Kolomnoda Ümumrusiya Azərbaycan Konqresinin nümayəndəliyi açıldı

Ümumrusiya Azərbaycan Konqresi (ÜAK) Rusiya Federasiyasında fəaliyyətini təkmilləşdirməklə yanaşı, genişləndirməkdə və regional bölmələrinin sayını artırmaqda davam edir.

Nümayəndəliklər sırasına biri də - Moskva vilayətinin Kolomno şəhərində yaradılmış Ümumrusiya Azərbaycan Konqresinin Kolomno şəhər nümayəndəliyi də qoşuldu. Təşkilatın yaradılması üçün keçirilən yığıncaqda ÜAK-ın şöbə müdiri Rövşən Rüstəmov və regionlar üzrə kurator Ülfət Əliyev də iştirak etdilər.

ÜAK nümayəndələrinin və yenicə yaradılmış diaspor təşkilatının rəhbərlərinin şəhər administrasiyasında, administrasiya rəhbərinin müavini Gennadi Linkeyeviçlə görüşü oldu. G.Linkeyeviç Kolomno şəhərində belə bir diaspor təşkilatının yaranmasını dəstəklədiyini bildirdi.

Yeni yaradılmış təşkilatın sədri Elxan Qurbanov, ÜAK təmsilçiləri təşkilat haqqında məlumat verdilər, Rusiya Federasiyasının 80-dən artıq regionunda nümayəndəliyin fəaliyyət göstərdiyi qeyd olundu. ÜAK-ın neçə il əvvəl Azərbaycan xalqının ümummilli lideri Heydər Əliyevin və Rusiyanın hazırkı Prezidenti Vladimir Putinin xeyir-duası ilə yarandığı xatırlandı. Görüşün sonunda Ümumrusiya Azərbaycan Konqresi adından şəhər rəhbərliyinə Azərbaycandan və Prezident İlham Əliyevdən bəhs edən ədəbiyyat hədiyyə edildi.

Təqdimetmə mərasimi isə Kolomno Şəhər Mədəniyyət Mərkəzində gerçəkləşdi. Soydaşlarımız qarşısında çıxış edən yerli nümayəndəliyin sədri Elxan Qurbanov şəhərdə azərbaycanlılar arasında bu cür təşkilata ehtiyac duyulduğunu bildirdi. Məqsədin isə soydaşlarımızı bir-birinə yaxınlaşdırmaq, birgə işlər görmək, çoxmillətli Rusiya dövlətində dostluq və qardaşlıq şəraitində yaşamaq olduğunu qeyd etdi.

Qonaqlara və yerli sakinlərə təşkilatın ofisi nümayiş etdirildi.

Azərbaycan.-2013.- 27 yanvar.- S.1.