Əsas hədəf insan amilidir

Regionların sosial-iqtisadi inkişafına dair dövlət proqramlarının icrasına həsr olunan konfransda Prezident İlham Əliyevin nitqində 2003-2013-cü illərdə dövlətin daxili siyasətinin mühüm istiqamətləri geniş təhlil olunmuş, qarşıdakı beş il ərzində həyata keçirilməsi nəzərdə tutulan əsas vəzifələr müəyyən edilmişdir. Vurğulanmışdır ki, ötən 10 il ölkəmizin sosial-iqtisadi inkişafında mühüm mərhələ olmuş, əsl intibah dövrü kimi tarixə çevrilmişdir. Paytaxt Bakı ilə yanaşı yaxın-uzaq bölgələr də simasını dəyişmiş, yeni və gözəl görkəm almışdır. Cəbhə bölgələrinə xüsusi qayğı ötən dövr ərzində dövlət başçısının fəaliyyətində başlıca istiqaməti müəyyən etmişdir.

Tərtər rayonu dövlətin davamlı və əhatəli qayğısından yaradıcılıqla bəhrələnən cəbhə bölgəsidir. Dövlətin ayırdığı vəsaiti zəruri sahələrə bacarıqla yönəldən, abadlıq, quruculuq işlərini yüksək zövqlə reallaşdıran, mütərəqqi texnologiyaların tətbiqi hesabına kənd təsərrüfatı məhsulları istehsalında yüksək artıma nail olan, ölkənin ərzaq təhlükəsizliyinə sanballı töhfə verilməsini təmin edən rayon rəhbərliyi başlıca diqqəti əhalinin həyat şəraitini hər vasitə ilə yaxşılaşdırmağa yönəltmişdir. Bu istiqamətdə həyata keçirilən tədbirlər rayonda sosial infrastrukturun əhəmiyyətli dərəcədə yaxşılaşmasna öz müsbət təsirini göstərir, əhali tərəfindən razılıqla qarşılanır. Tərtər Rayon İcra Hakimiyyətinin başçısı Ceyhun Cəfərov bizimlə söhbətində rayonda insan amilinə önəm verildiyini xüsusi vurğuladı. Rayonda sağlam mənəvi-psixoloji mühitin formalaşması üçün həyata keçirilən tədbirlərdən danışdı: "Göz qarşısında olan reallıqdır ki, son illər Tərtər rayonunda tikinti, abadlıq, quruculuq sahəsində böyük nailiyyətlər qazanılıb. Ən böyük uğur isə məmur-vətəndaş qütbləri arasında yaranan səmimiyyətdir, qarşılıqlı inam və etimadın formalaşmasıdır. Təbii ki, bu inamı sözlə qazanmaq mümkün deyil. Bu, əməldən, gündəlik canlı fəaliyyətdən qaynaqlanmalıdır. İclaslarda, tədbirlərdə tribunadan deyilən söz real həyatda öz təsdiqini tapmırsa, vətəndaşın nəzərində dövlət məmurunun saxta və yalançı obrazı formalaşır". Həmsöhbətim regionların sosial-iqtisadi inkişafına dair dövlət proqramlarının icrasına həsr olunmuş konfransda Prezident İlham Əliyevin yekun nitqindən sitat gətirdi: "Hər bir dövlət məmuru öz məsuliyyətini dərk etməlidir. Hər bir dövlət məmuru təmiz işləməlidir, xalqla bir yerdə olmalıdır, təvazökar, işgüzar və vətənpərvər olmalıdır, rüşvət almamalıdır, özünü xalqdan üstün tutmamalıdır, işlədiyi bölgələrdə, sahələrdə hörmət qazanmalıdır və vətənə sadiq, sədaqətli olmalıdır... Dövlət məmuru xalqın xidmətçisidir. Xalqın birinci xidmətçisi mənəm və bütün dövlət məmurları belə işləməlidirlər".

