Ürəklərdə gör nələr var

 

Kətan üzərinə köçən duyğular

 

20 Yanvar faciəsi ilə bağlı yaşlı nəslin və orta nəslin iztirabları bəllidir. Qanlı faciə onların gözləri qarşısında olub. İllər keçdikcə yaralar için-için qövr edir. Bu, təbiidir. Həmin qəfil bəlanı görməyən, ondan xeyli sonralar dünyaya gələn körpə fidanların, gənc oğlan və qızların ürəkləri çoşduran duyğuları daha çox hörmət və ehtiram doğurur. Deməli, mərd ataların layiqli davamçıları, müstəqil ölkənin sadiq-sədaqətli nəsli yetişir.

Samux rayonunda "20 Yanvar şagirdlərin gözü ilə" adlı sərgiyə baxarkən bu hisslər hər kəsin qəlbini çoşdurur. Yüzlərlə rəsm 20 Yanvar faciəsinə həsr olunub. Bu əsərlər bəlkə də sənət baxımından o qədər də kamil deyil. Lakin onlardakı duyğular ürəklərə işıq salır, min bir təəssürat yaradır. Düşünürəm, körpə ürəklərdə gör nələr var! Vətənə  məhəbbət, düşmənə nifrət hər bir əsərin ana xəttini təşkil edir. Xüsusən şəhər 3 nömrəli məktəbin şagirdi İbrahim Tamalidzenin, Yenikənd məktəbinin şagirdi Elvin Əhmədlinin, Ziyadlı məktəbinin şagirdi Gözəl Şahverdiyevanın, Paraağasbəyli kənd məktəbinin şagirdi Zeynəb Xəlilovanın və başqalarının əl işləri daha böyük maraq doğurur.

Əhmədbəyli kənd məktəbinin əlaçı şagirdi Elvinin iki işi nümayiş olunur. İkisi də gözəl, ikisi də maraqlı, mənalı! Elvin milli qəhrəman Elton İsgəndərovun qardaşıdır. Onun kimi qeyrətli, hünərvərdir. Elton İsgəndərov ilə bütün Samux əhli fəxr edir. Cəlilabad rayonunun Əsədli kəndi yaxınlığında yerləşən sərhəd zastavasının xidmət ərazisində dövlət sərhədini keçməyə çalışan quldurların qarşısını alıb. Namərdlər ciddi müqavimətə rast gələndə  iki ədəd əl qumbarası atdılar. Elton İsgəndərov cəld hərəkətlə  qumbaraların üstünə atılaraq sərhədçi yoldaşlarının həyatını xilas etdi. İgid əsgər Elton öldü. İki sərhədçi zabitimiz isə yaralansa da, sağ qaldı. Elvin deyir ki, hər necə olur-olsun, o namərdlərdən qardaşımın qisasını alacağam. Onun davranışında, təhsil və tərbiyəsində, həyata münasibətində bu mübariz ruh çox aydın duyulur. Burada hamının qəlbi sözlə doludur. Şəhid Yedigarovun qardaşı qızı Sevinc isə düşmənə nifrətini Bəxtiyar Vahabzadənin ölməz misraları ilə bəyan edir:

 

İnsan insan olur öz hünəriylə,

Millət millət olur xeyri, şəriylə.

Torpağın bağrına cəsədləriylə

Azadlıq toxumu əkdi şəhidlər.

 

Sevinc deyir ki, biz onların arzularını yaşatmalıyıq. Bu, bizim vətəndaşlıq borcumuzdur.

Samux cəsurlar, igidlər diyarıdır. Ötən əsrin doxsanıncı illərində hər cür bədxah qüvvələrdən rayonu qoruyub saxladılar, Qarabağ döyüşlərində mərd, mərdanə vuruşdular. Çox da böyük olmayan bu rayon 101 şəhid verib. Həsən Atakişiyev "Azərbaycan Bayrağı" ordeni ilə təltif olunub. Elton İsgəndərov Milli Qəhrəman adına layiq görülüb.

Təcrübəli təhsil işçisi Gülağa Hüseynov deyir ki, samuxlular həmişə dövlətə, dövlətçiliyə sadiq-sədaqətli olublar. Onların hər biri işğal altında olan  torpaqların azad olunması üçün ən ciddi sınaqlara hazırdır. Məktəblərdə vətənpərvərlik tərbiyəsinə xüsusi fikir verilir. Müntəzəm surətdə 20 Yanvar, Xocalı faciəsi digər qanlı olaylarla bağlı tədbirlər keçirilir, sərgilər təşkil olnur. Bu günlərdə rayonun bütün məktəblərində təşkil olunmuş "20 Yanvar - qan yaddaşı" adlı inşa yazılarında Samux şəhər 2 nömrəli orta məktəbin şagirdi Tərlan İmamquliyeva birinci, Hacalı kənd məktəbinin şagirdi Gülmira Həsənova ikinci, İstixana qəsəbə məktəbinin şagirdi Zəhra Verdiyeva üçüncü yerə çıxdılar. Şahmat məktəbində idman məktəblərində keçirilən yarışlarda da qaliblərə fəxri fərmanlar hədiyyələr verilmişdir.

Rayonda şəhidlərin xatirəsi əziz tutulur. Neçə məktəb mərd oğulların adını daşıyır. Ziyadlıda, Sərkərdə, Kolayırda xatirə abidələri ucalır. Qarayeridə Şəhidlər xiyabanı yaradılıb. Bütün bunların nəticəsidir ki, ali hərbi məktəblərə Naxçıvanski adına məktəbə oxumağa gedənlərin sayı ilbəil artır.

Samux məktəblilərinin əl işləri nümunəvi inşa yazıları hüzn günü  ümumrayon tədbirində nümayiş etdiriləcəkdir.

 

 

Əhməd İSAYEV

 

Azərbaycan.-2013.- 20 yanvar.- S.8.