Azərbaycanın birinci xanımı Mehriban Əliyevanın Pakistanda layiq görüldüyü «Humanizm simvolu-2012-ci ilin adamı» mükafatının təqdimat mərasimi keçirilmişdir

Xəbər verdiyimiz kimi, Pakistanın nüfuzlu "Daily Times" qəzeti və Qadın Könüllülər Təşkilatı Azərbaycanın birinci xanımı, Heydər Əliyev Fondunun prezidenti Mehriban Əliyevanı "Humanizm simvolu-2012-ci ilin adamı" elan etmişdir. Yanvarın 22-də İslamabadın "Serena" mehmanxanasında mükafatın təqdimat mərasimi keçirilmişdir.

Tədbirdə Pakistan Milli Assambleyasının sədri vəzifəsini icra edən Fəsəl Kərim Kundi, Senatın sədr müavini Sabir Bəluc, Milli Assambleyanın humanitar məsələlər üzrə komitəsinin sədri, nazir Rubina Saadat Kaimxani, Senatın məlumat və yayım komitəsinin sədri Hacı Qulam Əli, müdafiə və müdafiə sənayesi komitəsinin sədri Müşahid Hüseyn, xarici əlaqələr komitəsinin sədri Hacı Adil, intizam komitəsinin sədri Seyid Məshədi, daxili işlər komitəsinin sədri Məhəmməd Talha Mahmud, senator Osman Seyfulla Khan, İslamabad Şəhəri İcra Hakimiyyətinin başçısı Tarik Pirzada, Pakistanın sabiq daxili işlər naziri, senator Vasim Xan, Milli Assambleyanın deputatı Humayun Seyfulla Xan, İslamabad Sənaye və Ticarət Palatasının sədri Zəfər Bəxtəvəri, digər dövlət və hökumət adamları, tanınmış ziyalılar, nüfuzlu universitetlərin rektorları, jurnalistlər, bir sıra ölkələrin İslamabaddakı səfirləri iştirak etmişlər.

Qadın Könüllülər Təşkilatının sədri xanım Samina Şah Azərbaycanın birinci xanımı Mehriban Əliyevanın təşəbbüsü və dəstəyi ilə Pakistanda həyata keçirilmiş humanitar layihələr haqqında geniş məlumat vermişdir. Qeyd edilmişdir ki, 2007-ci ildə Mehriban xanım Əliyevanın təşəbbüsü və dəstəyi ilə Pakistanın zəlzələdən zərər çəkmiş Müzəffərabad şəhərində qızlar məktəbi tikilmiş, 2012-ci ildə isə həmin təhsil ocağı əsaslı təmir edilmiş, orada yenidənqurma işləri aparılmışdır. Fond tərəfindən Pakistanda silsilə humanitar yardım proqramları çərçivəsində "Edhi Home" kimsəsizlər evində sığınacaq tapan uşaqlara tibbi baxış və hepatit B virusuna qarşı peyvəndləmə aparılmış, Peşavar şəhərində "Akbar Care" Serebral Paraliç İnstitutunda, həmçinin Xeybər Paxtunxva əyalətinin Laki Marvat şəhərinin qadınlar və uşaqlar xəstəxanasında imkansızlar üçün pulsuz müayinə təşkil edilmiş, İslamabad şəhərinin "Kulsum İnternational" klinikasında açıq ürək əməliyyatları maliyyələşdirilmiş, Həmzə Fonduna (Peşavar) müasir qanköçürmə avadanlığı və laboratoriya ilə təchiz edilmiş təcili tibbi yardım avtomobili və 2 min ədəd qanköçürmə paketi hədiyyə edilmiş, Xeybər Göz Fondunun yeni binasının inşası üçün maddi yardım göstərilmiş, Pakistanın bütün əyalətlərində Ramazan ayında iftar süfrələri təşkil edilmiş, Qurban bayramında Lakki Marvat bölgəsində və Pəncab əyalətində qurbanlıqlar kəsilərək əhalinin kasıb təbəqəsinə paylanılmışdır.

Xanım Samina Şah demişdir ki, "Daily Times" qəzeti və Qadın Könüllülər Təşkilatı bütün bunları nəzərə alaraq Mehriban xanımı "Humanizm simvolu-2012-ci ilin adamı" elan etmişdir.

Heydər Əliyev Fondunun prezidenti Mehriban xanımın nəcib və xeyirxah fəaliyyəti, rəhbərlik etdiyi fondun Pakistan da daxil olmaqla xarici ölkələrdə həyata keçirdiyi xeyriyyə tədbirləri barədə videoçarx nümayiş etdirilmişdir.

Pakistan Milli Assambleyasının sədri vəzifəsini icra edən Fəsəl Kərim Kundi Azərbaycanın birinci xanımı Mehriban Əliyevanın Pakistandakı fəaliyyətini qardaş ölkələrimiz arasında dostluq münasibətlərinin əyani göstəricisi kimi qiymətləndirmişdir. O, Mehriban xanım Əliyevanın uşaq və qadınların problemlərinin həlli ilə yaxından məşğul olmasının Pakistanın böyük qızı Bənazir Bhuttonun ideyaları ilə üst-üstə düşdüyünü xüsusi vurğulamışdır.

F.K.Kundi Pakistan ilə Azərbaycan arasında inkişafda olan qardaşlıq əlaqələrindən danışaraq bu münasibətlərin həyatın bütün sahələrini əhatə etdiyini bildirmişdir.

Pakistanda hökumətin sosial problemlərin həlli istiqamətində atdığı addımlardan, humanitar, səhiyyə və təhsilin inkişafına yönəltdiyi diqqətdən danışan Fəsəl Kərim Kundi Azərbaycanın birinci xanımı Mehriban Əliyevanın təşəbbüsü və dəstəyi ilə Pakistanın bütün əyalətlərində keçirilən humanitar tədbirlərin iki xalq arasında mövcud olan dostluq və qardaşlıq münasibətlərinin daha da möhkəmləndirdiyini vurğulamışdır.

Sonra Fəsəl Kərim Kundi Azərbaycanın birinci xanımı Mehriban Əliyevanın təltif olunduğu "Humanizm simvolu- 2012-ci ilin adamı" mükafatını Azərbaycanın Pakistandakı səfiri Daşqın Şikarova təqdim etmişdir.

Səfir Daşqın Şikarov "Daily Times" qəzeti və Qadın Könüllülər Təşkilatının rəhbərliyinə və əməkdaşlarına təşkil olunmuş tədbirə və Azərbaycanın birinci xanımını yüksək mükafatla təltif etdiklərinə görə minnətdarlığını bildirmişdir.

Diplomat bu mükafatın Pakistan parlamentinin sədri vəzifəsini icra edən şəxs tərəfindən təqdim olunması faktının xüsusi önəm kəsb etdiyini vurğulamışdır.

Mərasim məktəblilərin və tanınmış instrumental qrupun ifasında konsert proqramı ilə başa çatmışdır.

Təqdimat mərasimi Pakistanın nüfuzlu mətbuat orqanlarında - "Pakistan Observer", "The News", "Daily Times" qəzetlərində və "The Nation", "DNA News", "Centreline", həmçinin PTV, DRY News, Vakt TV, CNBC və digər yerli kanallarda geniş işıqlandırılmışdır.

Şahin CƏFƏROV,

AzərTAc-ın xüsusi müxbiri

İslamabad

Azərbaycan.-2013.- 24 yanvar.- S.3.