Prezidentin hər bir dövlət məmuruna ünvanlanan bu konkret və birmənalı tapşırığı, kifayət qədər ciddi tələbi cəmiyyətin bütün təbəqələri tərəfindən razılıqla qarşılanmaqdadır. Həmsöhbətimizin günün bu aktual məsələsi ilə bağlı fikirləri maraqlıdır:

- İcra hakimiyyəti başçısı şərəfli olduğu qədər də məsuliyyətli vəzifədir. Hansısa konkret bir ərazidə dövlət siyasətinin həyata keçirilməsinə rəhbərlik etməyin məsuliyyəti kifayət qədər ağırdır. Xalqa xidmət etmək, əhalini narahat edən problemləri aradan qaldırmaq üçün təyin edilmiş bir məmurun başqa yol tutmağa, adamlara yuxarıdan aşağı baxmağa qətiyyən haqqı yoxdur. Sənin icra hakimiyyətinin başçısı təyinatına imza edən ali səlahiyyət sahibi "Xalqın birinci xidmətçisi mənəm" deyirsə, bu cəmiyyətdə dövlət məmuru olaraq öz yerini müəyyən etmək heç də çətin deyildir. Sadəcə, məqsədin, niyyətin aydın olmalıdır. Tərtər cəbhə bölgəsidir. Bu baxımdan dövlətin, Prezident İlham Əliyevin xüsusi qayğı və diqqətini daim öz üzərimizdə hiss edirik. Elektrik enerjisi, təbii qaz, içməli su ilə təminatda əhalini illərdən bəri narahat edən problemlər müvəffəqiyyətlə aradan qaldırılır. Yol infrastrukturunun müasir tələblər səviyyəsində yenidən qurulması rayon əhalisi tərəfindən minnətdarlıqla qarşılanır. Torpaq istifadəçilərinə dövlət dəstəyinin artırılması kənd adamlarını əkin-biçin işlərinə daha möhkəm tellərlə bağlayır, yaxşı yaşamaq istəyən hər kəsi yaxşı da işləməyə, məhsul bolluğu yaratmağa ruhlandırır. Dövlət başçısının tapşırıq və tövsiyələri, hər bir məmura örnək olası fəaliyyəti hər kəs üçün canlı nümunədir. Bu nümunə gündəlik işimizin, fəaliyyətimizin başlıca istiqamətini müəyyən edir.

Tərtər rayonunun sosial-iqtisadi inkişafında mühüm mərhələ olmuş 2013-cü ildə vətəndaşların müraciətlərinə, ərizə və şikayətlərinə vaxtında və qayğıyla baxılmasına, haqlı tələblərinin operativ qaydada həll edilməsinə diqqət artırılmışdır. İl ərzində icra hakimiyyətinə müxtəlif dövlət orqanlarından və hökumət qurumlarından, ayrı-ayrı vətəndaşlardan bütövlükdə 1371 müraciət qəbul olunmuşdur. Onlardan 1205-i müsbət, 38-i qismən həll edilmişdir. 11-i nəzarətə götürülmüş, 26-sına müvafiq izahat verilmiş, 34-ü əsassız sayılmış, 36-sı aidiyyəti üzrə göndərilmişdir. 11-i isə icradadır. İl ərzində rayon icra hakimiyyəti başçısı aparatında 3200 nəfər, o cümlədən rayon icra hakimiyyəti başçısı tərəfindən 2850 nəfər vətəndaş qəbul edilmişdir. İcra hakimiyyəti başçısının hər həftə yerlərdə keçirilən səyyar qəbulları, görüşləri pozulmaz xarakter almışdır.

