Roland KOBİA: Ermənistan-Azərbaycan, Dağlıq Qarabağ münaqişəsində gərginliyi artıracaq istənilən addıma qarşıyıq

Ermənistan-Azərbaycan, Dağlıq Qarabağ münaqişəsində gərginliyi artıracaq istənilən addıma qarşıyıq. AzərTAc xəbər verir ki, bu sözləri Avropa İttifaqının Azərbaycandakı nümayəndəliyinin rəhbəri səfir Roland Kobia Ermənistan tərəfinin Xocalı aeroportunu işə salması ilə bağlı məsələyə münasibət bildirərkən yanvarın 23-də jurnalistlərə demişdir.

Səfir bildirmişdir ki, Avropa İttifaqı Xocalı aeroportu ilə bağlı beynəlxalq qanunlar və normalar çərçivəsində hərəkət etməyə üstünlük verir. Diplomat qeyd etmişdir ki, Aİ münaqişənin həllini yalnız beynəlxalq hüququn norma və prinsipləri çərçivəsində dəstəkləyir.

R.Kobia həmçinin diqqətə çatdırmışdır ki, Avropa İttifaqının Cənubi Qafqaz və Gürcüstan böhranı üzrə xüsusi nümayəndəsi Filip Lefortun fevralın birinci yarısında Bakıya gələcəyi gözlənilir.

Ermənistan-Azərbaycan, Dağlıq-Qarabağ münaqişəsinin tənzimlənməsi istiqamətində ATƏT-in Minsk qrupunun gördüyü işlərin Aİ tərəfindən dəstəkləndiyini bildirən səfir qeyd etmişdir ki, təşkilat bu problemin həlli ilə bağlı üzv dövlətlərə hər zaman kömək etməyə hazırdır.

Azərbaycan.-2013.- 25 yanvar.- S.7.