Azərbaycanda insan amilinə diqqət öndə olan məsələlərdəndir

On beş ildir ki, ölkəmizdə ölüm hökmü çıxarılmır

1995-ci ildən ölkədə, Amnistiya institutu təsis edilsə də, bəzi beynəlxalq dairələr dövlətimizin atdığı humanist addımların nəcibliyini təsdiqləməkdə "çətinlik" çəkirlər. Ədalətsiz bəyanatlar yaymaqda, qərəzli mövqedən çıxış etməklə ad çıxaran "Freedom House", "Human Rights Watsh", "Amnistey İnternational" kimi təşkilatlar 1998-ci il fevralın 10-da ölkədə ölüm hökmünün ləğvi ilə bağlı qərarı indiyədək hesabatlarında qeyd etməyi nədənsə özlərinə ar bilirlər.

Ölkəmizdə problem axtaran bəzi qüvvələr Azərbaycan əleyhinə şəbəkələr qurmağa çalışır, islam amilini ortaya atır, gah da ölkəmizi azad olmayan ölkələr siyahısına salırlar. Onlar əsl həqiqəti görmək istəmirlər. Çünki Azərbaycanın yürütdüyü müstəqil siyasəti qəbul etmir, xalqımızın sürətlə artan tərəqqisinə qısqanclıqla yanaşır, hətta bunu açıq şəkildə büruzə verirlər. Onlar bu sürətli inkişafa çox qıcıqlanırlar. İkili standart üzərində köklənən xarici qüvvələrin və dəstəkçilərinin məqsədi hər zaman Azərbaycanı dünyada nüfuzdan salmaqdır. Buna görə də onlar heç vaxt ölkəmizdə gedən uğurlu işləri görmür, görünəni belə özlərinin düşüncəsi kimi qara rəngə boyayırlar.

Dünya yaxşı bilir ki, on beş ildir Azərbaycanda ölüm hökmü ləğv edilib. Təəssüf ki, Azərbaycana qarşı çirkin kampaniyalar aparan "Freedom House", "Human Rights Watsh", "Amnistey İnternational" kimi təşkilatlar bir dəfə də olsun, bunu hesabatlarında qeyd etməyiblər. Qərəzsiz olan təşkilatın məqsədi hesabat apararkən həmin ölkənin vəziyyətini düzgün qiymətləndirməli, dərin təhlil aparılmalı, doğru hesabat hazırlanmalıdır. Bu qurumların necə qərəzli olduqları aydınca görünür. Ölüm hökmünün ləğv olunması Avropa Şurasının quruma üzv dövlətlərinin qarşısında müəyyənləşdirdiyi tələblərdən biri idi. Buna uyğun olaraq 1998-ci il yanvarın 22-də ulu öndər Heydər Əliyev Azərbaycanda ölüm hökmünün ləğvi ilə bağlı Milli Məclisdə qanunvericilik təşəbbüsü ilə çıxış etdi. Bu təşəbbüs əvvəlcə parlamentdə müzakirə olundu, sonra da ədalət, azadlıq, humanizm və insanpərvərlik kimi yüksək ideallar rəhbər tutularaq ölkədə ölüm cəzasının ləğv edilməsi qərarına gəlindi. Məqsəd Azərbaycan vətəndaşlarının şərəf və ləyaqətinin qorunması, demokratik prinsiplərin inkişafı, əhalinin həyat səviyyəsinin yüksəldilməsi idi. 1998-ci il fevralın 10-da bu tarixi qərar qəbul edildi, halbuki indiyədək də Avropa Şurasının üzvü olan bir neçə ölkə bu qərarı qəbul etməkdən çəkinir. Ölüm cəzasının ləğv edilməsi nüfuzlu beynəlxalq təşkilatların, əsasən də Avropa Şurasının bu qurumun üzv dövlətlərinin qarşısında müəyyənləşdirdiyi tələblərdən biri idi.

İnsan hüquqlarının qorunması isə ən prioritet vəzifə kimi qarşıya qoyuldu. Ulu öndər bu sahədə müdrik addımlar atdı. Başlanan yol ölkəmizi tezliklə beynəlxalq aləmə yaxınlaşdırdı. Demokratik, hüquqi və dünyəvi dövlət quruculuğunun hüquqi əsasları və insan hüquq və azadlıqlarının qeyd-şərtsiz təmin olunması Əsas Qanunumuzda öz əksini tapmışdır. Heydər Əliyev ilk növbədə, məhkəmə-hüquq sistemində zamanın tələbləri ilə ayaqlaşan mütərəqqi islahatlar apardı. 1998-ci ildə həm Şərqdə, həm də MDB məkanında ilk dəfə olaraq Azərbaycanda ölüm hökmünün ləğv edilməsi buna misaldır. 1995-ci ildə ölkədə Amnistiya institutu təsis edildi. Azərbaycan Respublikası Prezidenti yanında Əfv Komissiyası yaradıldı. Cəmiyyətin ən müxtəlif təbəqələrini əhatə edən əfv sərəncamlarının və amnistiya haqqında fərmanların verilməsi qısa zamanda cəmiyyətdə yararlı, qanunların aliliyi prinsipini tərəddüdsüz qəbul edən vətəndaşların reabilitasiyasına fundamental töhfələr oldu. Bədxahlar bunu görməsə də, Azərbaycan inkişaf strategiyasını sürətlə davam etdirəcək, demokratik inkişaf yolundan dönməyəcək, insan hüquqlarının müdafəsi istiqamətində islahatları inamla davam etdirəcək.

Rəsmiyyə RZALI

Azərbaycan.-2013.- 23 yanvar.- S.5.