Kabildə keçirilən Novruz Sammitində

Azərbaycan nümayəndə heyəti də iştirak etmişdir

Martın 27-də Əfqanıstan İslam Respublikasının paytaxtı Kabil şəhərində İslam ölkələrinin ənənəvi Novruz Sammiti keçirilmişdir. Tədbirdə Əfqanıstan İslam Respublikasının, İran İslam Respublikasının, Pakistan İslam Respublikasının və Tacikistanın prezidentləri, BMT-nin baş katibinin müavini, eləcə də digər ölkələrdən nümayəndə heyətləri iştirak etmişlər.

AzərTAc xəbər verir ki, sammitdə Azərbaycanı Baş nazirin müavini Elçin Əfəndiyevin başçılıq etdiyi nümayəndə heyəti təmsil etmişdir.

Elçin Əfəndiyev Əfqanıstan Prezidenti Həmid Kərzai, İran Prezidenti Həsən Ruhani, Pakistan Prezidenti Məmnun Hüseyn və Tacikistan Prezidenti Emoməli Rəhmon ilə görüşmüş, Azərbaycan Prezidenti İlham Əliyevin salamlarını və Novruz təbriklərini onlara çatdırmışdır.

Azərbaycan nümayəndə heyətinin başçısı Elçin Əfəndiyev, həmçinin tədbirdə iştirak edən Qazaxıstan, Türkmənistan və Qırğızıstan nümayəndə heyətlərinin başçıları ilə görüşmüşdür.

Tədbirdən sonra nümayəndə heyətinin başçısı Elçin Əfəndiyev Əfqanıstanda yerləşmiş Azərbaycan sülhməramlı qüvvələrinin heyəti ilə də səmimi və səmərəli görüş keçirmiş, onları Novruz münasibətilə təbrik etmişdir.

Qeyd edək ki, ciddi təhlükəsizlik tədbirlərinin görülməsinə baxmayaraq, sammit ərəfəsində və tədbirdən sonra Kabil şəhərində insan tələfatı ilə nəticələnən terror aktları törədilmiş, o cümlədən Azərbaycan nümayəndə heyətinin yerləşdiyi otel, onlar Kabili tərk etdikdən bir neçə saat sonra partladılmışdır.

Azərbaycan.-2014.- 2 aprel.- S.1.