri həyata keçirmək niyyətindən başqa bir şey deyil.

C.Qubadovun anası Samirə Qubadova da ictimaiyyətə müraciətində oğlunun ölümündən sui-istifadə edilməsini yolverilməz sayıb. Ailəsinə üz vermiş faciə ilə əlaqədar kədərinə şərik olduğuna görə hər kəsə minnətdarlığını bildirən ana müraciətində yazır: "Mən Azərbaycan dövlətinə, onun Prezidenti İlham Əliyev cənablarına inanıram və ümidvaram ki, oğlumun ölümü ilə əlaqədar başlanmış cinayət işi obyektiv araşdırılacaq və bu işdə təqsiri olan bütün şəxslər cinayət məsuliyyətinə cəlb olunmaqla layiqli cəzalarını alacaqlar. Bu hadisə ilə əlaqədar müxtəlif vəzifəli şəxslər tərəfindən qəbul olunmuşam. Mənə və ailəmizə verdikləri mənəvi dəstəyə və kədərimizi bölüşdüklərinə görə həmin şəxslərə, eyni zamanda Milli Məclisin üzvlərinə dərin təşəkkürümü bildirirəm. Mənə və ailəmizə dövlətimizin və hökumətimizin dəstəyi yetərlidir. Mənim kədərimdən, mənim qüssəmdən heç kəsin sui-istifadə etməsinə ixtiyarı yoxdur. Xahiş edirəm bu hadisədən siyasi məqsədlər üçün istifadə olunmasın və bununla bağlı hər hansı aksiyanın keçirilməsinin tamamilə əleyhinəyəm".

Əsgər ölümünün böyük itki olduğunu vurğulayan Milli Məclisin deputatı Mübariz Qurbanlı bildirdi ki, Ali Baş Komandan İlham Əliyevin rəhbərliyi ilə ordu quruculuğuna, əsgərlərin təhlükəsizliyinə çox böyük diqqət yetirilir.

Başqa ölkələrin ordularında da bu cür hadisələrin baş verdiyini xatırladan Mübariz Qurbanlı Respublika Hərbi Prokurorluğunda yaradılan istintaq qrupu tərəfindən başlanan cinayət işini yaxından izlədiyini qeyd etdi: "Hərbi Prokurorluq operativ işləyir, müvafiq tədbirlərini də görüb. Eyni zamanda, Müdafiə Nazirliyi və ölkədə digər bu məsələyə məsul qurumlar tərəfindən də araşdırılma istiqamətində ciddi iş gedir. Biz birmənalı şəkildə bu əsgərin hansı şəraitdə, necə həlak olmasının araşdırılaraq nəticənin ortaya qoyulmasını və cinayətkarların cəzalandırılmasını gözləyirik. Əminəm ki, tezliklə araşdırmalar öz nəticəsini verəcək, ictimaiyyət və mərhum əsgərin ailəsi məlumatlandırılacaq. İstənilən halda biz orduda baş verən bütün neqativ halları pisləyirik".

Deputat onu da dedi ki, baş verən bu hadisədən kimlərsə sui-istifadə etməməlidirlər: "Çox təəssüf ki, Azərbaycan Ordusunda baş verən hər hansı bir hadisə ilə bağlı aqressiv müxalifət və müəyyən dairələr hakimiyyətə qarşı qərəzli kampaniyalar aparırlar. Ordu bizim ümummilli məsələmizdir və oradakı əsgərlər hamımızın balasıdır. Ona görə də onlarla bağlı baş verən hadisədən bu cür sui-istifadə etmək olmaz. Həlak olan əsgərin üzərində siyasi kampaniya qurmaq olmaz".

Milli Məclisin deputatı, tarix elmləri doktoru, professor Musa Qasımlı: - Ordu millətin bağrından çıxıb və bizim qürur mənbəyimizdir: "Ordu millətin, dövlətindir. Hər bir azərbaycanlının ölümü isə bizim üçün itkidir və ağır faciədir.

Ancaq diqqət yetirsək, görərik ki, bütün ölkələrin, demək olar, hamısının ordularında əsgər ölümü faktına rast gəlinir. Əsgər ölümünü siyasiləşdirmək, şişirtmək yox, səbəbləri ciddi şəkildə araşdırılmalıdır. Odur ki, Respublika Hərbi Prokurorluğu da bu məsələnin istintaqını aparıb, təqsirkar şəxsləri cəzalandıracaqdır. Əsgər ölümünü siyasi məqsədlər üçün təbliğata çevirməyə gəldikdə bu, "əsgərimizin ruhunu incitməkdir, ailəsinə hörmətsizlikdir, bütün millətə sayğısızlıqdır".

Milli Məclisin deputatı Məlahət İbrahimqızı da bildirdi ki, bu cinayəti törədənlər mütləq cəzalandırılacaqlar: "Orduda baş verənlərə görə məsuliyyət yalnız nazirliyin üzərinə düşmür. Bütövlükdə cəmiyyət bu məsələdə məsuliyyət daşıyır, o cümlədən siyasətçilər, müəllimlər, ziyalılar və valideynlər. Çünki biz övladlarımızı hərtərəfli şəkildə, psixoloji, fiziki və mənəvi cəhətdən kamil formada orduya göndərməliyik. Buna böyük ehtiyac var. Ordu da cəmiyyətimizin bir hissəsidir. Artıq hadisə ilə bağlı cinayət işi də açılıb. Hesab edirəm ki, təmkinli olmaq, gözləmək lazımdır. Bəzi insanlar bunu siyasiləşdirməyə, ayrı mövqedən yanaşmağa çalışırlar. Ancaq buna ehtiyac yoxdur. Çünki Ali Baş Komandanın, Müdafiə Nazirliyinin gördüyü işlər göz qabağındadir. Hamının yaxşı bildiyi bir cəhəti də qeyd edim ki, Azərbaycanda ordu quruculuğuna böyük diqqət ayrılır, əsgərlərimizin öz hərbi xidmətlərini yerinə yetirmələri, onların vətənə olan borclarını qaytarmaları üçün hər cür şərait, imkan yaradılır. Azərbaycan Ordusu, Azərbaycan əsgəri bu gün dövlətin, ölkə Prezidentinin diqqət və qayğısı altındadır".

Rəşad CƏFƏRLİ,

Rəşad BAXŞƏLİYEV

Azərbaycan.-2013.- 13 yanvar.- S.2.