Əmək və əhalinin sosial müdafiəsi naziri

Ağdamda vətəndaşları qəbul etmişdir

Prezident İlham Əliyevin tapşırığına əsasən, mərkəzi icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin həllinə kömək göstərirlər.

AzərTAc xəbər verir ki, aprelin 25-də əmək və əhalinin sosial müdafiəsi naziri Səlim Müslümov nazirliyin Ağdam rayon Əhalinin Sosial Müdafiəsi Mərkəzinin inzibatı binasında bu rayondan, eləcə də Ağcabədi, Laçın və Bərdədən olan vətəndaşları qəbul etmişdir.

Nazirliyin aidiyyəti struktur bölmələrinin məsul şəxslərinin iştirakı ilə keçirilən qəbulda 80-ə yaxın sakinin müraciəti dinlənilmişdir.

Vətəndaşlar əsasən mənzil və avtomobillə təminat, sanator-kurort yollayışları, reabilitasiya vasitələri, bərpa-müalicə xidməti ilə bağlı müraciətlər etmişlər. Əvvəlki dövrlərdən fərqli olaraq ünvanlı dövlət sosial yardımı, əlillik təyinatı ilə bağlı müraciətlər azalmışdır.

S. Müslümov ayrı-ayrı imtiyazlı şəxslərin bərpa-müalicə xidməti, reabilitasiya avadanlıqları, sanator-kurort yollayışları ilə təmin olunması, həmçinin vətəndaşların qaldırdıqları digər məsələlərin obyektiv və ədalətli şəkildə araşdırılması barədə aidiyyəti strukturların rəhbərlərinə tapşırıqlar vermişdir.

Qəbul zamanı nazirliyin səlahiyyətlərinə aid olmayan müraciətlər qeydiyyata alınaraq müvafiq orqanlara çatdırılması üçün nəzarətə götürülmüşdür.

Azərbaycan.-2014.-26 aprel.-S.3.