Mövqeyini itirmiş «ziyalı»dan «üçüncü qüvvə» olarmı?

Rüstəm İbrahimbəyov, Eldar Namazov və onların Moskvadakı həmfikirləri antimilli siyasət yürüdürlər

Azərbaycan ziyalısı cəmiyyətdə hər zaman öz mövqeyi ilə hadisələrə münasibəti, dövlətçiliyə sədaqəti, vətəndaşların fikir və düşüncələrini istiqamətləndirmək bacarığı ilə seçilən insandır. Onlar üçün ən vacib olan cəmiyyətin mənəvi saflaşması, insanların bir-birini başa düşməsi, cəmiyyətdə birgəyaşayış prinsiplərinin daha möhkəmlənməsi yolunda mühüm addımların atılmasına dəstək verməkdir. Ancaq bu gün adını "ziyalı" qoyan bir qrup şəxs Azərbaycan ziyalısı adına yaraşmayan hərəkət edir və ölkə ictimaiyyəti arasında çaşqınlıq yaratmaqla məşğuldur. Əslində, həmin qrupa toplaşan şəxslər xalqı, milli maraqları deyil, yalnız özlərini düşünür və öz məqsədlərinə çatmaq üçün hər cür yola əl atırlar.

"Ziyalılar forumu" adlı qondarma qurumda təmsil olunan Eldar Namazov, Rüstəm İbrahimbəyov kimi reneqatlar öz ambisiyalarını həyata keçirmək üçün səy göstərirlər.

Bu məsələyə münasibət bildirən Milli Məclisin deputatı Qalib Salahzadənın sözlərinə görə, "Ziyalılar forumu" adlanan qurum boş-boş işlərlə məşğuldur. Özlərini reklam etmək istəyən bəzi "ziyalılar" bu qurumda bir araya gəlib mənasız fəaliyyətlə məşğuldurlar: "Ziyalı xalq, dövlət üçün vacib məsələlərin həllinə öz töhfəsini verməlidir. Bir cəmiyyətin ziyalısının vəzifəsi ondan ibarətdir ki, o öz işi ilə məşğul olmaqla yanaşı, bu cəmiyyətin ağrısını, acısını da çiynində daşıya bilsin. Belə "ziyalı" qrupunda təmsil olunan şəxslərin ümummilli maraqlar pərdəsi altında gizlənərək şəxsi ambisiyaları uğrunda mübarizə apardıqları hər kəsə bəllidir. Kimisi ziyalı adından istifadə edib imkanlarını genişləndirmək istəyir, kimisi dövlət əleyhinə çıxışlar edib reklam olunmaq istəyir. Belə insanları necə ziyalı adlandırmaq olar? Onların məqsədləri, niyyətləri hər kəsə bəllidir".

Deputat bildirdi ki, bu gün Azərbaycan Prezidenti İlham Əliyevin fəaliyyəti göz qabağındadır. Azərbaycanın sosial-iqtisadi inkişafı, dünyaya inteqrasiyası və Cənubi Qafqazda lider dövlətə çevrilməsi məqsədyönlü siyasətin nəticəsidir. Azərbaycan ictimaiyyəti isə kimin kim olduğunu yaxşı anlayır.

Milli Məclisin deputatı Rüfət Quliyev isə hesab edir ki, "Ziyalılar forumu" adlı qurumun Azərbaycan ziyalılarının adından istifadə etmələri absurd bir şeydir: "Burada təmsil olunanlar bu və ya digər sahədə şəxsi maraqlarını güdən cılız bir qrupdur və onların Azərbaycan ziyalılarının adından danışmağa nə mənəvi, nə də hüquqi haqları yoxdur. Rəhmətlik Mirzə Ələkbər Sabir demişkən: "Kim sizi qəyyum edib hökm edəsiz bizlərə".

Deputatın fikrincə, əsl ziyalı öz mövqeyini dəyişməz və həmişə bir məsləkin daşıyıcısı olar. Müəyyən sahələrdə öz mövqelərini itirmiş bu şəxslər hakimiyyət iddiasına düşərək, indi özlərini "üçüncü qüvvə" adlandırır və Moskvadakı həmfikirləri də daxil olmaqla antimilli siyasət yürüdürlər. Onun sözlərinə görə, Rusiyanın özündə də elə qüvvələr var ki, Azərbaycanın müstəqil siyasət xəttindən qıcıqlanır, ölkədə qarışıqlıq salmağa cəhd göstərirlər. Lakin onların bütün cəhdləri əbəsdir. Çünki Azərbaycan xalqı artıq ağı qaradan yaxşı seçir. Onların hakimiyyətə gəlmək kimi xülyaları xəstə təxəyyüllərinin məhsulundan başqa bir şey deyil. Xalq arasında heç bir dayağa malik olmayan bu qüvvələr aqressiv müxalifət dəyirmanına su tökməklə özlərini də xalqın gözündən salmışlar.

R.Quliyev onu da əlavə edib ki, Prezident seçkilərinin keçiriləcəyi ildə onların xüsusi canfəşanlığının mahiyyəti hamıya məlumdur. Xalqımız bir daha səhvə yol vermək fikrində deyil və öz düzgün seçimini edəcəkdir: "Tam əminliklə bildirirəm ki, əgər günü bu gün Prezident seçkiləri keçirilsə, xalqın 80-90 faizi cənab İlham Əliyevi dəstəkləyəcək" - deyən deputat bildirib ki, Azərbaycan sabit və dinamik inkişaf yolundadır və heç bir qüvvə dövləti bu yoldan sapdıra bilməyəcək. Hər hansı bir "üçüncü" qüvvənin təhdidləri, şər və böhtanları fəaliyyətimizə mane ola bilməyəcək. Belələrini əvvəllərdə olduğu kimi, yenə də acı məğlubiyyət gözləyir".

Rəşad BAXŞƏLİYEV

Azərbaycan.-2013.- 24 yanvar.- S.4.