Azərbaycan və Uruqvay arasında əlaqələrin inkişafı üçün hər cür şərait var

Azərbaycanda səfərdə olan Uruqvay Respublikası Prezidentinin xüsusi elçisi, Prezident Administrasiyasının dövlət katibi Diyeqo Kanepa dünən Milli Məclisin Sədri Oqtay Əsədovla görüşdü.

Oqtay Əsədov bildirdi ki, bu cür səfərlər hər iki ölkə arasındakı əlaqələrə öz töhfəsini verəcək. Azərbaycan Uruqvay ilə hərtərəfli əlaqələrin inkişafında çox maraqlıdır. İki ölkə arasında son zamanlar bir sıra mühüm işlər həyata keçirilib: "Əminəm ki, yaxın zamanlarda bütün sahələr üzrə əlaqələrimiz inkişaf edəcək və bu səfərlər münasibətlərimizin daha da möhkəmlənməsinə xidmət göstərəcək".

Milli Məclisin Sədri diqqətə çatdırdı ki, müstəqil Azərbaycan Respublikası az bir vaxtda belə sürətli inkişafa nail olub. Müstəqilliyinin ilk illərində başqa ölkələrdən yardım alan Azərbaycan indi borcverən ölkəyə çevrilməklə yanaşı, tək bölgədə deyil, Avropada da irimiqyaslı layihələr həyata keçirir. Son böyük layihələrdən biri isə Trans-Anadolu qaz boru kəməridir (TANAP). Oqtay Əsədov onu da bildirdi ki, iki ölkə arasında əlaqələrin inkişafı üçün hər cür şərait var. Yaxın günlərdə isə Uruqvayın Azərbaycanda səfirliyinin açılması bu əlaqələrin daha da möhkəmlənməsinə xidmət edəcək.

Diyeqo Kanepa isə öz növbəsində əməkdaşlığın inkişaf etdirilməsi üçün yaxşı imkanların olduğunu qeyd etdi. O, ölkəsinin Azərbaycan ilə müxtəlif sahələrdə əlaqələri genişləndirməkdə maraqlı olduğunu bildirdi. Uruqvaylı qonaq ölkəmizə səfəri zamanı paytaxtımızda gedən yüksək inkişaf proseslərinin və abadlıq-quruculuq işlərinin onda dərin təəssürat yaratdığını dedi.

Görüşdə qarşılıqlı maraq doğuran digər məsələlər ətrafında da fikir mübadiləsi aparıldı.

Azərbaycan.-2013.- 22 yanvar.- S.2.