ANAMA ilə Beynəlxalq Miqrasiya Təşkilatı arasında əməkdaşlığa dair saziş imzalanmışdır

Yanvarın 25-də Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) ilə Beynəlxalq Miqrasiya Təşkilatı (BMqT) arasında əməkdaşlığa dair sazişin imzalanması mərasimi keçirilmişdir.

AzərTAc xəbər verir ki, əməkdaşlıq sazişi ANAMA və BMqT arasında mina aksiyası üzrə həyata keçirilən tədbirlərin əlaqələndirilməsinə imkan yaradacaqdır. Sazişə əsasən, tərəflərin milli və beynəlxalq səviyyədə qarşılıqlı əməkdaşlıq etmələri nəzərdə tutulmuşdur.

Sazişi ANAMA-nın direktoru Nazim İsmayılov və BMqT-nin Azərbaycandakı nümayəndəliyinin rəhbəri əvəzi Serhan Aktoprak imzalamışlar.

ANAMA-nın direktoru Nazim İsmayılov rəhbərlik etdiyi qurumun ölkədə və xaricdə fəaliyyətindən danışmışdır. Bildirmişdir ki, ANAMA yalnız mina təmizləmə əməliyyatları ilə məşğul olmur. Eyni zamanda, mina təhlükəsinə dair maarifləndirmə, habelə minadan zərərçəkənlərə yardımın göstərilməsi sahəsində də geniş işlər aparır. Agentliyin hazırladığı mina təhlükəsinə dair maarifləndirmə dərsliyinin orta məktəblərdə tədrisi nəticəsində uşaqlar arasında mina və PHS-dən zərər çəkənlərin sayı sıfıra enmişdir.

Ölkəmizdə mina və PHS təhlükəsi olan ərazilərdə əməliyyatların davam etdirildiyini deyən N.İsmayılov demişdir ki, bizim mühüm hədəfimiz işğal altındakı ərazilər azad edildikdən sonra orada aparılacaq əməliyyatlardır.

N.İsmayılov bildirmişdir ki, ANAMA ötən dövr ərzində Türkiyədə mina təmizləmə əməliyyatlarında iştirak etmiş, xarici ölkələrin müvafiq qurumlarının əməkdaşları üçün təlim kursları təşkil etmişdir.

Direktor demişdir ki, agentlik tərəfindən BMqT və digər beynəlxalq təşkilatların xətti ilə minadan zərər çəkənlərə öz bizneslərini qurmaq, məşğulluğu təmin etmək üçün az faizlə mikrokreditlər verilir.

BMqT-nin Azərbaycandakı nümayəndəliyinin rəhbəri əvəzi Serhan Aktoprak çıxış edərək sazişin əhəmiyyəti və təşkilatın gördüyü işlər barədə məlumat vermişdir. Bildirmişdir ki, təmsil etdiyi qurum müxtəlif sahələrdə fəaliyyət göstərir. Təşkilat fövqəladə hallar aradan qaldırıldıqdan sonra əhalinin normal yaşayışını təmin etmək üçün mina təmizləmə fəaliyyətlərinə dəstək verir, ehtiyacı olan insanlara humanitar yardımlar göstərir.

Bildirilmişdir ki, əməkdaşlıq sazişinin bağlanması ilə ANAMA və BMqT mina aksiyası üzrə həyata keçirilən əlaqələri rəsmiləşdirmişlər. Əməkdaşlıq sazişinə əsasən, tərəflərin milli və beynəlxalq səviyyədə iki sahə üzrə qarşılıqlı əməkdaşlıq etmələri nəzərdə tutulmuşdur. Bunlardan birincisi mina aksiyasıdır. Burada toplanmış sursatların məhv edilməsi, mina təmizləmə, minadan zərərçəkənlərə yardım, reabilitasiya və reinteqrasiya, məlumatlandırma, mina təhlükəsinə dair maarifləndirmə tədbirləri nəzərdə tutulur. İkinci istiqamət mina aksiyasının daha geniş inkişaf layihələri və proqramlarına inteqrasiyasıdır. Buraya isə sülh quruculuğu və dəstək, humanitar yardım, münaqişədən sonra yenidənqurma və inkişaf daxildir.

Bildirilmişdir ki, 2007-ci ildən etibarən BMqT ilə ANAMA minadan zərərçəkənlərə yardım sahəsində sıx əməkdaşlıq edirlər. Bu əməkdaşlıq çərçivəsində 2007-2012-ci illərdə "Azərbaycanda minadan zərərçəkənlər üçün sosial-iqtisadi reinteqrasiya" proqramı uğurla həyata keçirilmişdir.

Bu layihə Avstriya İnkişaf Agentliyi, Beynəlxalq Etimad Fondu, Sloveniya dövləti, Koreya Respublikası, Bakı Rotary Club və digər donorlar tərəfindən maliyyələşdirilmişdir.

Bundan əlavə, minadan zərərçəkən 190 vətəndaş üçün kiçik biznes təlimlərinin öyrədilməsi və idarəedilməsi üzrə "Azərbaycanda minadan zərərçəkənlər üçün sosial-iqtisadi reinteqrasiya" proqramı uğurla həyata keçirilmişdir.

BMT-nin Azərbaycandakı rezident-əlaqələndiricisinin müavini Nato Alxazişvili sazişin əhəmiyyətindən danışmış, ANAMA-nın uğurlarını yüksək qiymətləndirmişdir.

Tədbirdə həmçinin Azərbaycanda MZY Proqramını və ANAMA ilə BMqT arasında minadan zərərçəkənlərə yardım sahəsində sıx əməkdaşlığı əks etdirən foto və filmlər təqdim edilmişdir.

Azərbaycan.-2013.- 26 yanvar.- S.7.