Azərbaycan-Yaponiya əlaqələrinin hazırkı səviyyəsi məmnunluq doğurur

Yanvarın 30-da Azərbaycanın xarici işlər nazirinin müavini Xələf Xələfov Yaponiya Xarici İşlər Nazirliyinin Qafqaz, Mərkəzi Asiya və GUAM üzrə xüsusi nümayəndəsi Takeşi Hikiharanın başçılıq etdiyi nümayəndə heyəti ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, Takeşi Hikihara ölkəmizə ilk səfərindən məmnunluğunu bildirmiş, Azərbaycan ilə Yaponiya arasında bir çox ortaq dəyərlərin, o cümlədən demokratiya və qanunun aliliyi kimi dəyərlərin mövcud olduğunu söyləmişdir. Azərbaycanın Yaponiya üçün əhəmiyyətindən bəhs edən Takeşi Hikihara respublikamızın regionun vacib və strateji ölkəsi olduğunu bildirmişdir. O, Azərbaycanın regionda Yaponiyanın əsas və etibarlı tərəfdaşı olduğunu vurğulamışdır.

Fevralın əvvəllərində Azərbaycanın ilk süni peykinin orbitə çıxarılacağını qeyd edən Takeşi Hikihara Yaponiyanın bu sahədə zəngin təcrübəsini bölüşməyə hazır olduğunu söyləmişdir.

Azərbaycan-Yaponiya əlaqələrinin hazırkı vəziyyətindən məmnunluğunu bildirən Xələf Xələfov ölkələrimiz arasında əməkdaşlığın bütün sahələrdə inkişaf etdiyini, siyasi dialoqun yüksək səviyyədə olduğunu diqqətə çatdırmışdır.

Yaponiya şirkətlərinin Azərbaycan iqtisadiyyatındakı rolunu qeyd edən nazir müavini onların iki ölkə arasındakı əməkdaşlığın daha da dərinləşməsinə töhfə verdiyini söyləmişdir. Yaponiyanın informasiya-kommunikasiya texnologiyaları sahəsində təcrübəsinin öyrənilməsinin vacibliyini qeyd edən X.Xələfov Azərbaycanın bu sektora böyük önəm verdiyini vurğulamışdır.

İki ölkə arasında təhsil, mədəniyyət və humanitar sahələrdə əməkdaşlığın vacibliyini vurğulayan Xələf Xələfov Yaponiya tərəfinin azərbaycanlı tələbə və mütəxəssislərin bu ölkədə təhsil almaları və təcrübə toplamaları üçün yaratdığı şəraiti yüksək qiymətləndirmiş, bunun iki ölkə arasındakı münasibətlərin inkişafına mühüm töhfə verdiyini bildirmişdir.

Nazir müavini qarşılıqlı səfərlərin təşkilinin, o cümlədən parlamentlər arasındakı əməkdaşlığın daha da genişləndirilməsinin zəruriliyini vurğulamışdır.

X.Xələfov həmçinin Azərbaycanda gedən inkişaf prosesləri, ölkəmizin regiondakı rolu, burada sabitliyə və təhlükəsizliyə mane olan Ermənistan-Azərbaycan, Dağlıq Qarabağ münaqişəsi haqqında ətraflı məlumat vermişdir. Münaqişənin sülh yolu ilə həlli istiqamətində fəaliyyət göstərən ATƏT-in Minsk qrupunun səylərinin nəticə vermədiyini bildirən nazir müavini BMT və digər beynəlxalq təşkilatların Azərbaycanın işğal altındakı ərazilərinin azad olunmasına dair qəbul etdiyi qətnamələrə əməl etməsi üçün Ermənistana beynəlxalq təzyiqlərin artırılmasının vacibliyini vurğulamışdır.

Azərbaycan.-2013.- 31 yanvar.- S.4.