Rayonda yaradılmış 5 təşviqat qrupu hər həftə keçirdiyi görüşlərdə əhalinin məlumatlandırılmasını təmin edir. Əhalinin bütün təbəqələrini əhatə edən bu görüşlərdə Prezident İlham Əliyevin fəaliyyəti, nitqlərindən irəli gələn vəzifələr, sosial-iqtisadi inkişaf sahəsində qazanılan uğurlar, həyata keçirilən möhtəşəm infrastuktur layihələri haqqında məlumatlar sadə və anlaşıqlı şəkildə əhaliyə çatdırılır. Keçən il qrup tərəfindən 600 görüş keçirilmişdir. 2013-cü il ərzində rayonda aparılan ideoloji işin əsasını Azərbaycan xalqının ümummilli lideri Heydər Əliyev irsinin öyrənilməsi təşkil etmişdir. Ulu öndərin siyasi irsinin öyrənilməsində, gənclərdə müasir dünyagörüşünün formalaşmasında, yeni nəslin hərbi-vətənpərvərlik ruhunda tərbiyəsində, onların bilik və bacarıqlarının artırılmasında Heydər Əliyev Mərkəzi mühüm rol oynayır. Mərkəzdə ingilis dili, kompyuter kursu, rəssamlıq dərnəyi və elektron kitabxana fəaliyyət göstərir. Mərkəzə rayon ictimaiyyətinin, məktəblilərin vaxtaşırı ekskursiyaları təşkil olunur.

Dövlət başçısının tapşırıq və tövsiyələrinə uyğun olaraq rayon əhalisinin həyat şəraitini hər vasitə ilə yaxşılaşdırmaq, onları narahat edən sosial problemləri aradan qaldırmaq üçün zəruri tədbirlər görülür. Mövcud imkanlardan bacarıqla istifadə edilərək rayonda sağlam mənəvi-psixoloji mühit yaradılmışdır. Adamlar sözün həqiqi mənasında bu isti münasibətdən, yetərincə bəhrələndikləri qayğı və diqqətdən ruhlanır, daha səmərəli, daha məhsuldar işləyirlər. Keçən il rayonda ümumi məhsul istehsalının həcmi 109,4 milyon manat olmuşdur. Ümumi məhsul istehsalının həcmi əvvəlki 10 illə müqayisədə 4 dəfə artmışdır. "Kənd təsərrüfatı məhsullarının istehsalçılarına dövlət dəstəyi haqqında" dövlət başçısının sərəncamının icrasına uyğun olaraq keçən il torpaq istifadəçilərinə bütövlükdə 1,363 min manat subsidiya verilmişdir. Dövlət qayğısının məntiqi nəticəsidir ki, tərtərlilər keçən il 54,386 ton taxıl istehsal etmişlər.

Rayonda sahibkarlığın inkişafı üçün münbit şərait yaradılmışdır. Dövlətin qayğısı özəl sektorun dinamik inkişafını təmin edir. Ötən il 46 layihə üzrə iş adamlarına Sahibkarlığa Kömək Milli Fondu tərəfindən 557,5 min manat güzəştli kredit verilmişdir.

Bu gün Tərtər ana yurdun hər qarışını canından artıq sevən övladlarının qüdrətli əlləriylə cənnətə dönüb. Hər addımda rastlaşdığın gözəllik, yaraşıq könüllərdə xoş duyğular oyadır. İnsanlara rahatlıq gətirən əsas cəhət isə odur ki, tərtərlilər sıradan geri qalmamaq üçün çalışmırlar. Onların qurub-yaratmaq həvəsində bir könül istəyi, ürək odu var. Bunu daş üstə qoyulan hər daşda, başına pərvanə kimi dolanılan hər yaşıl tingdə, hər gül kolunda görmək, duymaq olar.

"Əl işdən soyumur, ürək arzudan". İndi tərtərlilər sabaha daha böyük ümidlərlə baxırlar. Növbəti 5 ili əhatə edən regionların sosial-iqtisadi inkişafına dair III Dövlət Proqramından da görünür ki, Tərtər rayonu üçün də möhtəşəm tədbirlər nəzərdə tutulacaq. Elə bu il olimpiya idman kompleksi, məcburi köçkünlər üçün qəsəbə, Qarabağ müharibəsi əlilləri və şəhid ailələri üçün yeni yaşayış binaları tikiləcək, şəhərin su-kanalizasiya sistemi inşa olunacaqdır. Suya olan tələbatı daha da yaxşılaşdırmaq üçün 26 subartezian quyusu qazılacaqdır. Bütün işlərin fövqündə isə insan amili dayanır. Dövlət lazım olan hər şeyi edir ki, onun vətəndaşı daha yaxşı yaşasın, firavan həyat sürsün.

Lazım QULİYEV,

Azərbaycan.-2014.- 2 aprel.- S.4.