Xalq artisti Rasim Balayev Azərbaycan Kinematoqrafçılar İttifaqını tərk etdiyini bəyan etmişdir

Son günlər kütləvi informasiya vasitələrində Azərbaycan Kinematoqrafçılar İttifaqının fəaliyyəti ilə bağlı çoxsaylı məlumatlar yayılmaqdadır. Bu məlumatlarda ölkənin görkəmli sənət adamlarının adı hallandırılır. Azərbaycan Respublikasının xalq artisti, prezident təqaüdçüsü Rasim Balayev yanvarın 18-də bununla bağlı bəyanat yaymışdır. Bəyanatda deyilir:

"Son zamanlar Rüstəm İbrahimbəyovun təsis etdiyi və mənim katib olduğum Azərbaycan Kinematoqrafçılar İttifaqı barədə mediada müxtəlif söz-söhbətlər dolaşmaqdadır.

Bildirirəm ki, mən Rüstəm İbrahimbəyovu istedadlı dramaturq və rejissor kimi tanımışam, hazırda da bu fikirdəyəm. Biz uzun müddət Azərbaycan Kinematoqrafçılar İttifaqında birgə çalışmışıq və İttifaqın yaranmasında məqsəd Azərbaycan kino sənətinə dəstək və töhfə vermək olmuşdur. Mən bir Azərbaycan ziyalısı və kino sənətinin inkişafında rolu olan şəxs kimi hesab edirəm ki, həqiqətən hər bir ziyalı lazım gəldikdə millətinin, xalqının sözünü deməyi bacarmalıdır. Lakin bu gün dünyada Azərbaycan Respublikasının uğurlarını gözü götürməyən, hər addımda Azərbaycanı özündən asılı görmək istəyən qüvvələrin kifayət qədər çox olduğu bir dövrdə hesab edirəm ki, hər bir Azərbaycan ziyalısının borcu möhtərəm cənab Prezidentin səsinə səs vermək, Azərbaycan həqiqətlərinin dünyaya çatdırılmasında onun yanında olmaqdır. Bu vəzifə üçün isə hər kəs öz sahəsində bilik və bacarığını ölkəmizin inkişafına yönəltməlidir.

Şəxsiyyətinə hörmət bəslədiyim Rüstəm İbrahimbəyovun son zamanlar daha çox siyasətə qoşulmasını böyük təəssüf hissi ilə qarşılayır və hesab edirəm ki, çoxminli tamaşaçı sevgisini qazanan bir sənətkar, ziyalı olaraq bu təşkilatı tərk etməli, bütün bacarığımı Azərbaycan mədəniyyətinin, kino sənətinin inkişafına və təbliğinə yönəltməliyəm.

Bütün mediadan, digər insanlardan bu məsələni siyasiləşdirməməyi və bu bəyanatın sırf yaradıcılıqla məşğul olmaq istəyimdən irəli gəldiyini nəzərə almalarını xahiş edirəm.

Rasim BALAYEV,

Bakı şəhəri, 18 yanvar 2013-cü il"

Azərbaycan.-2013.- 19 yanvar.- S.4.