Paskal MÖNYE: Fransa tərəfi bundan sonra da Azərbaycanın peyk sənayesinin inkişafına öz töhfəsini verəcəkdir

Rabitə və informasiya texnologiyaları naziri Əli Abbasov Fransanın ölkəmizdəki səfiri Paskal Mönye ilə görüşmüşdür.

Nazirliyin mətbuat xidmətindən bildirmişlər ki, görüşdə Azərbaycan və Fransa arasında

informasiya-kommunikasiya texnologiyaları (İKT) sahəsində əməkdaşlıq məsələləri müzakirə olunmuş, "Azərspace-1" telekommunikasiya peykinin bu ilin fevralında orbitə çıxarılacağı qeyd olunmuşdur. Bildirilmişdir ki, peyk Cənubi Amerikada Fransa Qvianasında yerləşən "Kuru" kosmodromundan bu ölkənin "Arianespace" şirkətinin "Ariane-5" raket daşıyıcısı ilə orbitə çıxarılacaqdır.

Telekommunikasiya peykinin Azərbaycanın gələcək inkişafında mühüm rol oynayacağını vurğulayan Paskal Mönye Fransa tərəfinin bundan sonra da Azərbaycanın peyk sənayesinin inkişafına öz töhfəsini verəcəyini bildirmişdir.

Səfir fransız şirkətlərinin ötən il olduğu kimi, bu il də "BakuTel-2013" XVIII Beynəlxalq sərgisində milli pavilyonla təmsil olunacağını bildirmişdir. Paskal Mönye Avropa İttifaqı ilə Azərbaycan arasında münasibətlərin yeni mərhələyə qədəm qoyması məqsədilə iyun ayında Brüsseldə keçirilməsi nəzərdə tutulan "Avropa-2020 - Azərbaycan-2020" adlı konfransda Fransanın da fəal iştirak edəcəyini qeyd etmişdir.

Əli Abbasov fransız şirkətləri ilə əməkdaşlığın hər iki ölkə üçün faydalı olacağını bildirmişdir.

Azərbaycan.-2013.- 16 yanvar.- S.5.