«İRS» jurnalının yapon dilində ikinci nömrəsi çapdan çıxmışdır

Azərbaycan Respublikasının Yaponiyadakı səfirliyinin və "İRS" jurnalının redaksiya heyətinin birgə təşkilatçılığı ilə Azərbaycan həqiqətlərinin dünyada təbliği sahəsində geniş xidmətləri olan jurnalın yapon dilində ikinci nömrəsi nəşr olunmuşdur.

Nəfis tərtibatda hazırlanmış jurnalın nəşrinin məqsədi yapon xalqını Azərbaycanın zəngin tarixi-mədəni irsi, son illər əldə edilmiş böyük iqtisadi uğurları, incəsənəti, ədəbiyyatı, mətbəxi, turizm imkanları haqqında daha ətraflı məlumatlandırmaqdır.

İkinci Bakı Beynəlxalq Humanitar Forumunun iştirakçısı olmuş, Yaponiya xarici işlər nazirinin sabiq müavini Akiko Yamanakanın jurnalda dərc edilmiş məqaləsində forumun beynəlxalq əhəmiyyətindən geniş bəhs olunur. Azərbaycanın belə mötəbər beynəlxalq tədbirə yüksək səviyyədə ev sahibliyi etməsi xüsusi vurğulanır. Azərbaycanın təkcə regionda deyil, bütövlükdə dünyada sülhün bərqərar olunmasına və təhlükəsizliyin təmin edilməsinə böyük töhfələr verdiyi diqqətə çatdırılır.

Nəşrdə Azərbaycan Xalq Cümhuriyyətinin tarixi, 20 Yanvar faciəsi, Dövlət Bayrağı meydanı, Azərbaycan balet məktəbi, ölkəmizin turizm imkanları, orta əsrlər memarlığı, Qarabağ muğam məktəbi, mətbəximiz haqqında və digər mövzularda məqalələr öz əksini tapmışdır. Jurnalda Milli Azərbaycan Tarixi Muzeyində saxlanılan yapon nizələri haqqında da yaponiyalı oxuculara ətraflı məlumat verilmişdir.

Vüqar AĞAYEV,

AzərTAc-ın xüsusi müxbiri

Tokio

Azərbaycan.-2013.- 25 yanvar.- S.7.